Meji 8 - MUKANDA WA MYIDI MUKULU（TSH96）

1Meji adi atangalaka ne bukole pa buloba bujima, nenku adi aludika bintu bionsu amu bilenga.

Meji adi bu mukaji wa lungenyi udi Shelomu musele

2Katshia bandela, Meji ke andi njinga, nkeba kabidi. Ndi muanange bua bulenga buawu, ke pandi njinga mua kuangata bu mudi muena kuanyi.

3Meji adi aleja lumu luawu lua ku tshifukilu, bualu adi asomba pamue ne Mvidi Mukulu. Mfumu wa bionsu udi muanange.

4Adi mamanye malu masokome a Mvidi Mukulu, akumbaja midimu yende yonsu.

5Biuma ke tshintu tshidi bantu bajinga panu panshi, kadi kabiena mua kupita Meji, bualu adi alongolola malu onsu.

6Lungenyi ludi ne bukole bushuwa, kadi Meji adi malupite, bualu adi alongolola bionsu bidi pa buloba.

7Pawikala munange buakane, wowu ke adi apatula ngikadilu milenga yonsu. Adi alongesha lutulu, muoyi muimpe, buakane ne bukitu, ke ngikadilu milenga ya mu nsombelu wa bantu panu.

8Pawikala ujinga kumanya malu onsu mu matuku mavule, Meji adi mamanye bia kale, apitakena mu malu masokome atshivuavua. Adi mamanye mua kumvuija bidi bantu bamba, andamuna ku nkonku yabu. Adi madianze kumanya bishima ne bia dikema biavua Maweja-Nangila kuenza, kabidi biavua bantu kulongolola panu ku tshikondu ku tshikondu.

9Ke pamvua musue kusela Meji, kuateka ku mbelu kuanyi, bualu neampeshe mibelu mimpe, neankoleshe ku muoyi mu ntatu ne mu mabungama.

10Ke pamvua ngamba ne: “Bualu buawu nengikale ne lumu muaba udi bantu basangile, nengikale ne butumbi munkatshi mua bakulumpe, nansha meme muikale muana.

11Nebamone ne: ndi mutabuluke mu dikosa dia nsambu. Bamfumu bine nebakatshile bualu buanyi.

12Meme mupuwe, nebashale bindile bua ngakule. Kadi meme muakule nebanteleje. Meme mutungunuke ne diakula, kabakunkandika, kadi nebanteleje ne ntema, bakuate tshianza ku mishiku.

13Nenshale ne muoyi kashidi bualu bua Meji. Badi bandonde panyima nebamvuluke kashidi.

14Nenshale muludiki wa bantu, bisamba bia bantu nebindamate.

15Patelabu dina dianyi, bamfumu ba tshikisu nebakuatshike bowa, nengikale bu mfumu muimpe nansha bu tshilobu tshia nwita.

16Diba dingapingana ku nzubu kuanyi, nengikale pabuipi ne Meji, bualu meme nawu kumbelu kuanyi tshiena nawu bilumbu, kaena ambungamija. Kadi adi ampesha disanka kabidi ne musangelu.”

Shelomu udi ushindika bua kulomba Meji

17Tshimvua mujadike ku bionsu ebi mu muoyi wanyi ntshiotshi etshi: Kudia bulela ne Meji, nkupeta muoyi wa kashidi.

18Kumyuangana ne Meji, nkuikala ne disanka menemene. Kukuata nawu mudimu, nkuvua mubanji kashidi. Ndi mumanye ne: badi bapeta lungenyi amu pa kukuata nawu mudimu matuku onsu ne kuitaba bidiwu amba. Nenku ke meme kuditua eku ne kuaka, ngenda nkeba meji bua meme kuikala nawu bu mulunda wanyi.

19Mvua muana mulenga mubidi, kadi mvua ne lungenyi lulenga.

20Tuamba ne: Bu mumvua wa malu malenga, ke mumvua mupete mubidi udi kauyi kalema.

21Mvua mumanye ne: bua meme kupeta Meji amu Mvidi Mukulu muampeshe, — kumanya kudi dipa edi difuma, mbualu bulenga bua lungenyi. Ke meme kutendelela Maweja-Nangila, mmulombe ne muoyi wanyi mujima bua kumpaye Meji.