Filemone Diumvuija - MUKANDA WA MYIDI MUKULU（TSH96）

Diumvuija— Ke mukanda mukese ku yonsu ivua Polu mutumine bantu ku itudi tushala nayi. Udi uufundila Filemone, muntu muneme, uvua mubuele mu Tshisumbu tshia bena ditaba tshia mu Kolose. Filemone, mulunda wa Polu (kan. 1), uvua ne mupika, diende Onezime, uvua mumunyeme. Katuena bamanye mushindu uvua Onezime mupetangane ne Polu, pavua mupostolu mu nzubu wa lukanu. Ke Onezime kubuela mu Tshisumbu tshia bena ditaba. Polu kupangadika bua kumupingajila mfumuende. Ke kufundilaye Filemone mukanda, umulomba bua akidile Onezime kuende, kayi umutangila bu mupika, kadi bu muanabu mu ditaba. Mu tshikondu atshi, bavua ne tshibidilu tshia kunyoka bibi bitambe mupika uvua munyeme.Polu mumane kuela Filemone ne bonsu badiye nabu muoyi (1-3), udi wela Mvidi Mukulu tuasakidila bua padi Filemone uleja ditaba ne disuminyina (4-7). Pashishe udi ulonda bualu bua Onezime, udi ne bua kupingana kua mfumuende (8-22). Tudi tusangana mu mukanda ewu mena makuabu a bantu badibu batela kabidi mu mukanda mutumina bena Kolose (4.10, 12, 14; dina dia Arshipe kabidi didi mu kan. 2 ne mu Kol 4.17). Imue misangu ke Onezime uvua mutuadile bena Kolose ne Filemone mikanda ibidi ivua Polu mubatumine ayi.Polu udi ufundila mulunda wende mukanda ne miaku ya lubombu, kayi umutumina diyi, kayi umuenzeja malu ku bukole, kayi nansha uvila bumfumu budi Filemone nabu pambidi pa Onezime. Kadi udi umuvuluija, uvuluija kabidi ne bonsu badi babala mukanda ewu, ne: dinanga divua Kristu mutunange nadi didi ne bua kutusombesha panu mushindu mupiamupia mu difuilangana luse ne mu dinangangana dilelela.