Sira 9 - MUKANDA WA MYIDI MUKULU（TSH96）

Dimukayi bua bakaji(25.21-26; Dib 5.12-15; Nsum 5.1-20; 6.24-35; 7.5-27)

1Paudi munange mukajebe kumufuidi mukawu to,

bualu udi mua kumufikisha ku lungenyi lua kukuenzela bibi.

2Kuena mua kudifila kudi mukaji mukuabu nansha umue to,

bualu udi mua kuvua kukudiata mu dikasa.

3Kuena mua kulaya mukaji muena tshiendenda tshintu,

bualu udi mua kuvua kupona mu buteyi buende.

4Kuena mua kusesela mukaji udi wimba lunkomba, bualu udi mua kuvua kupona mu milowu yende.

5Kuena mua kulengamena nsongakaji,

bualu udi mua kutuula makuta bikole.

6Kuena mua kudifila kudi bakaji bena buendenda,

bualu udi mua kubabutuila biudi nabi.

7Lekela kukenzakana eku ne eku paudi mu misesu,

kuikadi wenda nansha wimana miaba idi kayiyi bantu.

8Lekela kutangila mukaji muimpe,

kabidi kulengamenyi mukaji mulengela udi kayi webe.

Bantu ba bungi mbajimine bua bulenga bua mukaji,

bualu bua mukaji mulenga, dinanga didi ditema bu kapia.

9Kuena mua kusomba pamue ne mukaji wa bende,

nansha kunua nende mala.

Bualu majinga ebe a tshianana adi mua kukujimija.

Mmunyi mutudi mua kudisunguila balunda

10Kulekedi mulunda webe wa kale,

bualu mulunda mupiamupia kena ne mushinga wa momumue ne wende.

Mulunda mupiamupia udi bu nwinyo mupiamupia,

badi mua kumuangata ne mushinga amu padiye ukulakaja.

11Kualakanyi dikasa dimpe dia muena buenzayi,

bualu kuena mumanye dikenga didi dimuindila.

12Kuena mua kusanka bua dikasa dimpe dia babi,

umanye ne: kabena bafua Mvidi Mukulu kayi mubanyoke.

13Umbuka kudi muntu udi ne bukole buakushipangana:

nenku lufu kuluena mua kukukuatshisha bowa.

Kadi paudi uya kudiye, kuenji bualu bubi to, bualu udi mua kukushipa.

Manya ne: udi wenda munkatshi mua mateyi,

kabidi udi muaba wa kulongela ndudi,

anu bu mudi muntu udi wenda pa mutu pa bimana bia tshimenga.

14Keba muebe muonsu mua kumanyangana ne bantu.

Kadi ukebe ngenyi amu kudi badi ne meji.

15Yukila ne bantu ba lungenyi.

Mayuki ebe ikale pa mikenji ya Muena Kulu.

16Udie ku mesa ne bantu,

badi banemeka mikenji ya Maweja-Nangila.

Disanka diebe dikale amu bua paudi utshina Mvidi Mukulu.

Bantu badi balombola bakuabu

17Bantu badi batumbisha bena midimu ya bianza bua midimu idibu benza,

kadi badi batumbisha mulombodi wa ditunga

bua meji adiye wakula nawu.

18Muena mutoyi badi bamutshina mu tshimenga.

Udi wakula kayi wela meji, badi bamudiwula kudi bantu.