1Bantu babi badi badishima bamba ne: “Matuku etu a panu adi makese, kabidi mmuwule ne makenga. Lufu ndukulu, buanga tshidingijilu! Katuena banji kumona muntu mufue, mualuke.
2Tudi balele mu mpukapuka. Patuafua kakuena kushala tshintu. Mueyelu wetu udi upatuka bu muinshi. Lungenyi ludi lupatuka, muoyi wetu udi ukuma bu kantolentole ka kapia.
3Kantolentole aka koku kajima, mubidi udi wandamuka lupuishi ne muoyi wetu udi ujimina bu dibungi.
4Pashishe bantu nebatupue muoyi, kabena mua kuvuluka bituvua benze. Matuku etu a panu adi apita bu mavuba, kaayi ashiya tshimanyinu, adi ajimina bu dibungi, didi nkenka ya diba itangalaja, padi munya utema.
5Matuku etu a panu adi apita bu mundidimbi. Katuena ne mushindu wa kualepesha, bualu mmamane kujadika. Nanku, muntu kena mua kuapingaja kabidi.
6“Nenku, patutshidi ne muoyi, tusankayi ne bintu bitudi nabi. Bia panu mbietu, tuenzayi nabi mutudi basue.
7Tunuayi maluvu mimpe patutshidi pa tuetu, tulabayi manananshi a dipembu, pa kudia mpautshidi wenda.
8Tuasayi bilongu ku nsuki yetu, padibi kabiyi bianji kufuba.
9Muntu kashadi mu tshibilu tshietu tshia masanka. Miaba yonsu bantu bamone mutuvua tusanka. Ke luetu lumu! ke tshitudi mua kupeta!
10Tukengeshayi bapele nansha bobu bantu bakane. Katufuidi bakamba luse. Katunemeki bakulakaje, nansha bobu ne nsuki mitoke.
11Bukole butudi nabu, budi butubingisha ku bionsu ebi. Butekete kabuena ne tshidibu mua kuenza.
12Tuluishayi bantu bakane, bualu badi batupuwisha, babenga bitudi tuenza. Badi batudiwula patudi tushipa mikenji.
13Bantu bakane badi bafuna mudibu bamanye Mvidi Mukulu, bamba mudibu bana ba Maweja-Nangila.
14Bidibu bamba bikadi bitutonda, katuena basue kubamona kabidi.
15Malu adi bantu bakane benza mmashilangane ne a bantu bakuabu. Nsombelu wabu ngua pa buende.
16Tuetu katutshiena ne mushinga ku mesu abu. Badi batutshina bu bintu bibole. Kabidi badi baditambisha, bualu Mvidi Mukulu ke tatuabu. Badi bamba ne: ku ndekelu kua bionsu, bantu bakane nebasanke.
17Kadi diba dialejabu kudi bantu bakane aba, netumone ne bidibu bamba ebi mbia bushuwa anyi?
18Bantu bakane pikalabu bana ba Mvidi Mukulu bulelela, Mvidi Mukulu neabambuluishe, abanyenge mu bianza bia baluishi babu.
19Nanku, tubateyayi, nebakengeshe ne tshikisu, tumone ne badi ne lutulu ne muoyi mukole.
20Tubafundilayi lufu lubi, bualu badi bamba ne: Mvidi Mukulu neabasungidile.”
21Nansha bantu babi bela meji nanku, badi badidinga, bubi buabu budi bubavuija bampofu.
22Kabena bamanye mudi Mvidi Mukulu wela meji. Kabena batekemena disanka didi Mvidi Mukulu upesha bantu badi benza malu mimpe, kabena banyisha lumu ludiye mulaye bantu bakane.
23Mvidi Mukulu wakafuka muntu bua ashale ne muoyi kashidi. Wakamufuka pa tshimfuanyi tshiende, pa tshimfuanyi tshiende yeye Mvidi Mukulu.
24Lubabu lua Satane ke ludi lubueja lufu mu bantu. Badi bamulamate badi bafhe bulelela.
Who We AreWhat We EelieveWhat We Do
2025 by iamachristian.org,Inc All rights reserved.
