Tshimuangi 6 - MUKANDA WA MYIDI MUKULU（TSH96）

1Maweja-Nangila kuambila Moshe ne:

— Neudimuene nkayebe mundi ngenzeja mukalenga wa bena Ejipitu ku bukole bua kulekelaye bena Izrayele baye. Nemmuenzeje kabidi ku bukole bua abipate mu ditunga diende.

Mvidi Mukulu udi ulaya Moshe ne: nempikule Izrayele

2Mvidi Mukulu kuambila Moshe kabidi ne:

— Meme ndi “Maweja-Nangila.”

3Meme ke Mvidi Mukulu wa bukole buonsu uvua mumuenekele Abrahame, Izake ne Yakobe. Kadi tshivua mubambile dina dianyi dia Maweja-Nangila to.

4Mvua mutue nabu ndondu, mubalaye mua kubapesha ditunga dia Kenaane divuabu basombe bu bantu benyi.

5Mpindiewu ndi mumvue miadi ya bena Izrayele badibu bakuate mu bupika kudi bena Ejipitu. Ke pandi muvuluke ndondu umvua mutue nabu.

6Nanku ambila bena Izrayele mu dina dianyi ne: “Ndi Maweja-Nangila! Nennumushe ku midimu mikole inudi nuenzela bena Ejipitu. Nennupatule ku bupika budibu banukuate. Nengenzeje bena Ejipitu ku bukole, mbanyoke bikole bua kunusungidila.

7Nenuikale bantu banyi, nengikale Mvidi Mukulu wenu. Nenujadike ne: meme Maweja-Nangila ndi Mvidi Mukulu wenu. Ndi munumushe ku midimu mikole inuvua nuenzela bena Ejipitu.

8Nennufile mu ditunga dimvua mulaye Abrahame, Izake ne Yakobe. Ditunga adi nedishale bupianyi buenu. Meme Maweja-Nangila ndi njadika bualu ebu.”

9Moshe kuambila bena Izrayele malu awu. Kadi kabavua bamuitaba to, bualu bavua ne kanyinganyinga bua dikenga divuabu nadi mu bupika.

10Maweja-Nangila kuambila Moshe kabidi ne:

11— Ambila mukalenga wa bena Ejipitu, alekele bena Izrayele bumuke mu ditunga diende.

12Moshe kuandamuna Maweja-Nangila ne:

— Bu mudi bena Izrayele kabayi bateleja bindi mubambile, mukalenga wa bena Ejipitu kabidi kakuitaba to, bualu ndi ngakula ne lutatu.

13Maweja-Nangila kuambila Moshe ne Arone ne: “Nunganyishe bena Izrayele ne mukalenga wa bena Ejipitu malu onsu aa bua bena Izrayele bamone mua kumuka mu Ejipitu.”

Bankambua ba Moshe ne Arone

14Ke mena a bisamba bia bena Izrayele:

Rubene, muanabute wa Yakobe, uvua ne bana balume banayi: Anoke, Palu, Esrone ne Karmi. Ke bankambua ba meku a bena Rubene.

15Shimeyone uvua ne bana ba balume basambombu: Yemuyele, Yamine, Ohade, Yakine, Sohare ne Shawule uvuaye mulele ne mukaji wa bena Kenaane. Ke bankambua ba meku a bena Shimeyone awu.

16Levi uvua mulele bana ba balume basatu: Ngershone, Kehate ne Merari. Levi wakushala ne muoyi bidimu lukama ne makumi asatu ne muanda mutekete.

17Ngershone uvua mulele bana ba balume babidi: Libni ne Shimeyi. Bana aba ke bankambua ba meku adi ne dina diabu.

18Kehate uvua mulele bana ba balume banayi: Amrame, Ishare, Ebrone ne Uziyele. Kehate wakashala ne muoyi bidimu lukama ne makumi asatu ne bisatu.

19Merari uvua mulele bana ba balume babidi: Mali ne Mushi. Ke muvua bankambua ba bena Levi ne ndelanganyi yabu nanku.

20Amrame uvua musele tatuende mukaji Yokebede. Mukaji ewu kulela Moshe ne Arone. Amrame wakashala ne muoyi bidimu lukama ne makumi asatu ne muanda mutekete.

21Ishare uvua mulele bana ba balume basatu: Kora, Nefege ne Zikri.

22Uziyele uvua mulele bana ba balume basatu: Mishayele, Elishafane ne Sitri.

23Arone uvua musele Elisheba muana wa Aminadabe. Elisheba awu uvua muanabu ne Nashone. Elisheba kulela bana ba balume banayi: Nadabe, Abiku, Elazare ne Itamare.

24Kora uvua mulele bana ba balume basatu: Asire, Elkana ne Abiyashafe. Ke bankambua ba meku a bena Kora.

25Elazare, muana wa Arone, uvua musele muana wa Putiyele. Mukaji awu kulela Pinhase.

Ke mudi bankambua ba meku a tshisamba tshia bena Levi nanku.

26Arone ne Moshe ke bavua Maweja-Nangila muambile ne: “Nupatule bena Izrayele bonsu balondangane bimpe mu bisamba biabu mu Ejipitu.”

27Anu bobu aba ke bavua bambile mukalenga wa bena Ejipitu bua anyishe bena Izrayele bumuke bonsu mu ditunga diende.

Maweja-Nangila udi ulaya Moshe tshiakabidi

28Pavua Maweja-Nangila uyukila ne Moshe mu ditunga dia Ejipitu,

29uvua mumuambile ne:

— Ndi Maweja-Nangila, ambila mukalenga wa bena Ejipitu bionsu bindi mukuambile.

30Kadi Moshe kumuandamuna ne:

— Mukalenga wa bena Ejipitu kena mua kumvua tshindi ngamba to, bualu ndi ngakula ne lutatu.