Sira (32) - MUKANDA WA MYIDI MUKULU（TSH96）

Muntu nebe ne ditendelela

1Muntu udi ulonda mikenji ya Mvidi Mukulu,

udi bu muntu udi ulambula milambu ya bungi.

2Kulonda mikenji ya Maweja-Nangila

kudi bu kulambula mulambu wa ditua ndondu.

3Kupa muntu tshintu,

kudi bu kulambula mulambu wa bia pa madimi.

4Kuambuluisha bapele kudi bu kulambula Mvidi Mukulu

mulambu wa kumuela nawu tuasakidila.

5Kubenga bubi kudi kusankisha Maweja-Nangila,

kuepela bubi kudi bu kulambula mulambu wa kudikobolola nawu.

6Kufiki kumpala kua Mvidi Mukulu bianza bitupu.

7Bualu kulambula milambu yonsu eyi, nkulonda mikenji ya Maweja-Nangila.

8Mulambu wa muntu muakane udi muimpe,

mupuya wawu udi ufika kudi Muena Kulu.

9Mvidi Mukulu udi wanyisha mulambu wa muntu muakane,

uvuluka bidibu buosha pa tshilambuilu.

10Ikala muntu wa kalolu paudi unemeka Maweja-Nangila;

umulambula bintu bia tshianyi bia mu budimi buebe,

kumbushi bia ku biudi umupesha to.

11Ikala ne disanka pa kufila milambu yebe yonsu.

Fila kabidi tshia dikumi amu ne disanka.

12Pesha Muena Kulu bintu bilondeshile mudiye mukupeshebi.

Umupeshe ne disanka bilondeshile biudi nabi.

13Bualu Maweja-Nangila neakupingajilebi,

neakupe bintu bipite biebe bia kumpala misangu muanda mutekete.

Mukoshi wa nsambu bilenga

14Kuena mua kubuejila Mvidi Mukulu,

kena wanyisha mabuejila ebe.

15Kutekemenyi mulambu mubi, wa bintu biiba.

Bualu Maweja-Nangila udi ukosa nsambu kayi kansungansunga.

16Kena utua kudi bantu banene bua kukengesha bapele.

Udi uteleja dilomba dia muntu udibu bakengesha,

17kena ulengulula muana nshiya udi umutendekena,

nansha mikemu ya mukaji mukamba.

18Udi umona binsonji bia mukamba bidi bipueka pa matama ende.

19Udi umvua miadi yende,

padiye ufunda muntu udi umudidisha.

20Maweja-Nangila udi wanyisha muntu udi wambuluisha bakuabu,

dilomba diende nedifike too ne mu mavuba.

21Dilomba dia muntu mupuekele didi difika mu mavuba,

ditungunuka ne kudi Maweja-Nangila, kadiena dimana,

ndimane kumvuika, kadiyi dianji kufika kudi Muena Kulu.

22Maweja-Nangila udi ubingisha bantu bakane,

kena unengakana, kakuikala ne lutulu kudi badi bashipangana,

ne badi kabayi ne luse, too ne pababutulaye bonsu.

23Neanyoke bisamba bia benyi,

neabutule bonsu badi baditambisha,

neajikije bumfumu bua bantu babi.

24Neapingajile muntu yonsu malu avuaye muenze,

neafute muntu yonsu bilondeshile meji avuaye muele.

25Nealumbuluishe tshilumbu tshia bantu bende.

Neabasankishe bualu udi ne luse.

26Bu mudi bantu banyishe mvula diba dia munanga,

ke mudi luse lua Mvidi Mukulu lusankisha bantu diba dia dikenga.