Marke 3 - MUKANDA WA MYIDI MUKULU（TSH96）

Muena tshianza tshifulame(Mat 12.9-14; Luk 6.6-11)

1Pashishe Yezu kupingana kabidi mu nzubu wa kutendelela wa bena Yuda. Mu nzubu amu muvua muntu ne tshianza tshifulame.

2Bantu bonsu bavuamu bavua batentekela Yezu bikole bua kumona ne udi mua kuondapa muntu dituku dia Dikisha, bualu bavua bakeba pa kumufundila.

3Yezu kuambila muena tshianza tshifulame ne:

— Imana papa kumpala kua bantu bonsu.

4Ke kukonkaye bantu bavua batangila ne:

— Mikenji yetu mmianyishe tshinyi? Mbua kuenza malu mimpe dituku dia Dikisha, anyi mbua kuenza malu mabi dituku adi? Mbua kupandisha muntu anyi mbua kumushipa?

Kadi bobu kabavua basue kuandamuna.

5Yezu kubatangila bonsu ne tshiji, uvua kabidi ne kanyinganyinga bua muoyi mubi uvuabu nawu. Ke kuambilaye muntu awu ne:

— Olola tshianza thiebe.

Muntu kutshiolola, kuakanatshi.

6Baparushe kupatuka mu nzubu wa kutendelela wa bena Yuda, kudisangisha diakamue ne bantu badi batua ku tshia Erode, bua kukebabu mushindu udibu mua kushipa Yezu.

Bantu bavule badi balonda Yezu

7Yezu kumuka ne balongi bende ku dijiba dia Ngalileya. Bantu bavule kumulonda. Bavua batumine mu Ngalileya, mu Yudeya,

8mu Yerushalayime, mu buloba bua bena Idumeya, mu buloba budi dishiya dia musulu wa Yardene ne mu ditunga didi dituangane ne tshimenga tshia Tire ne tshia Sidone. Bantu bonsu aba bavua balonda Yezu, bualu bavua bumvue bionsu bivuaye wenza.

9Ke Yezu kuambila balongi bende bua kumulongoluela buatu bukese, bua bantu kabamufimpakaji.

10Bu muvuaye ujikija masama a bantu ba bungi, bonsu bavua basama bavua bafuilakana bua kumulenga.

11Pavua mikishi mibi imumona nanku, ivua ipona panshi ku makasa ende, yela mbila ne: “Udi Muana wa Mvidi Mukulu!”

12Kadi Yezu uvua uyikanyina bikole bua kayimusokolodi kudi bantu.

Yezu udi usungula bapostolu dikumi ne babidi(Mat 10.1-4; Luk 6.12-16)

13Pashishe Yezu kubanda pa kakuna. Kubikilaye bantu bavuaye musue, bobu kumulonda.

14Kubasungulaye dikumi ne babidi, kubinyika ne: bapostolu. Uvua mubasungule bua kuikalaye pamue nabu, bua kubatuma benda balongesha bantu,

15kubapesha bumfumu bua kuipata mikishi mibi.

16Telejayi mena a bantu dikumi ne babidi bavuaye musungule: Simone (uvua ne dina dikuabu dia Petro),

17Yakobe ne muanabu wa balume Yowanane, bonsu babidi bavua bana ba Zebede (Yezu uvua mubinyike ne: Bowanerjese, mmumue ne: “Bantu bafuana makubakuba”),

18Andre, Filipe, Bartolmayi, Matayi, Tomase, Yakobe muana wa Alfayi, Tadeyi, Simone uvua mu tshisumbu tshia baluidi ba ditunga diabu,

19ne Yudase muena mu Iskariyote, uvua mutangile Yezu tshitangu.

Bana babu ne Yezu badi basue kumuangata

20Pashishe Yezu kupingana ku nzubu. Bantu bavule kudisanga kabidi, Yezu ne balongi bende kabavua ne diba didibu mua kudia nansha.

21Baledi bende bumvue nanku, kuyabu bua kumuangata, bualu bavua bamba ne: “Yezu mmumane kujimija lungenyi!”

Bukole bua Yezu(Mat 12.22-32; Luk 11.14-23; 12.10)

22Balongeshi ba mikenji bavua batumine ku Yerushalayime, bavua bamba ne:

— Yezu udi ne Belzebule, diabolu munda muende! Bakuabu bavua bamba ne:

— Mfumu wa mikishi mibi ke udi umupesha bukole bua kuipata nabu mikishi mibi eyi!

23Ke Yezu kubabikila, kubambilaye malu mu nsumuinu ne:

— Mudi diabolu mua kuipata diabolu mbishi?

24Padi badi mu bukalenga baluangana nkayabu, bukalenga ebu kabuena mua kutungunuka nansha.

25Padi bena diku dimue baluishangana nkayabu, diku edi kadiena mua kutungunuka nansha.

26Padi diabolu uluisha diabolu, ditapuluka dikale mu bukalenga buende, bumfumu buende kabuena mua kutungunuka nansha, kuabu kudi kujika.

27“Muntu kena mua kubuela mu nzubu wa tshilobu, kunyenga binta biende, padiye kayi muanji kusuika tshilobu awu. Amu yeye mumane kumusuika, udi mua kunyenga binta bionsu bia mu nzubu muende.

28“Ndi nnujadikila ne: nebajimijile bantu mibi yabu yonsu ne bionsu bidibu bapendangana.

29Kadi muntu udi upenda Mueyelu wa Tshijila, kabena bamujimijila bubi buende tshiendelele. Bubi buende nebushale kashidi.”

30Yezu uvua muambe nanku bualu bavua bamba ne: “Udi ne mukishi mubi munda muende.”

Mamu ne bana babu ne Yezu(Mat 12.46-50; Luk 8.19-21)

31Mamu ne bana babu ne Yezu kufikabu. Bavua bimanyine pambelu. Kutumabu muntu bua kumubikila.

32Bantu ba bungi bavua basombe bele Yezu munkatshi, bobu kumuambila ne:

— Teleja, mamuebe ne bana benu badi pambelu, bakukeba.

33Yezu kubandamuna ne:

— Mamu wanyi nnganyi? Bana betu mbanganyi?

34Pashishe kutangilaye bantu bavua basombe, bamuele munkatshi, kuambaye ne:

— Tangilayi! Mamu wanyi ne bana betu mbobu aba!

35Bualu muntu udi wenza mudi Mvidi Mukulu musue, yeye awu udi muanetu wa balume, ne wa bakaji ne mamu wanyi kabidi.