Nsumuinu Diumvuija - MUKANDA WA MYIDI MUKULU（TSH96）
Diumvuija— Mukanda ewu udi musangishe tukanda tushilangane tuvua ne nsumuinu nansha malongesha a meji. Bavua bateke bionsu ebi, ku bumfumu ne mu dina dia Shelomu, mukalenga uvua bena Izrayele bavuluka bu muena meji wa kalanda-musenga.Ku kale mu matunga a kudi diba dipatukila, bantu bavua banange bikole nsumuinu. Ndelanganyi ya bantu ivua ishilangana nsumuinu, bualu idi ileja meji avua bantu bapeta ku kakese ku kakese mu malu avua abenzekela. Tukanda tudi mu mukanda ewu mbatufunde mu bikondu bishilangane.Tudi mua kusangisha nsumuinu eyi mu bitupa bisatu:1. Mbangilu (bit. 1-9): badi bumvuija mudimu wa meji ne buneme buawu. Misangu mivule meji udi umueneka bu muntu udi wambuluisha Mvidi Mukulu mu mudimu wende; tangila nangananga kasala kimpe katambe ka 8.12-31.2. Nsumuinu mene (bit. 10-29:) ya Shelomu (10.1—22.16 ne 25.1—29.27,) ne ya bena meji bakuabu (22.17—24.22 ne 24.23-34.)3. Ndekelu (bit. 30-31:) mudi tualu tunayi tushilangane, tubidi tuleja lungenyi nansha mibelu, bia bena meji bavua kabayi bena Izrayele (30.1-14 ne 31.1-9.)Mukanda wa nsumuinu kawena utumanyisha malu a kale, nansha malu atshidi kumpala a bena Izrayele, mudi mikanda mikuabu idi mu mukanda wa Mvidi Mukulu yalongesha. Dilongesha diawu didi ditangila muntu nkayende, muntu nkayende. Mibelu yawu idi misue kuambuluisha muntu bua ashindame mu bantu, apete diakalenga, padiye wanyisha bua Mvidi Mukulu amuludike. Meji adibu batulongesha adi afuma ku malu atudi tumonamona enzeka matuku onsu. Mukanda udi utujadikila ne: Bumfumu buonsu budi kudi Mvidi Mukulu. Nanku muntu udi mua kupeta diakalenga padiye ukumbaja bidi Mvidi Mukulu musue. Bantu babi, batshimbakane, nansha bamue babanji, nebapete dikasa dibi, nebamone diakabi. Kadi bantu ba nsongu, bena meji, bantu badi bambuluisha bapele, nebapete diakalenga, bualu badi benza malu mimpe panu.Nsumuinu idi mua kutuambuluisha bua tumanye mianda ivua bena Izrayele bamonamona panu, kabidi ne meji avuabu bapete. Idi ituleja muvua bena meji babu batangila nsombelu wa bantu panu, makenga abu, ntatu yabu, nkonku yabu. Nansha bidimu bivule bikale pankatshi petu nabu, kadi mianda yonsu ayi idi amu mifuanangane ne itudi tuetu bena lelu tumona matuku onsu aa.
