Sira Diumvuija - MUKANDA WA MYIDI MUKULU（TSH96）
Diumvuija— Bavua bafunde mukanda ewu kudi Yezu (Yoshuwa) kampande, muana wa Sirake (mu buena ebrewu Ben Sira). Ke mudi bena lelu binyika mukanda ewu ne ngua muana wa Sira. Ku kale bavua baubikila ne: mmukanda wa muena Ekeleziya, imue misangu bualu bavua baubala mu bisangilu bia bena ditaba. Mufundi uvua musombe mu Yerushalayime kumpala kua ndululu ya mu tshikondu tshia Bamakabe. Uvua mumanye bimpe bitambe Mikanda ya tshijila ya bena Izrayele. Uvua muendakane kabidi bikole, muikale wa mu tshisumbu tshia bena Meji.Nansha yeye muikale muntu uvua muanyishe meji mimpe a kudi bantu bonsu, nansha a bantu benyi, kavua muanyishe malu makuabu avua bena Ngreke bakeba kubueja mu ditunga, katshia Aleksandre munene wadikuata. Bualu malu aa avua mafuane kunyanga ditaba dia bena Yuda. Ke mudi muana wa Sira ukeba kuleja bena tshisamba tshiabu ne: Katuena ne bua kubaaba bantu ba bisamba bikuabu: bua malu adibu benza, bua bibidilu biabu, nansha bua ditendelela diabu dia nwidie. Bitudi tuetu nabi, bivua bankambua betu batushile, bidi bimpe bitambe.Bavua basangana bitupa bia mukanda wa muana wa Sira muvuabu baufunde mu buena ebrewu, kadi kabena bausangana onsu mujima to. Mukanda mujima utudi nawu lelu udi mukanda udibu bandamune mu buena ngreke kudi muikulu wa mufundi.Katuena mua kusunguluja bimpe menemene mudibu bakosolola bitupa bidi mu mukanda ewu. Kadi bidi bimueneka se: mufundi mmuabuluje dilongesha diende mu bitupa bitanu:(a) 1.1—16.23; (b) 16.24—23.27; (c) 24.1—32.13; (d) 32.14—42.14; (e) 42.15—50.24. Mu tshitupa tshia ndekelu etshi, mufundi udi utumbisha Mvidi Mukulu, bualu udi mufuki wa bionsu. Udi utua kabidi bankambua makumbu, biangatshile ku Enoke ne ku Nowa too ne ku Nehemiya ne mutuangaji munene Simone II, ufuile mu 195 bgbg ne Y.K.Mufundi ewu udi mulongi wa bavua bafunde mikanda ya meji (bu wa Yobe, kadi nangananga wa Nsumuinu). Udi uleja bansonga bionsu bidiye mumanye, ne bionsu bidiye mumonamona panu, bua kubalongesha mudibu mua kukumbaja bidi Mvidi Mukulu musue, mu malu onsu adi abenzekela.Mukanda wa Yezu, muana wa SiraMbangiluEwu ke mbangilu wa mukanda wa Yezu, muana wa Sira, mufunda kudi muntu uvua muwandamune mu muakulu wa Ngreke.(1) Tuvua bapete malongesha mavule mu mukanda wa Mikenji, mu mikanda ya Bambi (2) ne mu mikanda mikuabu. (3) Nanku bidi bimpe bua kutumbisha bena Izrayele bua malu onsu adibu balongesha kabidi ne bua meji adibu bafila mu mikanda eyi. (4) Kadi ki mbimpe bua muntu kukoleshaye amu mej i ende yeye nkayende pa kubala mikanda eyi to. (5) Bidi bimpe kabidi bua bantu bonsu badi bamanya malu aa, bambuluishe badi kabayi baamanya, (6) nansha pa kubalongesha, nansha pa kubumvuija malu adimu.(7) Ke pavua kaku wanyi Yezu mudifile bikole ku dibala (8) mukanda wa Mikenji, (9) mikanda ya Bambi (10) ne mikanda mikuabu ya bankambua betu. (11) Kulongaye malu mavule munda muayi. (12) Kadi uvua musue kufunda mukanda wende yeye bua kulongesha bantu bakuabu, kubumvuija meji avuaye mupete. (13) Nanku bonsu badi bajinga mua kulonga, pa kubala mukanda wende ewu, (14) nebamone mua kuya kumpala mu mudimu wabu wa kulengeja nsombelu wabu bilondeshile Mikenji.(15-17) Tudi tunusengelela bua nubale mukanda ewu ne muoyi muimpe ne ntema yonsu. (18) Nuikale ne lutulu panuamona (19) tuetu bapange mua kuandamuna bimpe malu makuabu, (20) nansha mutudi baditatshisha bua kuandamuna. (21) Bua malu a mu mukanda ewu adibu bafunda mu muakulu wa bena Ebrewu kaena umvuika momumue menemene (22) padibu baandamuna mu muakulu mukuabu. (23) Kabiena nanku amu bua mukanda ewu nkayawu. Kadi bidi nansha (24) bua mukanda wa Mikenji nansha bua mikanda ya Bambi (25) ne mikanda mikuabu kabidi. (26) Mudi amu dishilangana: malu adibu bandamuna kaena umvuangana bimpe menemene ne malu adi mu mukanda.(27-28) Meme kufika mu Ejipitu mu tshidimu tshia makumi asatu ne muanda mukulu tshia bukalenga bua Everjete, kushalamu kabidi matuku mavule. (29) Meme kusangana mukanda ewu balengulula kudi bantu. Mu mukanda ewu muvua dilongesha dia mushinga mukole. (30) Ke meme kuela meji ne: mbimpe kuandamuna mukanda ewu ne disuminyina ne mankenda mavule. (31-32) Mu tshikondu atshi, meme kukuata mudimu too ne butuku ne dianyi dimanya dionsu, (33) bua kujikija ne kutangalaja mukanda ewu mu bantu. (34) Mvua muwenze bua bonsu badi basomba ku matunga a bende badi basue kupeta meji ne (35) bonsu badi bajinga mua kuikala ne nsombelu muimpe mulondeshile Mikenji ya Maweja-Nangila.
