Estere ngreke C - MUKANDA WA MYIDI MUKULU（TSH96）

Mordekayi udi utendelela Mvidi Mukulu 1 Mordekayi uvua utendelela Maweja-Nangila, uvuluka bionsu bivua Maweja-Nangila mumane kumuenzela. Uvua wamba ne: 2 “Maweja-Nangila! Maweja-Nangila, wewe udi mukalenga wa bukole buonsu. Bualu bionsu bidi ku bumfumu buebe, nenku paudi musue kupandisha bena Izrayele kakuena muntu udi mua kukukandika. 3 Bualu wewe ke udi mufuke diulu ne buloba ne bia dikema bionsu bidi panu. 4 Wewe udi mfumu wa bionsu, kakuena munga muntu udi mua kukutonuena mesu. 5 Wewe udi mumanye bionsu. Pandi mubenge bua kuimana kumpala kua Amane muena ditambisha, ki mbua kapeja, ki mbua kukeba lumu ne butumbi. 6 Kadi padi bia nanku bienzeka bua kusungidila bena Izrayele, ndi ne bua kupukila nansha makasa a muntu awu. 7 Kadi tshiena mua kuenza nanku, bualu tshiena mua kunemeka muntu mushindu undi mua kunemeka Mvidi Mukulu. Tshiena musue kukukuila muntu mukuabu, pa mutu pa Mvidi Mukulu. Atshi ki nkuditambisha nansha. 8 “Kadi mpindiewu Maweja-Nangila, wewe udi Mvidi Mukulu kabidi mukalenga, wewe udi Mvidi Mukulu wa Abrahame, anyisha bua bantu bebe bapande, bualu baluishi betu badi batutentekela bua kutubutula, badi bela meji a kubutula bantu bebe badi bakulamata. 9 Udi mutusungule kale, bua tuikale tshisamba tshiebe, tshiuvua mupikule mu Ejipitu, kutulekedi mpindiewu. 10 Nenku anyisha dilomba dianyi, ambuluisha bantu bebe badi bakulamate, ukudimune dibungama dietu dishale disanka bua tushale ne muoyi, tuimbe misambu, tukutumbisha. Maweja-Nangila, bantu badi bakupa lumu kababutula.” 11 Bena Izrayele bonsu bavua batendelela Maweja-Nangila, bakeba diambuluisha, bela mbila mikole, bualu bavua bamona lufu lukeba kubakuata.Estere udi utendelela 12 Mukalenga mukaji Estere kudiela mu njiwu ya lufu, ukeba diambuluisha kudi Maweja-Nangila. 13 Kuvulaye bilamba biende bia bu mukalenga mukaji, kuvuala bilamba bia madilu. Kudilabaye butu mu mutu ne lupuishi, pa mutu pa manananshi a mushinga mukole. Katshivua ulongolola mubidi wende. Pa mutu pa kuvuala bilamba bimpe, uvua ulekela nsuki kayiyi miela tshisaku. 14 Pashishe uvua utendelela Maweja-Nangila Mvidi Mukulu wa Izrayele wamba ne:“Maweja-Nangila Mvidi Mukulu wanyi, Mukalenga wa tshisamba tshianyi, wewe nkayebe ke Maweja-Nangila! Ungambuluishe, ndi nkayanyi, tshiena ne muntu mukuabu udi mua kungambuluisha, amu wewe, 15 bualu ndi mua kudiela mu njiwu ya lufu. 16 Meme katshia bandela, bavua bandongesha mu diku dianyi ne: wewe Maweja-Nangila ke uvua musungule bankambua betu munkatshi mua bantu bonsu ku kale, uvua kabidi musungule tshisamba tshia bena Izrayele munkatshi mua bisamba bikuabu bionsu. Wewe kushindika bua bashale bebe kashidi. Wewe kukumbaja malaya onsu auvua mubalaye. 17 Kadi tudi bamane kunyanga mikenji yebe. Nenku udi mudifile mu bianza bia baluishi betu. 18 Bualu tuvua batendelele nwidie yabu. Maweja-Nangila udi mutunyoke amu pa bualu. 19 Kadi baluishi betu kabena bapita kusanka, amu bua kuatutatshisha bikole. Kadi bavua batua ndondu ne nwidie yabu, 20 bakeba kukandika bantu bua kabalami mikenji yebe. Badi basue kushidisha bantu badi mu dina diebe. Badi bapuwisha badi bakutua makumbu. Badi basue kubutula nzubu webe wa butumbi ne kunyanga tshilambuilu tshiebe. 21 Badi basue kupesha bantu ba bisamba bikuabu meji a kusonga nwidie ne kutumbisha bikondu bionsu bakalenga ba panu. 22 “Maweja-Nangila, nwidie eyi idi patupu. Kulekedi nwidie eyi bumfumu ne bukalenga buebe to. Kuanyishi bua baluishi betu batuseke bua dibutuka dia tshisamba tshietu. Ubapingajile bibi bivuabu batuelele meji abi. Utatshishe muntu uvua muele meji a kuditatshisha bua bantu bonsu bamuenepu. 23 “Maweja-Nangila, utuvuluke. Luaku utuambuluishe patudi mu dikenga, Unkoleshe ku muoyi, wewe udi ku mutu kua nwidie, udi kabidi Mfumu wa bionsu bidi ne bumfumu. 24 Ngambila miaku idi mikumbane diba dingikala kumpala kua Artashasta, ntambue wa tshikisu ewu. Akudimune nsombelu wende, bua akine muntu udi utubunda, amubutule yeye ne bena diende. 25 Bukole buebe butumushe mu bianza biabu! Luaku Maweja-Nangila, ungambuluishe, bualu meme ndi nkayanyi, tshiena ne muntu mukuabu udi mua kungambuluisha, amu wewe Maweja-Nangila. Ke udi mumanye bionsu. 26 Udi mumanye mundi ndiwula bantu badi kabayi bakumbaja mikenji yebe, mundi ngumvua bibi pa kulala pa bulalu bumue ne muntu udi kayi muteka panshi, nansha udi kayi wa mu tshisamba tshia bantu bebe. 27 Wewe udi mumanye bimpe ne tshiena ne tshindi mua kusungula. Ndi mpepeja tshifulu tshia bu mukalenga mukaji tshindi ne bua kuasa munkatshi mua bantu. Tshiena mua kutshiasa pandi nkayanyi. Ndi ntshipepeja bu mudi tshilamba tshidi ne manyanu. 28 Meme mukaji, muena mudimu webe, tshiena mudie ku mesa pamue ne Amane, kabidi tshivua munemeke mukalenga pa kuya mu didia dinene divuaye mulambishe, tshivua munue nwinyo ivuaye mulambule nwidie yende. 29 Katshia ngakudimuna nsombelu too ne lelu, amu kuudi wewe, Maweja-Nangila, Mvidi Mukulu wa Abrahame, ndi ne disanka. 30 Wewe Mvidi Mukulu udi ne bukole bupite bua bonsu, teleja lubila lua bantu bebe bakengi, udisungidile, kudi bena lonji, kabidi umbusha bowa buanyi!”