Sira 49 - MUKANDA WA MYIDI MUKULU（TSH96）

Yoshiya(2 Bak 22.1—23.30; Yirm 22.15)

1Badi bavuluka mukalenga Yoshiya ne disanka

bu mudibu bavuluka manananshi a mupuya mukole,

avuabu benza kudi muenji wa manananshi.

Kutela dina diende,

kudi bu mudi buitshi mukana mua bantu bonsu,

kudi bu mudi misambu idi bantu bimba mu didia dia tshibilu.

2Yoshiya uvua ulonda njila mululame,

uvua ukudimuna nsombelu ya bantu,

uvua ushipa ditendelela dia nwidie ya patupu mu ditunga.

3Muoyi wende uvua amu kudi Maweja-Nangila.

Uvua ukolesha dilongesha dilelela dia malu a Mvidi Mukulu,

mu tshikondu tshivua bantu ne buenzayi.

Bakalenga ba ndekelu ba Yuda, muambi Yirmeya

4Kumusha Davide, Izkiya ne Yoshiya bavua benza bimpe,

bakalenga bonsu bavua benza bibi,

babenga mikenji ya Mvidi Mukulu Muena Kulu.

Bakalenga ba bena Yuda kubutuka kabayi bafunda malu abu mu mikanda

5Bualu Mvidi Mukulu uvua mufile bukole buabu kudi bantu bakuabu,

kabidi ne lumu luabu kudi bantu benyi.

6Bantu benyi aba kuosha tshimenga tshia tshijila,

tshivua Mvidi Mukulu musungule, kushalatshi munda mutupu,

amu muvua Yirmeya mudianze kubambila.

7Kadi Yirmeya uvuabu bakengesha,

Mvidi Mukulu kumujidila muambi utshivua munda mua mamuende,

bua kujula ne miji, kubumbula ne kubutula,

bua kuibaka tshiakabidi ne kukunununa.

Yezekiyele

8Yezekiyele kumona butumbi bua Mvidi Mukulu buvuaye mumuleje,

pa ditempu dia bakerubine.

9Uvua muvuluke malu avua menzekela Yobe,

pavuaye ulonda njila muakane.

Bambi dikumi ne babidi

10Kadi mifuba ya bambi dikumi ne babidi,

nansha yoyi mu lukita, isase yela ntonga,

bualu bavua bakolesha tshisamba tshia Yakobe ku muoyi,

bavua batshisungidila bua tshilamate Mvidi Mukulu, tshitekemena kudiye.

Zerubabele ne Yeshuwa

11Tudi mua kutumbisha Zerubabele mushindu kaayi?

Udi bu tshitampi tshitua ku tshianza tshia balume tshia Mvidi Mukulu.

12Yeye ne Yeshuwa, muana wa Yosadake,

bavua bibake tshiakabidi nzubu wa Mvidi Mukulu,

balongolola muaba wa tshijila,

udibu ne bua kutumbishila Maweja-Nangila kashidi.

Nehemya(Neh 1—7)

13Tuvuluke kabidi Nehemya bikole.

Yeye ke uvua muasulule bimana bia tshimenga tshietu bivua biupuka, kuelulula biibi,

kubikangaye ne mabaya makole, kuibakulula kabidi ne nzubu yetu mene.

Bakuabu bankambua

14Munkatshi mua bantu bonsu bavua Mvidi Mukulu mufuke,

kakuena nansha muntu mufuana Enoke,

bualu yeye bakamuambula pa buloba.

15Kakuena muntu nansha umue udi mufuanangane ne Yozefe,

uvua mfumu wa bana babu, mulami wa tshisamba tshiende.

Bakanemeka ne mifuba yende mene.

16Seme ne Sete bavua ne lumu munkatshi mua bantu bonsu.

Kadi Adame udi ku mutu kua bionsu bivua Mvidi Mukulu mufuke.