Nsumuinu 16 - MUKANDA WA MYIDI MUKULU（TSH96）

Tuikale ne Maweja-Nangila mu nsombelu wetu wa buatshiabuatshia

1Muntu udi wela meji bua kuenza bualu kampanda munda muende. Kadi Maweja-Nangila ke udi mua kuamba muende mua ndekelu mudiye mumone.

2Muntu yonsu udi wela meji ne: bionsu bindi ngenza mbilenga. Kadi Maweja-Nangila ke udi mumanye mudi muoyi wa muntu yonsu.

3Uteke midimu yebe mu bianza bia Maweja-Nangila, nanku nenkumbaje biuvua muele meji.

4Tshintu tshionsu tshidi Maweja-Nangila muenze, tshidi ne kipatshila katshi; nanku wakalongoluela muntu mubi dituku dia dimunyoka.

5Maweja-Nangila udi udiwula bantu badi baditambisha. Bushuwa neabanyoke kamuyi mpata.

6Unange bantu, ulamate Maweja-Nangila, nanku neakufuile luse bua ntupakanyi yebe. Newepuke bubi paudi utshina Maweja-Nangila.

7Padi Maweja-Nangila muanyishe nsombelu wa muntu, udi ubueja diumvuangana pankatshi pende ne baluishi bende.

8Kupeta difutu dikese mu buakane, nkupita kuikala ne bintu bia bungi bipeta mu buenzayi.

9Muntu udi upangadika bua kuenza bualu, kadi Maweja-Nangila ke udi ubujadika, ubukumbaja.

Bakalenga ba matunga

10Padi mukalenga wa ditunga wakula mu dina dia Maweja-Nangila, nanku diba didiye ukosa nsambu kena utupakana.

11Maweja-Nangila udi musue bua bipimu bikale bijalame. Udi ushindika kabidi mudibu ne bua kutempa majitu.

12Mukalenga ki mmunange bua bantu benze bibi, bualu nkuasa wa bukalenga udi ujalama padi buakane.

13Mukalenga udi ujinga bua bamuambile malu patoke. Udi unanga bantu badi bamba malu pa wowu.

14Padi mukalenga ufika munda, udi mua kufikisha muntu ku lufu. Kadi muntu wa lungenyi udi umutuyisha.

15Mimuemue pa mpala wa mukalenga idi isanguluja bantu. Muoyi wende wa kalolu udi bu mvula udi utalaja buloba.

Mudi bantu mua kusomba bimpe panu

16Bidi bitambe buimpe kupeta meji ne lungenyi, pa mutu pa kupeta mpawungi ne tshiamu tshitoke tshia mushinga mukole.

17Bantu bakane badi bepuka bubi, bualu muntu udi wakaja nsombelu wende udi ulama muoyi wende.

18Udi uditambisha neabutuke. Udi udisua neapone panshi.

19Bidi bipite buimpe kuikala muntu mupuekele udi usomba pamue ne bapele, pa mutu pa kuabanyangana bintu bivule ne bantu badi baditambisha.

20Muntu udi uteleja bidibu bamuambila neatuute dikasa dimpe. Udi utekemena kudi Maweja-Nangila udi muena diakalenga.

21Muntu udi ujingulula malu ne meji udi muena lungenyi. Padiye ulongesha ne miaku idi isankisha bantu, ibatua ku muoyi, nebamuitabe lukasa.

22Badi balonda meji nebapete muoyi. Batshimbakane badi babanyoka bua bupote buabu.

23Bantu ba meji badi basunguluja tshia kuamba. Ke mudibu baluisha bantu ne miaku yabu.

24Miaku mimpe idi bu buitshi, budi busheme mukana, biengelela mubidi.

25Muntu udi mua kuela meji ne: njila undi ndonda udi muimpe. Kadi njila awu udi mua kumufikisha ku lufu.

26Nzala idi ikuatshisha muntu mudimu bikole, bualu ku mudimu ke kudiye mua kutuyishila nzala yende.

27Muntu wa tshidingidingi udi wela meji a kuenzela bantu bibi. Ludimi luende ludi luosha bantu ne malu mabi.

28Muntu wa malu a muinshimuinshi udi ujuula matandu. Muena lunsonga udi unyanga malunda a bantu.

29Muntu wa tshikisu udi udinga balunda bende, ubakebela kabutu.

30Tangila muntu udi ubuita ku mesu, usumakaja mishiku. Mmulongolole bualu bua kuenza. Ukadi mumane kubuenza mene.

31Nsuki mitoke nnsala wa kalumbandi, bualu amu bantu bakane ke badi balala matuku mavule pa buloba.

32Tshilobu tshia mvita ke muntu udi kayi ufika munda lukasa. Muntu udi udikolela mmupite tshilobu tshidi tshikuata tshimenga.

33Bantu badi batshinka bidi mua kuenzeka, kadi Maweja-Nangila ke udi ushindika bualu muende mudiye musue.