Zekarya Diumvuija - MUKANDA WA MYIDI MUKULU（TSH96）
Diumvuija— Tudi mua kuinyika mukanda wa Zekarya ne: mukanda wa ditekemena. Udi utuleja nangananga muvua bena Izrayele ku kakese ku kakese bamona bimpe bivuabu batekemena menemene. Mukanda ewu udi ne bitupa bibidi bishilangane:1. Bit. 1-8: bidi ne malu avua muambi mulongeshe mu bidimu 520-518 bgbg ne Y.K.; nanku mu tshikondu tshivua Agayi pende mulongeshe bantu. Zekarya udi ufunda malu avua Mvidi Mukulu mumuleje, mumujadikile ne: panudi nuibakulula nzubu wanyi, nuenzulula tshimenga tshia Yerushalayime, bua tshisangishe bena Izrayele bonsu mu bobumue, nenutuadije tshikondu tshipiatshipia. Mvidi Mukulu mmusungule kabidi Zerubabele, mulombodi wa ditunga, ne Yeshuwa, mutuangaji munene, bua baludike bantu mu mudimu awu.2. Bit. 9-14: ke bitupa bivuabu bafunde matuku a bungi kunyima kua bit. 1-8. Bitupa ebi bidi bileja mudi bena Izrayele batuadija kutekemena nangananga tshikondu tshidi Mvidi Mukulu nkayende wasa bukalenga buende pa buloba bujima. Neabuase ku mudimu wa muntu, udiye mudisunguile. Mukanda udi uleja muavua muntu ewu, udi ne bua kubueja bukalenga bua Mvidi Mukulu mu bantu, apa udi mukalenga wa bupuekele, udi utshimuna baluishi; udi bu mulami wa mikoku; pamue apa udi mutumibue wa Mvidi Mukulu udi bantu bashipe. Bafundi ba mikanda ya Lumu lua Disanka badi batuleja ne miaku ya muambi ewu, mudi Yezu, kabidi mudi mudimu wende, nangananga bisama ne lufu biende (tangila Mat 21.4-5; 26.31; Mar 14.27; Yow 19.37).
