Balombodi Diumvuija - MUKANDA WA MYIDI MUKULU（TSH96）

Diumvuija— Malu adibu batulondela mu mukanda wa Balombodi ba ditunga, ke malu a ndululu avua enzeka biangatshile ku dibuela dia bena Izrayele mu ditunga dia Kenaane, too ne ku ntuadijilu wa Bukalenga. Tshitupa tshinene tshia mukanda tshidi tshitumanyisha malu a bamue “BANDUMBULULA,” muvuabu babinyika kale. Ke bantu bavua bapeta bumfumu buabu kudi Mvidi Mukulu. Kadi mudimu wabu kawena amu bua kukosa nsambu ya bantu nansha. Badi ne bua kulombola bantu, kubasombesha mu bupole. Ke mudibu ne bua kuipata benyi badi bakeba kuluisha tshisamba tshimue, nansha bisamba bishilangane bia bena Izrayele.Mukanda ewu udi ne bitupa binene bisatu:1. Malu a dibuela dia bena Izrayele mu Kenaane, too ne ku lufu lua Yoshuwa (1.1—2.10).2. Mvidi Mukulu udi usungidila bantu bende, pa kusungula ne kutuma bantu badi mua kubapikula, kubapatula mu njiwu (2.11—16.31).3. Badi batulondela malu abidi adi atuleja mudi bisamba bia bena Izrayele, kumpala kua ntuadijilu wa Bukalenga, kabiyi biumvuangana bimpe (17-21).Mukanda wa Balombodi ba ditunga udi utulongesha ne: malu adi enzekela bena Izrayele adi alondeshila mudibu bumvuangana ne Mvidi Mukulu. Padibu batombokela Mvidi Mukulu, bena Kenaane, nansha bantu ba mu matunga makuabu, badi babakengesha. Padibu bapingana kudi Mvidi Mukulu, bamuela mbila, udi ubapikula. Kadi misangu yonsu, bena Izrayele badi amu bakeba kutendelela mvidie ya mu ditunga dia Kenaane, nansha bajinga bua Mvidi Mukulu abenzele mudibu basue bobu (tshit. 17 ne tshit. 18). Misangu mivule kabidi badi bapua muoyi bivua Mvidi Mukulu mubalombe (tshit. 19 too ne ku tshit. 21). Padibu benza nanku, badi mua kubutuka, bualu Mvidi Mukulu kena ubambuluisha kabidi diba adi. Tshitupa tshisatu tshia mukanda tshidi tshituleja nangananga makenga adi bena Izrayele bapeta padibu badienzela malu mudibu basue, balengulula Mvidi Mukulu. Lukonku lunene luvua bantu ba Mvidi Mukulu ne bua kudiela tshikondu atshi luvua ne: “Muntu yonsu udi mua kudienzela malu mudiye musue anyi? Muntu yonsu udi mfumu wende nkayende anyi?”