Didimanyisha Diumvuija - MUKANDA WA MYIDI MUKULU（TSH96）
Diumvuija— Mukanda wa Didimanyisha dia Yezu Kristu mmukanda wa ndekelu wa Mikanda ya tshijila. Udi utumanyisha mudi Yezu mumane kutshimuna bubi buonsu, biangatshile ku lufu ne dibiika biende. Mufundi ke Yowanane, udi utulondela bi vua Yezu mumumanyishe (1.1) mukana mua mutumibue wende; ne bivuaye mumone pavua Mueyelu wa Tshijila mumuvulule (1.10). Diba adi Yowanane uvua mu tshidila tshia Patmose, tshidi luseke ludi diba dibuelela lua Aziya mukese (ke tshitupa tshia Aziya tshidi lelu mu ditunga dia Turkiya). Bavua batume Yowanane mu tshidila atshi bua kumunyoka, bualu uvua ulongesha Lumu lua Disanka (1.9). Mu tshikondu atshi Mukalenga wa bakalenga wa bena Rome ukavua mubange kukengesha Bisumbu bia bena ditaba. Mukanda ewu mmutumina Bisumbu muanda mutekete bia bena ditaba bia mu Aziya Mukese, bi vua mu buloba butudi tusangana lelu tshisabu tshia tshimenga tshia Izmir (Smirna) mu ditunga dia Turkiya.Badi bakengesha bena Kristu, bualu badi bitaba Mfumu umue epele, Yezu Kristu. Mu tshikondu tshikole atshi, Yowanane udi ubafundila mukanda bua kukolesha ditaba ne ditekemena diabu. Udi ufunda bi vua Mvidi Mukulu mumuleje, ubiumvuija ne bimfuanyi bivua bantu bavua bamanye Mikanda ya tshijila ya mu Ndondu wa kale mua kumvua lukasa. Kadi bantu bakuabu badi babimona bu malu masokome, adibu kabayi bumvue bimpe. Malu adi Yowanane umona adi mashilangane, kadi malongesha adi munda muawu adi a mushindu umue. Bushuwa mu mukanda ewu mudi tualu tukuabu tudi bantu badi bamanye bimpe Mikanda ya tshijila bumvuija mishindu mishilangane. Kadi bualu bunene budi mukanda utulongesha budi amu bumue: nansha bubi bumueneke bu butshikale ne bukole, bukebe kutshimuna panu, kadi Yezu Kristu, Mfumu umue epele, mmumane kubutshimuna. Dituku dikuabu ditshimuna diende adi nedimueneke patoke.Mu ntuadijilu wa mukanda wende, Yowanane udi udileja bu muambi wa Kristu mubiike ku lufu (1.1-8).— Mu tshitupa tshia kumpala (1.9—3.22) udi utumanyisha mushindu uvuaye mumone malu a kumpala avuabu bamuleje, kabidi muvua Yezu diba adi mumutumine diyi dia Itufundila Bisumbu bia bena ditaba muanda mutekete bia mu Aziya mukese mikanda.— Pashishe badi bambula Yowanane, baya nende mu diulu. Ke muaba udiye umona malu mashilangane: bena mu diulu badi bakukuila Mvidi Mukulu ne Yezu Kristu (4-5); mukanda ne bitampi biawu muanda mutekete (6.1—8.1); mpungi muanda mutekete (8.2—11.19); nyoka wa tshidika ne nyama ibidi (12.1—13.18); Muana wa mukoku ne bantu 144.000 bavuabu bapikule; batumibue badi bajadika ne: nebalumbuluishe bantu (14.1-20); makopu muanda mutekete a tshiiji tshia Mvidi Mukulu (15.1—16.21); kabutu ka Babilone; badi batshimuna nyama, muambi wa dishima, ne diabolu (17.1—20.10); diulu dipiadipia, buloba bupiabupia, Yerushalayime mupiamupia (21.1—22.5). Ku ndekelu kua mukanda wende, Yowanane udi ubela kabidi babadi bikole, ubavuluija dilaya dia Kristu Mubiike ku lufu dia ne: “Ndi mfika amu mpindiewu” (22.6-21).Bua tumone mua kumvua bimpe mukanda ewu, katukebi bua utumanyishe malu atshidi kumpala. Mufundi kena musue kukuatshisha bena ditaba buowa nansha. Udi ujinga kubakolesha ku muoyi mu tshikondu tshikole tshia makenga. Malu adi mu mukanda ewu adi atuleja bimpe mudimu wa Kristu, ne bipeta bia ku Dibiika diende, bitukadi nabi lelu patudi tumuitaba, kabidi bitudi ne bua kupeta mu bujima buabi matuku adi kumpala.
