Misambu 69 - MUKANDA WA MYIDI MUKULU（TSH96）

Ndi mu dikenga, ungambuluishe

1Musambu wa mu mukanda wa mulombodi wa bena misambu ne wa mu mukanda wa misambu ya Davide. Wa kuimba ne nzenze.

2Mvidi Mukulu wanyi, unsungidile!

Mayi mmankuate ne mu nshingu.

3Ndi mudine mu lunteka ludi kaluyi ne muaba wa kuimana.

Ndi munkatshi mua dilembua, mayi ampuekesha.

4Ndi mupungile ne diela mbila, muminu unsama.

Mvidi Mukulu wanyi, mvua mukutangile, mutekemene kuudi,

mesu kunkunza kunzuu!

5Badi bankina kapayi bualu, mbapite nsuki ya ku mutu bungi.

Badi banshiminyina malu, badi ne dikanda, bakeba kunshipa.

Ndi ne bua kupingaja tshindi tshiyi muibe.

6Mvidi Mukulu wanyi, udi mumanye bupote buanyi,

mutandule malu mabi onsu amvua muenze.

7Maweja-Nangila, Mvidi Mukulu wa bukole buonsu,

kufuishi bantu badi batekemena kuudi bundu.

Mvidi Mukulu wa Izrayele, kuyi ungambuluisha,

bantu bonsu aba nebakuangate bibi.

8Badi bampenda, bangela bibingu,

bualu ndi muntu webe!

9Nkadi muenyi munkatshi mua bena diku dietu,

nansha bana ba tatu mene kabatshiena bammanye.

10Dinanga dindi nadi bua nzubu webe,

didi dingosha munda bu kapia.

Badi bakupenda, mbampende.

11Mvua nnyingalala, njila biakudia bobu kunseka!

12Mvua muvuale bilamba bia madilu,

bobu kunsaka mu misambu.

13Miaba idi bantu basangile badi bantela,

banu ba maluvu badi banseka, bangimba mu misambu.

14Kadi meme, Maweja-Nangila, ndi amu nkutendelela.

Ungambuluishe tshikondu tshiudi musungule.

Mvidi Mukulu wanyi, bu muudi unnanga bikole,

ungitabe, unsungidile.

15Umpatule mu lunteka lundi ndina,

unsungidile kudi badi bankina,

unsabule mu dilembua.

16Muenji kaumpuekeshi, mavuala kaanjimiji.

Lukita luanyi kalushadi muinshi mua mayi.

17Maweja-Nangila, ungitabe, bualu udi munnange.

Amu wewe udi mua kungambuluisha.

Bu muudi ne luse luvule, untangile.

18Ndi muntu webe, kunsokomi.

Ndi mu dikenga dinene, ungitabe lukasa.

19Luakunu, ungambuluishe,

unsungidile kudi baluishi banyi.

20Udi mumanye mudibu bampenda,

bamfuisha bundu, bampetula;

udi mumone kumpala kuanyi baluishi banyi bonsu.

21Bipendu mbinsunsule muoyi, nkadi mushikile.

Mvua mukebe uvua mua kumfuila luse, kadi tshiena mumupete.

Mvua muindile uvua mua kunsamba, tshiena mumumone.

22Baluishi banyi bavua bakisa biakudia bianyi,

bampesha maluvu a buanji, pamvua ne nyota.

23Nanku basombe ne benyi babu ku mesa, babutuke.

Badie biakudia bilunga ne buanga mu bibilu biabu bia tshijila, bafue!

24Tshibua tshibatue ku mesu, kabamonyi nganda!

Ubatshibule nyima kashidi.

25Ubapumuine tshiji tshiebe,

kadilu katshi kakole kaboshe.

26Nzubu yabu ibutuke,

bonsu badi mu ntenta yabu babashipe.

27Bualu badi balondakaja muntu uudi mumane kunyoka,

batumbula mputa ya baudi mumane kukengesha.

28Badika malu mabi abu onsu,

kubafuidi luse ku kalu nansha kamue.

29Ukupule mena abu mu mukanda wa badi ne muoyi.

Kubafundi pamue ne bantu bebe.

30Mvidi Mukulu wanyi, ndi mupele, kabidi mubedi,

ungambuluishe, unsungidile.

31Nenkuimbile misambu, nkuela tuasakidila,

ntumbishe dina diebe.

32Maweja-Nangila, ke bidi bikuenza disanka,

mbipite ngombe milume ne mikaji indi nkulambula.

33Bantu bapuekele nebamone bionsu ebi, nebasanke.

“Nuenu bonsu badi bakeba Mvidi Mukulu, nulale panu nuboboke.

34Bualu Mvidi Mukulu udi uteleja bena dikenga,

kena ulengulula bantu bende badi mu lukanu.

35Diulu ne buloba, tumbishayi Mvidi Mukulu.

Mayi manene ne bionsu bidimu, musamunayi.

36Bualu Mvidi Mukulu neapandishe Siyone,

neibakulule bimenga bia Yuda.

Bantu bende nebapinganemu, basombemu tshiakabidi.

37Ndelanganyi ya bantu bende, neipiane

ditunga diabu edi.

Bonsu badi bananga Maweja-Nangila, nebasombemu.”