Sira 13 - MUKANDA WA MYIDI MUKULU（TSH96）

Luvila kupitshi kuenda

1Paudi ulenga budimbu, budimbu budi bukukuata ku bianza.

Muntu udi wendakana amu kuendakana ne muena diditambisha,

udi uvua kufuanangana nende.

2Kuambudi bujitu budi bukupita makanda,

kabidi epuka mua kuendakana amu kuendakana

ne muntu udi mukupite makanda, nansha ne udi biuma bipite biebe.

Mudi luesu lua diima mua kupita lua tshiamu mbishi?

Luesu lua diima lututakane ne lua tshiamu,

lua diima ludi luzajika.

3Padi muena biuma muenzele muntu kampanda bibi,

amu yeye ke udi ubinduluka.

Padibu bakengesha mupele, mupele udi ulomba luse.

4Paudi ukuatshila muena biuma mudimu, udi ukunyenga biudi nabi.

Paudi ushala bianza bitupu, udi ukulekela.

5Paudi ne bubanji udi ukulamata.

Kadi udi ukunyenga biebe bionsu ukudiabi kayi upampakana.

6Padiye nebe dikenga udi ukulabidila,

ukutuila mimuemue, ukukolesha ku muoyi, ukuambila meyi mimpe,

ukuebeja ne: “Ndi mua kukuenzela tshinyi?”

7Neakufuishe bundu mu biende bibilu, padiye ukubikila,

too ne muudi udibutuisha misangu ibidi nansha isatu.

Paudi umubikila mu biebe bibilu:

udi ukuseka, ukupa mutu.

Pashishe, dinga dituku neakulengulule.

8Udimuke bua bantu kabakudingi,

kuikadi tshidingidingi, kabakupepeji nansha.

9Padi muntu munene ukubikila kuende, anji kubenga.

Nenku neakusengelele.

Lekela kunyema lubilu, bua kabavu kukuipata.

10Lekela kutalamina pa bule,

bua kabavu kukupua muoyi.

11Kuidikiji mua kuyukila nende bu bena mulongu.

Kuitabi bionsu bidiye ukuambila:

ku miaku yende mivule ne mimuemue

udi wipatshila mua kumanya amu muudi ubinduluka.

12Neatandule miaku iudi wamba, kakuikala ne luse,

bua kukumisha bikole, nansha bua kukuelesha mu lukanu.

13Utalame, wikale mudimuke.

Bualu udi wenda pabuipi ne kabutu kebe.

Bena biuma ne bapele

15Nyama yonsu ya mushindu umue idi yumvuangana,

ne muntu yonsu udi umvuangana ne bakuende.

16Nyama ya mushindu umue idi yenda pamue.

Muntu udi ulamatangana ne mukuabu.

17Ndiumvuangana kaayi didi munkatshi mua nkashama ne muana wa mukoku?

Nansha munkatshi mua bantu babi ne mua bantu badi balamata Mvidi Mukulu?

18Munkatshi mua nyama wa tshimungu ne mbua mudi diumvuangana anyi?

Kudi diumvuangana pankatshi pa muena biuma ne mupele anyi?

19Nyama ya mpunde ya muitu idi biakudia bia ntambue,

ke mudi bapele bikala biakudia bia babanji.

20Muena ditambisha udi upepeja muntu mupuekele.

Ke mudi muena biuma upepeja mupele.

21Padi muena biuma utendakana, badi bamuambuluisha kudi balunda bende.

Kadi padi mupele udishinda panshi, balunda bende badi bamubenga.

22Padi muena biuma utupakana, bantu bavule badi bamuambuluisha.

Padiye wakula malu a bupote, badi amu bamubingisha.

Kadi padi mupele utupakana, badi bamukanyina.

Yeye muambe bualu bua meji, kabena babuangata ne mushinga.

23Padi muena biuma wakula,

bantu bonsu badi bapuwa, batumbisha bidiye wamba.

Kadi padi mupele wakula,

bantu badi bakonka ne: “Yeye ewu nnganyi?”

Yeye amu mutetuke, badi bamusakila bua adishinde panshi.

24Biuma bidi bimpe padibi kabiyi bipetela ku bubi.

Kadi mu bupele kamuena bualu bua nsongu,

padibu dinyoka dia bubi.

25Bidi mu muoyi wa muntu bidi bidileja pa mpala,

nansha biobi bibi nansha bimpe!

26Tshimanyinu tshia muntu udi ne disanka,

mpadiye ne mpala wa mimuemue.

Kadi muntu udi ukeba nsumuinu udi upungila ne diela dia meji.