1Muntu udi unanga muanende wa balume,
udi umutuuta lukodi misangu ne misangu.
Pashishe muanende wa balume ewu neamusankishe.
2Muntu udi ukolesha muanende bimpe,
udi upetela disanka kudi muana ewu.
Munkatshi mua bantu badi bamumanya neikale ne lumu bua muana ewu.
3Muntu udi ulongesha muanende wa balume bimpe,
baluishi bende nebamumvuile mukawu,
kadi neikale ne disanka kumpala kua balunda bende.
4Nansha tatuende wa muana mufue,
kena bu udi mufue,
bualu mmushiye muntu udi mufuanangane nende.
5Pavua tatu ne muoyi,
uvua ne disanka, pavuaye umona muanende,
nansha dituku dia lufu luende kena mua kunyingalala to.
6Bualu mmushiye muntu udi mua kumusombuela kudi baluishi bende,
ne muntu udi mua kupingajila balunda bende bilenga bivuabu bamuenzela.
7Muntu udi wengeleka muanende wa balume, udi umuenzela bibi.
Padi muana udila kakese, tatu udi uzakala.
8Nyama wa kabalu kayi mutekesha, kabena mua kumubanda,
muana wa balume muengeleka, mbikole mua kumubela kabidi.
9Paudi wengeleka muana wa balume, neakuenzele malu mabi.
Wewe munaye nende neakubungamije.
10Wewe mukenye nende menu, neakukengeshe,
ku ndekelu neudie dinu.
11Kumulekedi wenza tshidiye musue patshidiye muana,
umunyoke bua bilema biende.
12Biangatshile patshidiye muana, umuenzeje, akutumikile,
umunyoke patshidiye muana,
tshianana neikale muena tshitunu, neakutombokele, Munyingalale.
13Kolesha muanebe wa balume bimpe,
umulongeshe bua kakufuishi bundu!
Bukole bua mubidi14Mbimpe kuikala muntu mupele wa mubidi mukole ne dikanda,
pa mutu pa kuikala muena biuma udi ukengakana ne mabeedi!
15Bukole bua mubidi mbupite mpawungi yonsu ya mu buloba bujima,
ke mudi muoyi mukole mupite biuma bionsu.
16Kakuena bubanji budi bupite bukole bua mubidi.
Kakuena tshintu tshia mushinga mukole tshidi tshipite disanka didi mu muoyi.
17Mbimpe kufua pa mutu pa kukenga,
mbimpe kuya mu dikisha dia kashidi pa mutu pa kushala
ne mabeedi adi kaayi ajika!
18Biakudia bidibu bapesha mubeedi katshiyi ne nzala ya kubidia.
bidi bu biakudia bidibu balambula nwidie.
19Biakudia bilambula nwidie bidi biambuluisha ku tshinyi?
— Kabiena biambuluisha to.
Bualu kena ubidia nansha umvua mupuya wabi!
Ke mudi muntu udi Maweja-Nangila ukengesha nanku.
20Udi utangila biakudia ne mesu, upuyakana,
bu mudi muntu mutungu wenza padiye upukila nsongakaji utshidi kamama.
Disanka(Mb 11.9-10)21Lekela kubungama.
Kukebi malu adi akupampakaja.
22Disanka ke muoyi wa muntu.
Disanka didi nadi muntu didi dilunguluja matuku ende a panu.
23Sanguluka, kolesha muoyi,
lekela kubungama.
Dibungama ndibutule bantu ba bungi,
kadiena dipetesha muntu kantu.
24Lubabu ne tshiji bidi bikepesha matuku a muntu,
kusumpakana ne muoyi kudi kukulakajija muntu lukasa.
25Muntu udi ne disanka udi umvua nzala,
udi utabalela biakudia biende.
Who We AreWhat We EelieveWhat We Do
2025 by iamachristian.org,Inc All rights reserved.
