Tobite 8 - MUKANDA WA MYIDI MUKULU（TSH96）

1Bobu bamane kujikija kudia, diba dia kulala dikumbana, kulombolabu nsongalume mu tshibambalu.

2Tobiyase kuvuluka mibelu ya Rafayele, kupatulaye mu tshibuta tshiende, mutshima ne muoyi bia mushipa, kubiteka pa makala a kapia mu mbabula wa tshioshelu tshia manananshi.

3Mupuya kutangalaka, kuipata mukishi mubi, kunyemenawu mu kapepele too ne ku Ejipitu. Rafayele kuulondakaja, kunkuatshila mu ditunga adi. Diakamue kuusuika nkanu.

4Baledi bamane kupatuka mu tshibambalu, kuinjilabu tshiibi. Tobiyase kujuka pa bulalu, kuambila Sara ne:

— Juka, muena kuanyi, tutendelele, tulombe Maweja-Nangila bua atuleje luse kabidi atulame.

5Sara kujuka, kutendelelabu Maweja-Nangila, bamusengelela bua abalame. Telejayi muvua Tobiyase utendelela:

— Mvidi Mukulu wa bankambua betu, tudi tukutumbisha!

Dina diebe ditumbe bikondu bionsu bitshidi kumpala!

Bifukibua bionsu bidi mu diulu ne

bidi pa buloba bikutumbishe kashidi!

6Wewe kufuka Adame, kumupa Eva,

mukajende bua amuambuluishe, amulame.

Kudi bobu babidi ke kudi bantu bonsu bafumina.

Wewe kuamba ne: Ki mbimpe bua muntu mulume ikale nkayende.

Ndi mmuenzela udi mufuanangane nende.

7Kadi, Maweja-Nangila, ki mbualu bua kumpukapuka to,

pandi nsela mukaji uudi mumone ewu, kadi ndi mukulamata.

Utufuile luse,

kabidi utufikishe pamue ku bukunda.

8Pashishe bonsu babidi kuambabu kabidi ne:

— Amene! Amene!

9Pashishe kuangatanganabu butuku abu.

10Butshia, Raguwele kujuka, kubikila bena mudimu bende bua kuyabu kumbula lukita. Bualu uvua wamba ne: “Pikala Tobiyase mua kufua, bantu nebatupetule kabidi batuseka.”

11Bobu bamane kujikija diumbula dia lukita, Raguwele kupingana mu nzubu muende, kubikila mukajende,

12umuambila ne:

— Utume mukaji muena mudimu aye mu tshibambalu bua kumona ne Tobiyase udi ne muoyi anyi? Pikalaye mufue, tudi mua kumujika muntu nansha umue kayi mua kumanya.

13Bobu kubikila mukaji muena mudimu, kumupabu muendu mutemesha. Pashishe kunzululabu tshiibi tshia ku tshibambalu. Mukaji muena mudimu kubuela, kubasangana bonsu babidi balala tulu tukole.

14Kupatukaye wamba ne:

— Badi ne muoyi. Bonsu babidi badi bimpe.

15Raguwele kuela Mvidi Mukulu muena kulu tuasakidila, wamba ne:

— Mvidi Mukulu, udi muakane bua bantu bonsu

badi ne muoyi muimpe bakutumbishe.

Bakutumbishe bikondu bionsu.

16Ndi nkuela tuasakidila bua disanka diudi mumpe.

Bualu bimvua ntshina, kabiena bienzeka to.

Bu muudi ne muoyi mulenga, udi mutuambuluishe.

17Ndi nkuela tuasakidila bu muudi mufuile bana babidi aba luse,

wa balume ne wa bakaji, mbalela nkaya.

Maweja-Nangila, ubasankishe, ubalame.

Amu bua dinanga diebe, matuku onsu bobu bikale amu ne diakalenga.

18Raguwele kutumina bena mudimu bende diyi, diakamue kujibikilabu lukita butuku kabuyi buanji kutshia.

Tshibilu tshia dibaka

19Raguwele kuambila mukajende bua enze mampa a bungi. Pashishe Raguwele kuya ku tshikumbi, kuangata ngombe ibidi ne bimpanga binayi, kubilambisha. Ke muvua tshibilu tshituadija nanku.

20Raguwele kubikidisha Tobiyase, umuambila ne:

— Munkatshi mua matuku dikumi ne anayi, kuena mua kuanji kumuka apa nansha. Neulale amu kuanyi, udia, unua, bua usankishe muananyi wa bakaji uvua mupite kukenga.

21Padi bionsu bimane kupita, udi wangata tshia bibidi tshimue tshia bintu bindi nabi. Pashishe neupingane biakane kudi tatuebe. Tshikuabu tshitupa tshidi tshishale, neutshiangate kunyima kua lufu luetu. Kolesha muoyi muananyi, meme ndi tatuebe, Edna mmamuebe. Tudi bakunange bikole bu mutudi banange mukajebe biangatshile mpindiewu ne kashidi. Muananyi kutekeshi mu maboku to!