Estere ngreke 8 - MUKANDA WA MYIDI MUKULU（TSH96）

1Dituku dine adi, mukalenga Artashasta kupa mukalenga mukaji bintu bionsu bia Amane muena dishima. Kabidi Estere kujingulula mukalenga ne Mordekayi uvua wa ku mashi ende. Ke mukalenga kumubikidisha,

2kukopola kakanu ka munu ka bukalenga kavuaye munyenge Amane, kukapaye Mordekayi. Estere kupaye Mordekayi mudimu wa kutangila bintu bionsu bivua bia Amane.

Mukalenga udi wela mukenji udi ulengelela bena Yuda

3Estere kuyukila kabidi ne mukalenga. Kuponaye panshi ku makasa ende, umulomba bua akandike makenga onsu avua Amane mulongoluele bena Yuda.

4Mukalenga kuoluela Estere dikombu diende dia mpawungi, Estere kujuka, kuimana kulu pamue ne mukalenga,

5umuambila ne:

— Mukalenga, paudi mumone ne bidi bimpe, kabidi ndi mukutokela ku muoyi, ufunde mukanda bua kumushisha mikanda ivua Amane mumane kufunda bua kubutula tshisamba tshia bena Yuda tshidi mu bukalenga buebe.

6Meme mundi mua kuanyisha bua bantu ba tshisamba tshianyi bakenge, kabidi mundi mua kuitaba bua babutule tshisamba tshianyi mbishi?

7Mukalenga kuandamuna Estere ne:

— Ndi mukuenzele muuvua ujinga, ndi muoweshishe kabidi Amane, bualu uvua ukeba kubutula bena Yuda. Kadi tshiudi ujinga kabidi ntshinyi?

8Kadi wewe ne Mordekayi, nudi mua kufunda mikanda, kumvuija muonsu munudi basue kuyifunda mu dina dianyi, kuyitua tshitampi pamue ne kakanu kanyi. Bualu meme tshiena mua kushipa mukenji mumane kufunda mu dina dianyi, mutua ne tshitampi pamue ne kakanu kanyi.

9Mu matuku makumi abidi ne asatu a ngondu wa kumpala, mmumue ne ngondu wa Nisane wa tshidimu atshi, kubikilabu bafundi, kufundilabu bena Yuda mikanda, kuyipa kabidi baludiki ba ditunga ne ba mienampala ba mukalenga bavua bakuata mudimu mu bitupa bia buloba lukama ne makumi muanda mutekete. Bantu ba mu tshitupa tshia buloba bavua babafundila mukanda mu muakulu wabu.

10Bavua bafunda mu dina dia mukalenga, batua tshitampi ne kakanu kende ka ku munu. Pashishe bantu kuyabu ne mikanda.

11Batua bafunda mu mikanda amu ne: Bena Yuda badi mu bimenga bionsu bidi mu bukalenga balonde amu mikenji yabu, bambuluishangane, batatshishe baluishi babu amu bu mudibu basue.

12Mukandu awu utua ne mushinga mu bukalenga bonsu bua Artashasta amu dituku dituabu bamana kujadika, dia dikumi ne disatu dia ngondu wa dikumi ne muibidi, mmumue ne: Adare.

13“Mukanda ewu baulamike mu masangu onsu a njila adi mu bukalenga, bua bena Yuda bikale bamana kudilongolola bua kubunda baluishi babu, dituku divuabu bamana kujadika.”

14Babandi ba pa tubalu kuyabu lukasa bua kukumbaja mikenji ivua mukalenga muele. Kumanyishabu kabidi patoke bantu ba mu tshimenga tshia Suze mukenji uvua mukalenga mutume.

15Mordekayi kupatuka mu nzubu wa bukalenga, muasa tshifulu tshia mpawungi ne mukaba ne buanda bua mitshi bukunze. Bantu ba mu tshimenga tshia Suze kusankabu.

16-17Mu tshitupa tshionsu tshia buloba, mu tshimenga tshionsu ne mu miaba yonsu ivuabu babala mukanda ne baulamike, bena Yuda bavua basanka, balongolola didia dia disanka. Bua kutshina bena Yuda, bantu ba bisamba bikuabu bavua baditekeshisha panshi bua kushalabu bena Yuda.