Sira 8 - MUKANDA WA MYIDI MUKULU（TSH96）

Udimuke mu nsombelu webe ne bantu

1Kutandianganyi ne muntu udi ne muanzu,

bua kavu kukukuata.

2Kutandianganyi ne muena biuma,

bualu udi amu bu kasosa ku mesu kuende.

Bantu bavule badi babuejilangana mpawungi.

Mpawungi mene mmulenduishe bakalenga.

3Kutandianganyi ne muena mutoyi,

bualu bidi bu kumusonsola.

4Kuedianganyi bilele ne muntu mukolesha bibi,

bualu udi mua kupenda baledi bebe.

5Lekela kutandisha muntu udi ukeba kudilengeja ku bubi buende.

Vuluka ne bonsu badi bena tshibawu.

6Kupepeji muntu mukulakaje,

bualu bamue ba kutudi badi benda bakulakaje kabidi.

7Kusanki bua lufu lua mukuenu,

vuluka ne tuetu bonsu netufue.

8Kupepeji muambamba bakulu.

Longa nsumuinu yabu ne disuminyina,

bualu kudibu ke kuudi mua kupetela meji,

ne kulongela muudi mua kukuatshila bamfumu mudimu.

9Kulenguludi muambamba banunu,

bualu malu awu ngavuabu bumvue kudi babu baledi.

Amu kudibu ke kuudi ulongela mua kumanya malu,

kabidi ne mua kuandamuna ku nkonku idibu bakuela.

10Kulundudi tshiji tshia muntu mubi,

bualu udi mua kudibutuisha.

11Lekela kufunyinangana ne muena dikamakama,

bualu udi mua kukufikisha ku diakula bibi.

12Kuena mua kusombesha muntu mukupite ku muanzu lupetu luebe.

Pawikala mumusombeshe ututangile bu lujimine.

13Kuena mua kudieyeka ku bintu biudi kuyi mua kupeta.

Pawikala muenze nanku, udikengeshe amu bua kufuta.

14Kubundi tshilumbu ne ndumbulula,

bualu nebatue ku tshiende, bu mudiye ndumbulula.

15Kuena mua kuya ku luendu ne muena dikamakama,

bualu udi mua kukukebela malu mabi mapite bungi.

Yeye neenze amu bidi ku muoyi wende,

bupale buende nebukufikishe ku lufu.

16Kutandi ne muntu wa tshiji.

Kanuyi nende babidi muaba udi kauyi bantu.

Bualu kakuena tshidi mua kumukandika bua kushipa muntu.

Udi mua kukushipela muaba udi kauyi muntu udi mua kukusungidila.

17Kuambidi muntu mupote bualu buebe busokome,

bualu kena mua kubulama.

18Panudi ne muenyi pamue,

kuenji bualu bua musokoku to,

bualu kuena mumanye mudiye mua kubinduluka.

19Kuambidi muntu yonsu malu adi munda muebe,

bualu kabena mua kukunemeka to.