Yudite 12 - MUKANDA WA MYIDI MUKULU（TSH96）

Yudite udi usomba mu mitanda ya baluishi

1Oloferne kutuma diyi bua Yudite asombe ku mesa, bavua kutekaku malonga a tshiamu tshitoke tshia mushinga mukole. Kutumaye diyi bua bamuenzele biakudia amu biende menemene ne nwinyo wende uvuaye udinuina.

2Kadi Yudite kuamba ne:

— Tshiena mua kudia biakudia ebi, bualu ndi mua kunyanga mukenji wa kudi Mvidi Mukulu wanyi. Nendie amu bindi mulue nabi.

3Oloferne kumuandamuna ne:

— Pikala biakudia biudi nabi bijika, mutudi mua kuenza bua kukupetela bikuabu bidi bifuanangana ne ebi mbishi? Bualu mu mitanda yetu emu, kamuena muntu wa tshisamba tshiebe nansha umue.

4Yudite kumuandamuna ne:

— Amu pautshidi ne muoyi, bangabanga tshiyi muanji kujikija biakudia bindi nabi bua kudia, Mvidi Mukulu neakuate nanyi mudimu bua kukumbaja bidiye muele meji.

5Balombodi ba tshiluilu tshia Oloferne kumubueja mu ntenta, kulalaye too ne munda nkulu. Patshiatshia kubikaye butuku kabuyi buanji kutshia.

6Kutumaye bantu bua kuambila Oloferne ne: ndi nkulomba bua undekele nya kutendelela.

7Oloferne kutumina balami ba tshiibi diyi bua kabamukandiki. Yudite kushala mu mitanda matuku asatu. Butuku uvua uya mu lubuwa lua mu tshimenga tshia Betuliye, uvua owa mayi a mpokolu.

8Pavuaye upatukamu, uvua utendelela Maweja-Nangila, Mvidi Mukulu wa Izrayele bua anulombole mu bivuaye mubange, amone mua kupandisha bena Izrayele.

9Yeye mumane kumusha mikiya, kupinganaye mu ntenta. Kushalayemu ne ku dilolu, too ne padibu bamupa tshiakudia.

Oloferne ne Yudite badi badia didia dinene pamue

10Bafika mu dituku dinayi, Oloferne kuenzeja didia dinene. Uvua anu mubikile bena mudimu bende. Kadi kavua mubikile mulombodi wa tshiluilu tshiende nansha umue.

11Kuambilaye Bagoyase, mutungu uvua mutangile bintu biende ne:

— Uye kungambidila mukaji wa bena Ebrewu udi kuebe awu, umusuishile bua avue kudia ne kunua netu pamue.

12Bualu bidi mua kuikala ne bundu bu tuetu mua kupanga kubuelela mukaji wa nenku mu nzubu. Tuetu katuyi bamuambishe neatuseke.

13Bagoyase kulayangana ne Oloferne, kuyaye kudi Yudite, umuamba ne:

— Wewe mukaji wa mushinga nenku, anyisha uye kudi mfumuanyi, udi ukubikila kuende. Neakusankishe padiye ukupeta. Neunue netu nwinyo lelu, neusanke bu mudi nsongakaji ya bena Ashure idi mu nzubu wa bukalenga wa Nebukadnesare.

14Yudite kuandamuna ne:

— Mundi mua kubenga diyi dia mfumuanyi mbishi? Tshiyi ngelakana, nengenze tshidi tshilengelela mfumu, bualu tshidi disanka dianyi dindi mua kuvuluka ne mundi mfua.

15Kujukaye, kuvualaye bilamba biende bimpe ne bilengejilu bionsu. Mukaji muena mudimu wende kudianjila mu ntenta wa Oloferne, kuadijaye biseba bia mikoku panshi kumpala kua Oloferne. Biseba abi ke bivua Bagoyase mupe Yudite bua ikale udioluelapu ku dituku ku dituku diba didiye udia.

16Yudite kubuela mu ntenta, kudiolola pa biseba panshi. Oloferne kualakana Yudite, lungenyi luende kulubakana bikole. Muoyi wa kubuelela Yudite munzubu kumusaminawu bikole. Bualu katshia umonangana nende, uvua amu ukeba mushindu wa kumufikisha ku dimanyangana nende.

17Oloferne kumuamba ne:

— Nuaku, usanke pamue netu.

18Yudite kumuandamuna ne:

— Nennue mfumuanyi, bualu disanka dianyi dia lelu ndipite dia katshia bandela.

19Kuangataye bivua muena mudimu wende mumulambile, kudiaye kabidi kunuaye, Oloferne mutangile.

20Oloferne kumvuaye disanka, kunuaye nwinyo muvule, bungi buvuaye kayi muanji kunua dituku nansha dimue katshia bamutela.