Sira 4 - MUKANDA WA MYIDI MUKULU（TSH96）

1Muananyi, kuena mua kupala mupele

bidiye nabi dikenga,

kuena mua kuindija muntu udi bianza bitupu tshintu.

2Kuena mua kukengesha muntu udi ne nzala.

Kufikishi muena dikenga munda.

3Kuena mua kupita kumutatshisha;

udi ukengela tshintu kampanda,

umupeshetshi lukasa, kumuindiji to.

4Kuipatshi muntu udi ulomba tshintu bua dikenga.

Kulenguludi mupele to.

5Kulenguludi muena dikenga, lekela kumubuidia,

6bualu yeye mukuele mulawu ne kanyinganyinga kuonsu,

Mvidi Mukulu uvua mumufuke neateleje dilomba diende.

7Bidi bimpe bua bantu ba muaba uudi bakunange,

uleje muudi utumikila bamfumu.

8Teleja tshidi mupele ukuambila,

umuandamune ne bukalanga, kabidi ne diyi dimpe.

9Sungidila muntu udi mu bianza bia bantu badi bamukengesha.

Paudi ukosa nsambu, uyikose kuyi ne bowa.

10Bana ba nshiya bakumone bu tatuabu.

Mamuabu akutekemene bu bayende.

Nanku newikale bu muana wa Mvidi Mukulu Muena Kulu.

Yeye muena Kulu neakunange bipitshile ne pa dinanga didi mamuebe mukunange.

Meji adi alongesha bana

11Meji adi afikisha bana bawu ku dikasa dimpe dipite,

adi ambuluisha badi baakeba.

12Muntu udi munange Meji, mmunange muoyi.

Bantu badi baakeba bituadije mu dinda badi ne disanka dinene.

13Muntu udi wapeta neikale ne butumbi;

Maweja-Nangila udi umuela lupemba kuonsu kudiye uya.

14Badi bakuatshila Meji mudimu, badi batendelela Mvidi Mukulu wa tshijila.

Maweja-Nangila udi unanga bantu badi bananga Meji.

15Muntu udi uteleja Meji udi ukosa nsambu pa yoyi.

Udi ulonda tshidi Meji amba, udi usomba ku matshi talalaa.

16Padiye utekemena kudiwu udi wapiana.

Ndelanganyi yende neyisanke nawu kashidi.

17Kaena adianza kukulombola buludi to,

adi akufikisha ku bowa, akutshinyisha,

adi akukengesha mudiwu masue,

too ne muwikala ukadi muatekemene;

neakuelele mikenji amu bua kukuteta.

18Pashishe meji adi apingana tshiakabidi kuudi,

akutanduila malu avua masokome.

19Kadi pikala muntu mupambuke mu njila wa Meji,

adi amushiya, amufikisha ku kabutu!

Bundu buimpe ne bundu bubi

20Tangila muyaya malu, wepela bubi,

kuena mua kuikala ne bowa bua mushindu uudi.

21Bualu kudi bundu budi bufikisha muntu ku bubi,

ne bukuabu budi bumupesha butumbi ne diakalenga.

22Kuena mua kuditemba bu tshilobu, bualu bia nanku nebikutatshishe.

Kadi kuena mua kufua bundu to.

23Kuena mua kuikala utshintshila pa kuakula

paudi ne bualu bua kuamba to,

24bualu badi bamanya meji a muntu ku bidiye wakula,

dimanya diende ku bidiye wamba.

25Lekela kubenga malu malelela,

kuena mua kuamba biudi kuyi mumanye.

26Lekela kufila bundu bua kusokoka mibi yebe.

Kabena mua kukandika musulu bua kaupueki.

27Kuena mua kudipotesha kudi muntu mutatakane to

nansha kutshina muntu udi ne bukole.

28Uditatshishe bua kuenza malu makane too ne ku lufu.

Nanku Maweja-Nangila Mvidi Mukulu neakuambuluishe.

29Kuikadi wakula ne dikamakama to,

kuikadi muena lulengu nansha mufube pa kuenza ebe malu.

30Ku nzubu kuebe, kuikadi bu nyama wa ntambue,

munkatshi mua bena mudimu bebe, kuikadi muputuke bu nzolu mubole masala ne mayi.

31Kuikadi muena lubombu,

paudi kuyi mumanye pebe mua kupangana.