Yudite 2 - MUKANDA WA MYIDI MUKULU（TSH96）

Badi batuma Oloferne bua kunyoka bantu

1Mu tshidimu tshia dikumi ne muanda mukulu tshia bukalenga bua Nebukadnesare, mukalenga wa bena Ashure, mu matuku makumi abidi ne abidi a ngondu wa kumpala, bavua belele tshipangu mu nzubu wa bukalenga bua kusombuela bantu bonsu bavua batombokela mukalenga, bavuaye mumane kuditshipa bua kubutula.

2Nebukadnesare kubikidisha balombodi bende ba mu bukalenga ne banene babu. Kubambilaye muvuaye mumane kuela meji bua kunyoka bantu abu.

3Bafidi ba ngenyi kutuabu ku tshiende, bavua bamba kabidi ne: bidi bimpe kubutula bantu bonsu bavua babenga diyi dia mukalenga bua kubuela mu myita.

4Nenku tshipangu tshijika, Nebukadnesare kubikidisha Oloferne, mulombodi wa bena myita bende, uvua ku mutu kua balombodi bakuabu, uvua kabidi tshindonde tshiende mu bukalenga. Kumuambilaye ne:

5— Mukalenga munene, mfumu wa buloba buonsu, mmuele mukeji ewu ne: Usangishe bantu betu badi bapite kuibidila bua kuluangana myita. Wangata bena myita badi benda ku makasa batua ku binunu lukama ne makumi abidi, kabidi ne babandi ba pa tubalu binunu dikumi ne bibidi.

6Uye kuluisha matunga onsu adi kudi diba dibuelela, bualu bavua bapange kuenza tshimvua musue.

7Neulombe bantu babu mulambu wa bia mu madimi ne mayi bua kujadika ne badi bakumbaja mikenji yanyi. Ubamanyishe ne pandi mfika munda, ndi ntuma bena myita banyi bua kubakengesha. Bena myita banyi nebabadiatakaje too ne ku mpenga kua buloba buabu, bualu nebapawule bintu biabu bionsu.

8Bantu badi batapika mputa nebuwule mu mbuwa. Misulu yonsu neyuwule tente ne bitalu bia bantu.

9Nebaye ne bena lukanu too ne ku ndekelu wa buloba.

10Neukuate misoku yabu yonsu mu dina dianyi. Pawikala mumane kubakuata, ubandamine too ne ku dituku didibu mua kulumbulula.

11Kadi bua bantu bikale mua kukandamena mu matunga anudi bamane kukuata, ubashipe, kubafuidi luse nansha, upawishe bintu biabu.

12Pantshidi ne muoyi ne bumfumu ne bukalenga, ndi mumane kuditshipa bua kubasombuela, ke malu andi ne bua kukumbaja!

13Oloferne, udimuke bua kulenguludi bualu nansha bumue bundi musue, kadi ukumbaje malu aa, kunengakanyi nansha, bualu ndi mukalenga webe.

14Oloferne upatuka kuvua mfumuende, kubikilaye banene bonsu ba bukalenga, bamfumu ba bena myita ne balombodi babu.

15Bilondeshile muvua mikenji ya mu bukalenga, kusangishaye bena myita balume bavua bamana kulongolola bua kuluangana myita binunu lukama ne makumi abidi, bavua benda ku makasa, ne babandi ba pa tubalu binunu dikumi ne bibidi.

16Uvua mulongolole tshiluilu etshi tshinene, mu bisumbu mu bisumbu bua bamone mua kuluangana myita bimpe.

17Uvua mupete nyama ya tumelu ya bungi, ne nyama ya mpunde milume ne mikaji, bua kuambula mabuki, kabidi uvua ne mikoku bungi kabuyi kubala, nyama ya ngombe ne mbuji bua kumona mua kupeta kanyinyi ka kudia.

18Bavua balongoluela bena myita bonsu biakudia bivule. Bavua babafute mpawungi ne nkanu ya tshiamu tshitoke tshia mushinga mukole bia bungi, bivua bifumine mu mushete wa mbulamatadi.

19Oloferne kuyaye ne tshiluilu etshi tshionsu bua kulongolola difika dia Nebukadnesare ne bua kufikisha matempu a myita ne babandi ba pa tubalu ne bamanyi bapiluke ba myita badi benda ku makasa mu matunga a kudi diba dibuelela.

20Bisumbu bikuabu bia bena myita, bungi kabuyi kubala, bu mpasu nansha lusenga lua mu tshipela kubatua mu nyima.

21Kumukabu mu Ninive, kufikabu matuku asatu mu mpata wa Bektilete. Bamana kumuka aku, kuyabu kuasa mitanda pepi ne mukuna wa ku mutu udi mu ditunga dia Silisiya wa ku mutu.

22Oloferne ne tshiluilu tshiende tshionsu, pamue ne bena myita badi benda ku makasa, ne babandi ba pa tubalu ne matempu a myita kukuataye ditunga dia ku mukuna.

23Kushipaye bena Pude ne bena Lude, kabidi kunyenga bisamba bionsu bia bena Rasise ne bia bena Ishemayele bavua mu tshipela kuinshi kua ditunga dia Keleyone.

24Kusabukaye Perate, kupitshilaye mu ditunga dia Mezopotamiya, kubutula bimenga bionsu bivua bibaka ne bimana bikolesha, biangatshile ku musulu wa Abore too ne ku mayi manene.

25Kukuataye ditunga dia Silisiya, kushipa bonsu bavua bakandamana momu. Pashishe kuyaye kuinshi too ne ku buloba bua bena Yafete budi butangilangane ne buloba bua bena Arabe.

26Kuelaye bonsu bena tshisamba tshia Madyane munkatshi. Kuoshaye misoku yabu, kupawula kabidi ne bimuna biabu bionsu.

27Kupitshilaye mu mpata ya bena Damase mu muvu wa mashika, tshikondu tshia kunowa ntete ya bukula. Kuoshaye madimi abu onsu, kubutula mikoku ne ngombe, kupawula bimenga, kunyangakaja misoku, kushipa bansonga bonsu.

28Bantu bonsu ba ku Mayi manene a pankatshi, kukuatshika bowa ne luzakalu. Ke bantu ba mu tshimenga tshia Sure, Okina, Yamniya, Asdode ne Askalone kupeta bowa bupite.