Yobe 1 - MUKANDA WA MYIDI MUKULU（TSH96）

Mvidi Mukulu udi uteta Yobe musangu wa kumpala

1Ku kale, mu ditunga dia Usa, muvua muntu dina diende, Yobe. Muntu ewu uvua unemeka Mvidi Mukulu, umuitaba, uvua muntu muimpe, mubenge malu mabi.

2Uvua tatu wa bana ba balume muanda mutekete, ne ba bakaji basatu.

3Uvua ne mikoku binunu muanda mutekete, nyama ya tumelu binunu bisatu, nyama ya ngombe milume ne mikaji tshinunu, ya mpunde mikaji nkama itanu. Uvua kabidi ne bena mudimu bavule. Bantu bonsu bavua basombe ku luseke lua Palestine ludi diba dipatukila, amu yeye ke uvua mubapite ku bubanji ne ku biuma.

4Misangu yonsu, bana bende ba balume bavua baya, lelu mua muanabu kampanda, maloba mua mukuabu. Diba adi, bavua babikila kabidi bana babu ba bakaji bua kudia kuondoloka.

5Pavua masanka ajika, Yobe uvua ubikidisha bana bende, ujuka patshiatshia, ulambula Mvidi Mukulu mulambu wa kosha bua kukobolola yonsu wa kudibu. Yobe uvua wela meji ne: “Bumue bana banyi mbenzele Mvidi Mukulu bibi, nansha bapenda Mvidi Mukulu mu meji abu kabayi bamanye.” Ke muvua Yobe wenza misangu yonsu nanku.

6Kadi dituku dikuabu, batumibue ba Mvidi Mukulu bavua bamanyisha Maweja-Nangila bivuabu bamona. Satane mufundianganyi uvua kabidi munkatshi muabu.

7Maweja-Nangila kukonka mufundianganyi ne:

— Udi ufuma penyi?

Mufundianganyi kuandamuna Maweja-Nangila ne:

— Ndi mfumina ku diendakana pa buloba.

8Maweja-Nangila kumuebeja ne:

— Uvua mumone muntu wanyi Yobe. Pa buloba kapena muntu nansha umue udi mufuanangane nende to. Yeye ke muntu udi unnemeka, ungitaba. Udi muntu muimpe, mubenge malu mabi.

9Ke mufundianganyi kuandamuna ne:

— Padi Yobe mukulamate mbua patupu anyi?

10Wewe udi mumulame bimpe, ne diku diende ne bintu biende bionsu. Udi mumututshishe dikasa dimpe mu bintu biende bionsu. Bimuna biende mbitangidika ditunga dijima.

11Ndi nkujadikila ne: bu wewe mua kumunyenga bionsu bidiye nabi, neakuele mulawu bantu bonsu bumvue.

12Maweja-Nangila kumuandamuna ne:

— Nanku, angata bionsu bidiye nabi. Kadi kumulengi yeye nansha.

Ke mufundianganyi kumuka muaba uvua Maweja-Nangila.

13Dituku dikuabu bana ba Yobe bavua badia banua kua tatuabu.

14Ke muntu kufika kudi Yobe ne mukenji, umuambila ne: “Tuvua tudima ne nyama ya ngombe, nyama ya mpunde mikaji ivua idia mu mpata pabuipi netu.

15Kadi bena Saba kufika, kutunyenga nyama yonsu, kushipa ne bena mudimu bebe. Amu meme ke udi munyeme bua kukumanyisha bualu ebu.”

16Muntu awu utshivua wakula, muena mudimu mukuabu kufika kabidi bua kumanyisha ne: “Nkuba mmushipe mikoku ne bena mudimu bebe, mmubioshe bionsu. Amu meme nkayanyi ke udi munyeme bua kukumanyisha bualu ebu.”

17Utshivua amu wakula, muena mudimu mukuabu kufika bua kumanyisha ne: “Bena Kasdime bavua bisumbu bisatu, mbakuate nyama ya tumelu baye nayi, mbashipe kabidi ne bena mudimu bebe, amu meme ke udi mulue bua kukuambila.”

18Patshivuaye amu wakula, muntu mukuabu kufika, umanyisha ne: “Bana bebe bavua badia banua kua tatuabu.

19Lupepele lukole lua mvunde lufumina mu tshipela, ndushimbule bimana binayi bia nzubu, nzubu mmubupukila, bana bebe kufua. Mu nzubu amu meme ke udi mupande bua kuvua kukuambila.”

20Ke Yobe kujuka, kupanda tshinkutu tshiende, kubeya nsuki, kudishinda mutue mpala panshi.

21Wamba ne:

Panu bavua bandele butaka,

nengumuke kabidi panu amu butaka.

Maweja-Nangila kumpesha bionsu,

amu yeye kubiangata tshiakabidi.

Ndi ntumbisha amu kutumbisha Maweja-Nangila.

22Yobe kavua muenze tshilema nansha tshimue mu makenga aa onsu avua mamukuate. Kabidi kavua mujane Mvidi Mukulu ku bualu nansha bumue to.