24Bantu basatu aba: Ananya, Azarya ne Mikayele, bavua benda munkatshi mua ndimi ya kapia, bavua bimba misambu batumbisha Maweja-Nangila Mvidi Mukulu.
25Pashishe Azarya kuimana kulu mu kapia amu, utendelela Mvidi Mukulu wamba ne:
26“Tudi tukutumbisha Maweja-Nangila Mvidi Mukulu wa bankambua betu, tudi tukuela tuasakidila, wewe udi mukumbanyine bua bantu bakunemeke, batumbishe kabidi dina diebe kashidi.
27Udi muakane ku bionsu biudi utuenzela. Bionsu biudi mutuenzele bidi amu bimpe. Njila yebe idi milulame. Udi ukosa nsambu amu pa yoyi.
28Bionsu biudi mutuenzele tuetu bena Yerushalayime, tshimenga tshia tshijila tshia bankambua betu bidi amu bimpe. Bualu tuvua benze bibi, udi mutunyoke amu pa bualu.
29Tuvua benze bibi, tuvua bakutombokele. Tuvua tuenza amu kuenza bibi, tuetu kukuela nyima.
30Katuvua bitabe meyi ebe to. Katuvua baanemeke nansha baakumbaje. Kadi uvua mutupeshewu bua tupete diakalenga.
31Eyowa, bionsu biudi mutuenzele bidi amu pa bualu. Uvua mutunyoke ne dinyoka divua ditukumbanyine.
32Udi mutufile mu bianza bia baluishi, badi kabayi bakutendelela, bena lukinu, bantomboji, ne kudi mukalenga muena kansungansunga udi upita bonsu ba pa buloba ku bubi.
33Mpindiewu, tuetu bantu bebe, badi bakunemeka, katuena ne tshitudi mua kuamba, bundu mbutukuate disu tente.
34Maweja-Nangila, bua dina diebe ditumbe misangu yonsu, kutulekedi kashidi to. Kuupudi ndondu utuvua batue nebe.
35Kuena mua kubenga kutunanga bualu bua Abrahame, mulunda webe, ne bua Izake ne Yakobe bantu bebe bavua bakulamate.
36wewe uvua mubalaye ne: ndelanganyi yenu neivulangane bu mitotu ya kulu, nansha bu lusenga ludi ku muelelu wa mayi manene.
37Kadi, Maweja-Nangila, ku bisamba bionsu bia pa buloba, amu tuetu tudi tshisamba tshipite bukese. Amu bua mibi yetu, badi batufuisha bundu pa buloba bujima.
38Mu tshikondu etshi, katuena ne mfumu, bambi kabidi ne balombodi. Katuena ne nzubu wa tshijila nansha muaba utudi mua kulambula milambu ya kuosha, milambu ya bukula, nansha ya manananshi, kabidi ne ya mu madimi ya Bintu bia tshianyi, bua wewe kumfuila luse.
39Kadi bu mutudi tuvua kuudi ne muoyi wa bupuekele, tunyingalala bua mibi yetu,
40umanyisha muudi mua kumanyisha patudi tukulambula milambu ya kuosha, ya mikoku ya bimpanga, ya balume ba ngombe ne ya bana ba mikoku ba manyi binunu ne binunu. Mulambu utudi tukulambula lelu, tudi balengeja nawu nsombelu wetu, udi mua kuwanyisha, bua tukulonde amu kukulonda, bualu bantu badi bakutekemena kabena mua kufua bundu to.
41Biangatshile mpindiewu, tudi bashindike mua kukulonda. Netukutendelele kabidi netukunemeke.
42Kutufuishi bundu to. Kadi umfuile luse, utulekele bubi buetu.
43Maweja-Nangila umpandishe bu muuvua muenze ku kale. Uvua wenzela bantu bebe malu a dikema! Utuenzelewu kabidi. Bua bantu batumbishe dina diebe!
44Bantu bonsu badi batukengesha, tuetu bena mudimu bebe, ubafuishe bundu! Nansha bobu ne bukole bupite, ubanyenge bumfumu, uzaze bukole budibu nabu.
45Bakumanye ne wewe udi amu nkayebe Maweja-Nangila Mvidi Mukulu udi bantu batumbisha pa buloba bujima!”
Balunda basatu ba Daniyele badi bimba musambu46Kadi, bena mudimu ba mukalenga bavua bela balunda basatu mu tshikutu tshia kapia, bavua balundula amu kulundula kapia ne bintu bia kutemesha nabi kapia, bia muendundu, bia budimbu ne bisumbu bia nkunyi miume.
47Ndimi ya kapia ivua ilunduka ilepa bule bua metre makumi abidi ne inayi.
48Ndimi ya kapia ivua ilepa, ivua miosha bena Babilone bavua bimane ku muelelu wa tshiina tshia kapia.
49Kadi mutumibue wa Maweja-Nangila kupueka mu tshiina tshia kapia muvuabu kudi Azarya ne balunda bende, kumusha ndimi ya kapia mu tshiina tshia kapia.
50Kutalajaye muaba munkatshi mua tshiina tshia kapia atshi, kushalamu bu muaba udi lupepele ludi ne mashika lutuuta. Kapia kakavua mua kuosha bantu aba, kakavua mua Ubatatshisha nansha kubenzela bibi.
51Mu tshikutu tshia kapia amu, bonsu basatu pamue kubanga kuimba misambu, kutumbisha Mvidi Mukulu, bamusamuna bamba ne:
52Tudi tukuela tuasakidila Maweja-Nangila Mvidi Mukulu wa bankambua betu!
Wewe udi mukumbane bua bantu bakusamune,
bakutumbishe kashidi bua bumfumu buebe.
Tudi tutumbisha dina diebe dia tshijila.
Tukuele tuasakidila.
Wewe udi mukumbane bua bantu bakutumbishe bikole,
bakuele tunkunduluila kashidi bua bumfumu buebe.
53Tudi tukutumbisha mu nzubu webe wa tshijila, tukuela tuasakidila.
Wewe udi mukumbane bua bantu bakutue makumbu bikole.
Tudi bakusamuna bakutumbisha kashidi.
54Tudi tukutumbisha, wewe udi ukononona,
too ne bidi mu kandondu ka bafue.
Tudi tukuela tuasakidila.
Wewe udi usomba pa mitu ya bakerubine.
Tudi tukusamuna, tukutumbisha kashidi bua bumfumu buebe.
55Tudi tukuela tuasakidila, wewe udi usomba mu nkuasa webe wa bukalenge
Wewe udi mukumbane bua bantu bakusamune bikole.
56Tudi tukuela makumbu, tukututshila bikashi kashidi bua bumfumu buebe,
tukuela tuasakidila wewe mfumu wa tshibuashibuashi.
Wewe udi mukumbane bua bantu bakusamune, bakutue makumbu,
bakutumbishe kashidi.
57Elayi Maweja-Nangila tuasakidila.
Nuenu bonsu badiye mufuke,
munutue makumbu, numututshile bikashi kashidi bua bumfumu buende.
58Nuenu bena mu diulu, elayi Maweja-Nangila tuasakidila!
Numutue makumbu kashidi bua bumfumu buende.
59Elayi Maweja-Nangila, tuasakidila nuenu batumibue bende,
numutumbishe numuele kalumbandi kashidi bua bumfumu buende!
60Mayi onsu a mulu, elayi Maweja-Nangila tuasakidila,
mutumbishayi numusamune kashidi, bua bumfumu buende!
61Biluilu bia mulu bionsu bia Maweja-Nangila, muelayi tuasakidila.
Mutumbishayi, musamunayi kashidi bua bumfumu buende!
62Diba ne ngondu, elayi Maweja-Nangila, tuasakidila,
mutumbishayi, numusamune kashidi bua bumfumu buende!
63Mitotu ya mulu, elayi Maweja-Nangila tuasakidila,
mutumbishayi, numutue makumbu kashidi, bua bumfumu buende!
64Mvula ne lumuma, elayi Maweja-Nangila tuasakidila,
mutumbishayi, numusamune kashidi bua bumfumu buende!
65Wewe lupepele luonsu, elayi Maweja-Nangila tuasakaidila,
lumutumbishe, lumutue makumbu kashidi bua bumfumu buende!
66Wewe kapia ne luya, elayi Maweja-Nangila tuasakidila,
mutumbishayi, numuele kalumbandi kashidi bua bumfumu buende!
67Wewe mashika ne luya, elayi Maweja-Nangila tuasakidila,
numusamune, numutumbishe kashidi bua bumfumu buende.
68Wewe lumuma ne kansensa, elayi Maweja-Nangila tuasakidila,
numusamune, numutumbishe kashidi bua bumfumu buende!
69Wewe butuku ne munya, elayi Maweja-Nangila tuasakidila,
numusamune, numutumbishe kashidi bua bumfumu buende!
70Wewe butoke ne miidima, elayi Maweja-Nangila tuasakidila,
numusamune, numutumbishe bua bumfumu buende!
71Wewe tubue tua mvula ne ditshima, elayi Maweja-Nangila tuasakidila,
numusamune, numutumbishe kashidi bua bumfumu buende!
72Wewe mabue a mvula ne mvula wa neje, elayi Maweja-Nangila tuasakidila,
numusamune, numutumbishe kashidi, bua bumfumu buende!
73Wewe mikenya ya mvula ne mavuba, elayi Maweja-Nangila tuasakidila,
numusamune, numutumbishe kashidi bua bumfumu buende!
74Wewe buloba, elaku Maweja-Nangila tuasakidila,
umusamune, umutumbishe kashidi, umuele tunkunduluila bua bumfumu buende!
75Wewe mikuna minene ne mikese, elayi Maweja-Nangila tuasakidila,
numusamune, numutumbishe kashidi bua bumfumu buende!
76Nuenu bisekiseki bidi pa buloba, elayi Maweja-Nangila tuasakidila,
numusamune, numutumbishe kashidi bua bumfumu buende!
77Wewe mayi manene ne misulu, elayi Maweja-Nangila tuasakidila,
numusamune, numutumbishe kashidi bua bumfumu buende!
78Wewe mpokolu wa mayi, ela Maweja-Nangila tuasakidila,
umusamune, umutumbishe kashidi bua bumfumu buende!
79Nuenu mishipa minene ne nyama yonsu ya mu mayi, elayi Maweja-Nangila tuasakidila,
numusamune, numutumbishe kashidi bua bumfumu buende!
80Nuenu nyunyi yonsu ya mulu, elayi Maweja-Nangila tuasakidila,
numusamune, numutumbishe kashidi bua bumfumu buende!
81Nuenu nyama ya muitu ne bimuna, elayi Maweja-Nangila tuasakidila,
numusamune, numutumbishe kashidi bua bumfumu buende!
82Nuenu bantu bonsu badi pa buloba, elayi Maweja-Nangila tuasakidila,
numusamune, numutumbishe kashidi bua bumfumu buende!
83Nuenu bena Izrayele, elayi Maweja-Nangila tuasakidila.
numusamune, numutumbishe kashidi bua bumfumu buende!
84Nuenu batuangaji bende, elayi Maweja-Nangila tuasakidila,
numutumbishe, numusamune kashidi bua bumfumu buende!
85Nuenu badi bakuatshila Maweja-Nangila mudimu, numutumbishe
numusamune kashidi bua bumfumu buende!
86Nuenu bantu bakane, elayi Maweja-Nangila tuasakidila,
numusamune, numutumbishe kashidi muenu muonsu bua bumfumu buende!
87Nuenu bantu ba tshijila, ne bapuekele, elayi Maweja-Nangila tuasakidila,
numusamune, numutumbishe kashidi bua bumfumu buende!
88Ananya, Azarya ne Mikayele, tuelayi
Maweja-Nangila tuasakidila,
tumusamune, tumutumbishe kashidi bua bumfumu buende!
Bualu mmutupatule mu kandondu ka bafue,
kabidi mmutupandishe ku njiwu ya lufu.
Mmutubafule mu tshikutu tshia ndimi ya kapia kakole.
89Tumbishayi Maweja-Nangila, bualu mmulenga, dinanga diende ndia kashidi.
90Nuenu bonsu badi banemeka Maweja-Nangila,
Mvidi Mukulu udi ku mutu kua nwidie yonsu, numusamune,
muelayi tuasakidila, numutumbishe bualu dinanga diende ndia kashidi!
Who We AreWhat We EelieveWhat We Do
2025 by iamachristian.org,Inc All rights reserved.
