1Ke mudi muntu udi utshina Maweja-Nangila wenza nanku.
Udi ulama mikenji yende, upeta meji.
2Meji neamuakidile
bu mudi mamu wakidila muanende wa bakaji,
bu mudi nsongakaji wakidila uvua mumusele.
3Diampa didiwu amutuadila, ke lungenyi,
mayi a kunua adiwu amunuisha ke
meji.
4Padi muntu ushindamena pa meji, kena upungila to.
Muntu udi muatekemene kabena bamufuisha bundu.
5Meji adi amuvuija muntu wa mushinga wa bungi,
mupite wa badiye nabu mutumba.
Padiye wakula, adi aludika bidiye wamba.
6Udi upeta disanka divule,
dina diende didi ditumba kashidi.
7Kadi bantu batshimbakane kabena mua kupeta meji to.
Benji ba bibi kabakuamona nansha.
8Meji kaena pabuipi ne muena diditambisha,
bena dishima kabena mua kuavuluka.
9Bantu babi nansha bobu batumbisha Maweja-Nangila,
kabiena bielesha meji to.
Bualu dimutumbisha didi difumina amu kudiye.
10Amu muntu udi ne Meji ke udi utumbisha Maweja-Nangila,
bualu Maweja-Nangila ke udi umulombola.
Muntu udi mfumu wa bidiye wenza11Paudi umbuka mu njila mululame,
kuambi ne: Mvidi Mukulu ke udi mumfikishe ku bubi, to.
Bualu Maweja-Nangila kena wenza tshidiye ubenga to.
12Kuambi ne: “Maweja-Nangila ke udi mungendeshe dikasa dibi”,
bualu yeye kena ukengela muenji wa bibi.
13Maweja-Nangila udi ubenga bubi bua mishindu yonsu.
Bantu badi bamutshina kabena bananga bubi nansha bukese.
14Maweja-Nangila ke uvua mufuke muntu ku tshibangidilu,
kumupaye bumfumu bua kuenza tshidiye musue.
15Paudi musue udi mua kulama mikenji ya Mvidi Mukulu.
Kumulamata, ke bidi bikutangila wewe.
16Maweja-Nangila mmukutekele kapia ne mayi kumpala kuebe,
wewe udi mua kujadika tshidi mua kusungula, tshiudi musue!
17Maweja-Nangila mmutekete muntu muoyi nansha lufu;
bilondeshile muvuabu bajinga,
badi mua kupeta muoyi nansha lufu.
18Bualu meji a Mvidi Mukulu mmapite.
Udi muena bukole buonsu, udi umona bintu bionsu.
19Udi utabalela badi bamutshina,
udi mumanye malu onsu adi bantu benza.
20Kena utumina muntu nansha umue diyi bua kuikalaye mubi.
Kena mupeshe muntu dianyisha dia kuenza bibi to.
Who We AreWhat We EelieveWhat We Do
2025 by iamachristian.org,Inc All rights reserved.
