1 Petro Diumvuija - MUKANDA WA MYIDI MUKULU（TSH96）
Diumvuija— Mukanda wa kumpala wa Petro mmutumina bena Kristu bavua batangalake mu matunga atanu a mu Aziya Mukese (ke tshitupa tshia Aziya tshidi lelu mu ditunga dia Turkiya). Bena Kristu aba bavua basombe mu Bisumbu bia bena ditaba bivuabu basa kudi Polu, nansha kudi bambuluishi bende. Mufundi bumue uvua mufunde mukanda wende mu Rome (ke tshimenga tshidiye winyika “Babilone” mu 5.13). Bena Kristu ba mu matunga atanu aa bavua mu dikenga: bena mutumba nabu, bavua kabayi bena ditaba, bavua babapepeja, babasa bilumbu bia mishindu yonsu, babakengesha. Ke mudi mupostolu ubakolesha ku muoyi, ubalomba bua batangile Yezu Kristu, bualu badi bafuanangana nende ku makenga adibu bumvua bualu buende.Petro mumane kuela babadi ba mukanda wende muoyi, udi utumbisha Mvidi Mukulu, umuela tuasakidila, bualu uvua musungidile bena ditaba, mubapeshe ku lufu ne dibiika dia Yezu Kristu ditekemena dia kupeta muoyi mulelela (1.3-12). Udi ulomba bena Kristu bua bikale bantu badimuke, ba nsombelu muimpe, badi badisanga ne Kristu (1.13—2.10). Badi ne bua kulonda tshilejilu tshia Kristu, kulama lutuulu mu makenga, kukumbaja mu nsombelu wabu bivua Yezu mutulongeshe. Petro udi umvuija bimpe bidi bena ditaba ne bua kuenzela bamfumu ba ditunga, mudi bamfumu ne bapika babu ne bua kumvuangana, mudi bena dibaka ne bua kunemekangana, mudi bena ditaba ne bua kuenza tshintu tshimue mu Tshisumbu tshiabu, kabidi mudibu ne bua kuandamuna ne kanemu ku nkonku yonsu idi bantu badi kabayi bena ditaba babela (2.11—4.19). Mu tshit. 5 mufundi udi ubela bakulu (nansha bamfumu ba Tshisumbu), bansonga, ne bena ditaba bakuabu bonsu, ubambila ne: munkatshi mua makenga nuikale bantu bashindame, badi batekemena bidi Mvidi Mukulu mubalaye! Ku ndekelu kua mukanda wende udi wela bantu muoyi.Mufundi udi ulomba babadi ba mukanda wende bua bananukile mu njila wa ditaba, nansha makenga abakuata, bualu badi ne bua kujadikila bantu Lumu lua Disanka, kubamanyisha mu nsombelu wabu mujima “malu a dikema adi Mvidi Mukulu muenze” (2.9). Nanku bantu badi kabayi bena Kristu “pafika Mvidi Mukulu, nebajingulule malu enu mimpe; kabidi ne batumbishe Mvidi Mukulu” (2.12).
