Tshimuangi 9 - MUKANDA WA MYIDI MUKULU（TSH96）

Dikenga ditanu: disama dia tshiambu dia bimuna

1Maweja-Nangila kuambila Moshe ne:

— Uye kudi mukalenga wa bena Ejipitu, umuambile ne: “Maweja-Nangila, Mvidi Mukulu wa bena Ebrewu, udi wamba ne: Lekela bantu banyi baye kuntendelela.

2Wewe mubenge bua kubatekela, wewe mubakandike amu kubakandika,

3nenkunyoke bikole, mbutule bimuna biebe bionsu ne disama dikole dia tshiambu. Mpunde, tubalu, tumelu, ngombe, mikoku ne mbuji, bionsu nebibutuke.

4Kadi nensunguluje bimuna bia bena Izrayele ne bia bena Ejipitu. Tshimuna tshia bena Izrayele katshiakufua nansha tshimue.”

5Maweja-Nangila kujadikila Moshe kabidi ne:

— Nengenze tshishima etshi mu Ejipitu malaba.

6Butshia dinda, Maweja-Nangila kuenza muvuaye muambe. Bimuna bia bena Ejipitu kufua bionsu. Kadi tshimuna tshia bena Izrayele katshiena tshifua nansha tshimue.

7Mukalenga wa bena Ejipitu kukonka bantu bende bua kujadika tshivua tshienzeke. Kumuambilabu ne: bimuna bia bena Izrayele kabiena bifua nansha tshimue. Kadi mukalenga wa bena Ejipitu kena mutekete bena Izrayele to. Uvua anu ne tshitunu.

Dikenga disambombu: maputa

8Maweja-Nangila kuambila Moshe ne Arone ne:

— Nuboye butu bua muiku mu bianza. Moshe neele butu abu mulu, mukalenga wa bena Ejipitu mutangile.

9Butu abu nebuandamuke lupuishi mu ditunga dijima dia Ejipitu. Lupuishi alu, neluenzeje maputa apatuka tufina pambidi pa bantu ne pa nyama.

10Moshe ne Arone kuboya butu bua muiku, kuya nabu kumpala kua mukalenga wa bena Ejipitu. Moshe kuela butu abu mulu. Kuenzabu maputa apatuka tufina pambidi pa bantu ne pa nyama.

11Bena majimbu ba bena Ejipitu kupanga mushindu wa kumonangana ne Moshe, bualu bavua ne maputa bu bena Ejipitu bonsu.

12Mukalenga wa bena Ejipitu kubenga diyi dia Moshe ne Arone, bualu Maweja-Nangila uvua mumupeshe muoyi wa tshitunu nuwuaye mudianjile kuambila Moshe.

Dikenga dia muanda mutekete: mabue a mvula

13Maweja-Nangila kuambila Moshe ne:

— Malaba dinda, uye kumonangana ne mukalenga wa bena Ejipitu, umuambile ne: “Maweja-Nangila Mvidi Mukulu wa bena Ebrewu udi wamba ne: ‘Lekela bantu banyi baye kuntendelela.

14Mpindiewu ndi mujadike bua kukutumina makenga a mishindu yonsu, wewe ne balombodi ba bukalenga kabidi ne bantu bebe bonsu, bua ujadike ne: pa buloba bujima kakuena mukuabu, amu meme!

15Bu meme mukutumine wewe ne bantu bebe disama dikole dia tshiambu, bonsu nuvua mua kuikala bamane kubutuka.

16Kadi ndi mukushiye ne muoyi, bua ujadike bukole buanyi, kabidi bua lumu luanyi lumanyike pa buloba bujima.

17Kadi utshidi anu uditambisha, ubenga mua kutekela bantu banyi.

18Nanku, malaba pa diba edi, nendokeshe mvula mukole wa mabue, udi kayi muanji kuloka mu ditunga dijima dia Ejipitu too ne mpindiewu.’

19Nanku tuma diyi lukasa bua bantu bumushe bimuna biabu ne bintu biabu bionsu bidi mu mpata, bualu bantu ne bintu bikale mu mpata nebifue ku mabue a mvula.”

20Balombodi bakuabu ba mu bukalenga kuangata bualu abu ne mushinga, kubueja bapika babu ne bimuna biabu bionsu mu nzubu.

21Kadi balombodi bakuabu kabavua bangata miaku ya Maweja-Nangila ne mushinga. Bavua bashiya bena mudimu babu ne bimuna biabu mu mpata.

22Ke Maweja-Nangila kuambila Moshe ne:

— Olola diboku mulu bua mvula mukole wa mabue aloke, alokele bena ditunga dia Ejipitu, bimuna biabu ne bintu bionsu bidi mu madimi.

23Moshe kuela dikombu mulu. Maweja-Nangila kulokesha mvula mukole wa makubakuba ne wa mabue.

24Mvula mukole wa mabue ne makubakuba wa nanku katshia kavua muanji kuloka mu ditunga dia Ejipitu.

25Mabue a mvula awu kushipa bantu ne bimuna bia mu ditunga dia Ejipitu. Kunyangakajaye kabidi bikunyibua bivua mu madimi ne mitshi yonsu.

26Kadi kavua muloke mu Ngoshene to, bualu mmuaba uvua bena Izrayele basombe.

27Mukalenga wa bena Ejipitu kubikidisha Moshe ne Arone, kubambila ne:

— Maweja-Nangila mmuenze amu bimpe, kena ne bualu to. Meme ne bantu banyi tudi benze bibi.

28Numulombe: alekele kulokesha mvula wa makubakuba ne mabue, bualu mbimane kuntonda. Nennulekele, nuye. Tshiena nnulama kabidi to.

29Moshe kumuandamuna ne:

— Pangumuka mu musoku emu, nengele bianza mulu kudi Maweja-Nangila bua mvula wa makubakuba ne mabue akamuke. Nanku neujadike ne: buloba buonsu mbua Maweja-Nangila.

30Kadi ndi mumanye ne: wewe ne balombodi ba mu bukalenga buebe, kanuena banji kutshina Maweja-Nangila to.

31Bikunyibua bikuabu bivua pa madimi kunyanguka bualu bikavua bimane kupatula miepu, biela ne bilongu.

32Kadi bikunyibua bikuabu kabivua binyanguke, bualu kabivua bianji kutoloka to.

33Moshe kumuka kudi mukalenga wa bena Ejipitu, kupatuka mu musoku. Kuelaye bianza mulu kudi Maweja-Nangila. Mvula kukamuka, makubakuba ne mabue a mvula kujika.

34Mukalenga wa bena Ejipitu umona ne: mvula wakamuki, kabidi makubakuba ne mabue a mvula biajiki, kutungunukaye amu ne tshilema tshiende. Yeye ne balombodi ba mu bukalenga buende kuenza kabidi amu tshitunu.

35Mukalenga wa bena Ejipitu kena mulekele bena Izrayele to, bualu uvua ne tshitunu bu muvua Maweja-Nangila mudianjile kuambila Moshe.