Nsumuinu 23 - MUKANDA WA MYIDI MUKULU（TSH96）

1Pawikala udia ku mesa ne muntu muneme, umanye bimpe uudi musombe nende ku mesa.

2Wadikandika, kudileji muudi muena budiavi.

3Biakudia biende bisheme kabikusaminyi muoyi. Bumue badi mua kukupeshabi ne lungenyi lubi.

4Kuipatshidi biuma. Kuteki nansha meji ebe koku.

5Bualu biuma bidi bijimina kuyi muanji kubimona bimpe. Bidi bibuka mudi nyunyi wa tshiminyi ubuka mulu, uya kule.

6Kuena mua kudia kua muena muoyi mubi. Kuena mua kualakana biakudia bisheme bidiye ukupesha.

7Bualu meji adiye wela munda muende kaena afuanangana ne malu adiye wenza. Udi ukuambila ne: “Diaku, nuaku.” Kadi muoyi wende kawena kuudi.

8Biakudia bitshiya munda neubiluke. Lumbandi luudi umuela nelujimine patupu!

9Kuambidi mutshimbakane bualu. Kena wangata miaku yebe ne mushinga to.

10Kutentudi mikalu ya kale bua wewe kunyenga bana ba nshiya lupangu.

11Bualu badi ne mubalumbuluidi wa bukole buonsu, ke Mvidi Mukulu. Neabasombuele kuudi.

12Teleja bimpe badi bakulongesha. Teya matshi ku miaku ya badi bakubela.

13Kupampakanyi bua kunyoka muanebe to. Manyoka mimpe kaena amushipa nansha.

14Kadi adi mua kumuepula ku njiwu ya lufu.

Tatu udi ubela muanende wa balume

15Muananyi, pawikala munange meji, nengikale ne disanka dinene.

16Nensanke pandi ngumvua muudi wamba malu ne lungenyi.

17Kuena mua kuidikija malu adi bantu babi benza. Kadi utshine Maweja-Nangila matuku onsu.

18Nanku neusanke matuku adi kumpala. Kuakufua bundu to.

19Unteleje bimpe, wewe muananyi. Nanku newikale muntu wa meji. Newende buludi mu njila webe.

20Lekela kuenda ne bantu badi bakuatshika maluvu, kabidi ne badiavi ba minyinyi.

21Bualu badiavi ne banuavi nebabuele mu dikenga. Bafuba nebavuale bitetela.

22Teleja tatuebe, bualu mmukulele. Kupepeji mamuebe pakadiye mukulakaje.

23Ikala muntu udi wamba malu malelela, muedi wa meji, muntu mudimuke ne wa lungenyi. Wewe mumane kupeta ngikadilu eyi, kuyinyangi to.

24Tatu udi mulele muntu wa kalolu ne wa meji udi ne disanka dipite bunene.

25Usankishe tatuebe ne mamuebe nanku. Mamuebe apetele diakalenga adi kuudi.

26Muananyi, ngitaba. Sanka bua umfuane meme.

27Wamanya ne: mukaji muena tshiendenda ne mukaji wa bende badi bakukebela njiwu bu mudi tshiina tshile tshibulakane.

28Badi balaminangana mu njila bu mudi bivi benza. Bakadi bamane kupambula bantu bapite bungi.

Mukuatshiki wa maluvu

29Udi mu dikenga, unyingalala mmuntu kaayi? Udi utandangana, udididila matuku onsu nnganyi? Udibu batuuta kapayi bualu mmuntu kaayi? Udi ne mesu kunzuu bu kapia nnganyi?

30Ke muntu udi unua mvinyo matuku onsu, usambakaja kabidi ne maluvu makole kayi wikisha.

31Kunangidi mudi mvinyo mukunze wengelela mu dikopu. Neapueke bitekete bitekete pa muminu webe.

32Kadi ku nshikidilu ne udiumvue bu muntu musuma kudi nyoka, muela lulengu mu mubidi kudi nyoka wa ntoka.

33Mesu ebe neamone bintu bia bilengulengu. Lungenyi luebe ne miaku yebe nebitshiompakane.

34Neudimone bu muntu udi mu mayi manene, utenkakana kulu kua mutshi wa majuwa.

35Newambe ne: “Bavua bantapa mputa, bantuuta tshiyi mumvue, tshiyi mumanye. Pandi njuka, nendabule kabidi makuabu!”