Abakuke Diumvuija - MUKANDA WA MYIDI MUKULU（TSH96）
Diumvuija— Mukanda wa Abakuke udi utuleja mudimu wa muambi mu tshikondu tshia ndululu mikole: muambi udi umvua dikenga dia bakuabu bu dikale diende; udi ubela patoke benji ba malu mabi, ulomba Mvidi Mukulu bua abanyoke, usanka padi Mvidi Mukulu ukumbaja tshidiye ujinga. Bumue mbafunde mukanda ewu bu mu tshidimu tshia 600 bgbg ne Y.K., tshikondu tshivua bena Babilone badie bumfumu mu matunga mavule a mu Aziya mukese luseke ludi diba dibuelela lua Babilone. Ke tshikondu tshivua bena Izrayele kabidi badikonke ne bowa ne: kutuyaya nkuepi? Mvidi Mukulu utshidi wenda netu anyi?Mvidi Mukulu udi wandamuna muambi, umumanyisha bidiye ne bua kuambila bantu ba mu tshikondu tshiende, ne bantu ba mu bikondu bionsu ne: muntu udi witaba Mvidi Mukulu, ukumbaja tshidiye musue, neapete muoyi (2.4). Nanku, tuindile ne ditekemena dijima tshikondu tshidi Mvidi Mukulu ne bua kuleja bumfumu buende patoke (tshit. 3).Misangu mivule bantu bavua babala mukanda wa Abakuke mu tshikondu tshia lutatu, bua bamone mua kukolesha ditaba diabu, bashala kutekemena kudi Mvidi Mukulu. Polu kabidi uvua ulongesha bena Kristu ba kumpala ne: nuitabe Mvidi Mukulu, nutekemene kudiye, bualu mmudileje patoke munda mua Yezu Kristu (Rom 1. 17; Ngal 3.11; tangila kabidi Ebr 10.38.)
