Estere ngreke 5 - MUKANDA WA MYIDI MUKULU（TSH96）

3Mukalenga kumukonka ne:

— Estere, tshiudi ujinga ntshinyi? Udi mulue kulomba tshinyi? Meme ndi muitabe bua kukupesha nansha tshia bibidi tshia bukalenga buanyi.

4Kadi Estere kuandamuna ne:

— Lelu ndituku dinene bualu buanyi meme. Ndi ngenza didia dinene lelu ewu. Mukalenga, uvue mu didia adi pamue ne Amane.

5Ke mukalenga kutuma muntu diakamue bua kukeba Amane bua anyishe ku dibiki la dia Estere. Bubidi buabu kufikabu mu didia adi.

6Ku ndekelu kua didia, mukalenga kukonka Estere ne:

— Mukalenga mukaji, tshiudi ujinga ntshinyi? Tshionsu tshiudi ulomba neutshipete.

7Estere kuandamuna ne:

— Udi ujinga kumanya tshindi musue anyi?

8Mukalenga, paudi mumone ne ndi mukutokele ku muoyi, maloba nufike ne Amane mu didia dindi nnuenzela, difuanangana ne dia lelu edi.

Amane udi ulongolola tshiowelu bua kuowa Mordekayi

9Amane kupatuka kua mukalenga ne disanka dipite bungi. Kadi kumonaye Mordekayi, muena Yuda mu lubanza lua nzubu wa bukalenga, kufikaye munda bikole.

10Kupinganaye kuende, kubikidishaye balunda bende ne mukajende Zosara.

11Kubalejaye bubanji buende ne bintu bia masanka bivua mukalenga mumupe bu muvuaye ne muanzu munene, ne bu muvuaye ulombola midimu ya mu bukalenga.

12Pashishe Amane kuamba kabidi ne:

— Mukalenga mukaji uvua mumbikile amu meme nkayanyi bua nye kufila mukalenga mu didia dinene lelu. Maloba udi mumbikile kabidi.

13Bionsu ebi kabiena binsankisha nansha kakese pantshidi mmona Mordekayi, muena Yuda, ukuata mudimu mu lupangu lua bukalenga.

14Kadi Zosara, mukajende ne balunda bende kumuandamuna ne:

— Longoluesha mutshi wa kuowa muntu, wa bule bua metre makumi abidi ne atanu. Kadi maloba dinda, neulombe kudi mukalenga bua kowelabu Mordekayi ku tshiowelu atshi. Pashishe neuye mu didia pamue ne mukalenga, wenda usanka. Amane kuanyisha meji awu. Bantu kulongolola tshiowelu.