Sira 19 - MUKANDA WA MYIDI MUKULU（TSH96）

1Muena mudimu udi unua maluvu kena mua kunema to.

Muntu udi upepeja makasa makese adiye upeta,

ku kakese ku kakese udi udivuija mupele.

2Bunuavi bua maluvu ne dibuelela dia bakaji mu nzubu,

bidi bitombola nansha bantu ba lungenyi.

Muntu udi uyila amu kuyila bakaji bena buendenda,

ku kakese ku kakese udi upeta dikamakama dipite.

3Dikamakama diende nedimufikishe ku lufu,

neabole, bamudie kudi misanda.

Buakulavi budi ne njiwu

4Muntu udi witaba amu lukasa bidibu bamuambila,

kena ne lungenyi luvule.

Yonsu udi wenza nanku,

udi udienzela yeye nkayende bibi.

5Muntu udi usanka bua bualu bubi,

bonsu nebamudiule.

6Yonsu udi ne tshiakulakula,

kena ne lungenyi luvule.

7Lekela kuidikija muntu pa menu,

nanku kuena mua kupeta tshilumbu.

8Kulondi bualu bua mulunda webe,

nansha bua muluishi webe, nansha bua muntu kampanda.

Kumanyishi bantu malu ende,

pa kumusha adi mua kukupisha paudi upuwa.

9Bualu muena bualu abu udi mua kumvua, kukudiwulaye,

dituku dikuabu neakujudile lukuna.

10Pawikala mumvue bualu kampanda, ubulamine munda,

ukoleshe muoyi!

Kuena utunduka to!

11Bua kulama bualu munda, muntu mutshimbakane udi ukengakana,

bu mudi mukaji ukengakana pa kulela.

12Bu mudi muketa muasa mu tshibelu usama muntu,

ke mudi bualu busama muntu mutshimbakane munda.

Kukunkonona bualu buudi mumvue bamba

13Paudi mumvue bajana mulunda webe,

anji ebeja mulunda webe,

bumue kena mua kuikala muenze tshilema.

Pikalaye mutshienze, bumue kena mua kutshienza kabidi to.

14Pikalabu basonguela mutumba nebe ne: udi ujanangana,

umuebeje, bumue kena muamba bualu bubi to.

Pikalaye mubuambe, kakubuamba kabidi to.

15Ebeja mulunda webe, bualu bantu badi bashiminyinangana malu,

kuitabi bionsu bidi bamue bantu bakuambila.

16Miaku mibi idi mua kupatuka, muntu kayi ne meji mabi.

Udi kayi muanji kuakula meyi mabi nanku nnganyi?

17Ebeja mutumba nebe bualu bangabanga ne wewe kumutandisha,

wewe wenza tshidi mikenji ya Muena Kulu yamba.

Meji mimpe ne meji mabi

20Kutshina Maweja-Nangila ke kuikala ne meji menemene.

Muntu udi ne meji udi ulonda mikenji ya Maweja-Nangila.

22Kuenza bualu bubi ki mmeji to.

Kulonda mubelu wa benji ba malu mabi, ki ndungenyi to.

23Kudi ditalama didi dibipila Mvidi Mukulu bikole.

Muntu udi mubule meji, udi wenza malu bu muntu mutshimbakane.

24Mbimpe kuikala muntu udi ne lungenyi, kadi utshina Maweja-Nangila,

pa mutu pa kuikala muntu udi ne lungenyi lua bungi

kadi ushipa mikenji ya Muena Kulu.

25Kudi ditalama didi difikisha muntu ku bubi menemene.

Bamue bantu badi bashimangana bulunda,

bua kupeta tshidibu basue.

26Kudi bantu benda biname bu badi ne dibungama,

kadi badi munda muwule ne budimu.

27Badi benda biname bu bantu badi kabayi bumvue.

Kadi padi bantu kabayi babatalamukila,

badi babapita bukole.

28Bamue bantu badi babenga kuenza malu mabi,

amu bualu kabena ne bukole.

Kadi padibu bapeta mushindu, badi benzelamu.

29Badi batangila mpala wa muntu, bua kumanya muende mudiye.

Bidi bimpe kumutangila mu mpala menemene,

bua kushindika ne udi lungenyi.

30Mvuadilu wa muntu, tuseku tuende,

ne luendu luende, bidi bileja mudiye.