Yirmeya 51 - MUKANDA WA MYIDI MUKULU（TSH96）

1Maweja-Nangila udi wamba ne:

“Nentume tshipepela tshikole

tshidi mua kubutula ditunga dia Babilone,

ne bantu bende.

2Nentumine bena Babilone bantu benyi

bua babipate mu ditunga diabu,

mudi lupepela lupepula bisota.

Dituku dindi ne bua kunyoka bena Babilone,

baluishi babu nebafume nseke yonsu.

Nebanyange ditunga kabayi bashiya kantu nansha kamue.”

3Nuenu badi ne buta, elayi mikete yenu mu tshimenga!

Nuluishe badi baditambisha

bua kazaku ka tshiamu,

kadibu bavuala.

Kanufuidi bena mvita bansonga luse.

Nubutule tshiluilu tshiabu tshijima!

4Bantu bavuabu batape mputa nebalale panshi,

mu buloba bua Babilone.

Bitalu bia bantu bafuile mu mvita

nebiuwule mu misesu ya tshimenga tente.

5Bualu Maweja-Nangila Mvidi Mukulu wabu wa bukole buonsu,

ki mmubenge bena Izrayele ne bena Yuda.

Kadi bena Babilone mbenzele Maweja-Nangila wa tshijila wa Izrayele bibi bitambe.

6Umukayi mu Babilone

nunyeme lubilu bua nupande.

Kabanushipi nuenu,

bua bilema bia bena Babilone.

Maweja-Nangila udi udisombuela.

Ke tshikondu tshidiye upingajila bena Babilone,

bibi bionsu bivuabu benza.

7Ditunga dia Babilone divua

mu tshianza tshia Maweja-Nangila

bu dikopu dia tshiamu tshia mpawungi.

Bantu ba buloba bujima

bavua banuinamu maluvu, bakuatshika.

Bisamba bionsu bivua bijimija lungenyi,

pavuabi binua maluvu avuamu.

8Kadi dikopu edi kubafuka ku bianza,

kudituuta panshi, kupandika tupese tupese.

— Eyi, ashilayi Babilone muadi,

numukebele buanga bua kumuondapa,

ne udi mua kusanguluka!

9Kadi benyi bonsu badi basomba mu Babilone, badi bamba ne:

— Tuvua bondapa Babilone, kadi kena musanguluke to.

Nanku tumuke tumushiye.

Tupingane muntu kuende, muntu kuende.

Bualu tshibawu tshiende ntshinene tshipite.

Udi umunyoka ke Muena Kulu!

10Maweja-Nangila mmutubingishe.

Tuyayi ku Siyone,

tumanyishe badimu malu onsu

avua Maweja-Nangila mutuenzele.

11Maweja-Nangila udi musue kubutula ditunga dia Babilone. Udi ukolesha bakalenga ba bena Madayi ku muoyi, bua bakumbaje tshidiye musue. Udi udisombuela, bua nzubu wende wa tshijila uvuabu banyange.

Nonayi mikete yenu,

nuyele tente mu nsapu.

12Nuele diyi dia nuenu

kubanga kuluisha bimenga bia Babilone.

Nuteke bena mvita ku nseke yonsu ya tshimenga.

Nuteke batentekedi.

Ke mudi Maweja-Nangila ukumbaja

tshivuaye mujadike bua kuenzela bena Babilone.

13Wewe Babilone, udi muase

ku muelelu wa musulu munene.

Wewe udi ne biuma bivule,

kuebe nkujika, wabutuku.

14Maweja-Nangila wa bukole buonsu

mmuditshipe wamba ne:

“Bu mundi Mvidi Mukulu mulelela,

nentume bantu bapite bungi,

bu mukongolu wa mpasu.

Nebabuele mu ditunga diebe,

nebele bibingu bia mvita.”

15Maweja-Nangila mmuleje bukole buende pa kufuka buloba.

Mmuleje lungenyi luende,

bualu mmushidike buloba ne bionsu bidimu.

Diulu dialabale didi dileja meji adiye nawu.

16Yeye mutume amu diyi

mayi adi unguila mu diulu,

mavuba manene adi abanda

afuma ku muelelu kua buloba.

Mikenya idi ipenya, ileja mvula njila.

Mpepele idi ipatuka mu mayeba a Maweja-Nangila.

17Padi bantu bamona bionsu ebi,

badi bu bantu bapale, kabayi bajingulula bidi bienzeka.

Bonsu bavua basonga mpingu,

badi bafue bundu,

bualu mpingu yabu ayi idi anu idinga bantu.

Kayena yeyela,

kayena ne mushinga.

18Bintu abi bidi bisekesha bantu.

Maweja-Nangila neabimanshe bionsu.

Pafikaye bua kukosa nsambu.

19Maweja-Nangila wa Izrayele

kena bu mpingu ayi to,

bualu Yeye ke udi mufuke bintu bionsu.

Mmusungule tshisamba tshia Izrayele,

bua tshikale tshiende yeye.

Dina diende: Maweja-Nangila wa bukole buonsu.

Babilone mmubutuke

20Maweja-Nangila udi wamba ne:

Wewe Babilone, uvua bu ngindu wanyi,

uvua bu tshiamu tshianyi tshia mvita,

bua meme kushipa natshi bisamba,

kubutula natshi makalenga.

21Meme kuzaza nebe nyama ya tubalu,

ne bantu badi babandapu.

Meme kuboza nebe matempu

ne bantu bavua baendesha.

22Meme kushipa nebe balume ne bakaji,

bana ne bantu bakole,

bansongalume ne bansongakaji.

23Meme kushipa nebe

balami ba mikoku ne mikoku yabu,

babidime ne nyama ivuabu badima nayi,

balombodi ba ditunga ne bamfumu bakuabu.

24Kadi Maweja-Nangila udi wamba ne:

Mpindiewu nenumone

mundi mpingajila bena Babilone

malu mabi onsu avuabu benzela Siyone.

25Eyowa, wewe Babilone, ndi nebe ne tshilumbu.

Udi bu nyama mubi udi ukeba

kubutula bionsu bidi pa buloba.

Kadi meme Maweja-Nangila ndi muluishi webe!

Nenkukuate mu bianza,

nenkuele mu kandondu,

nenkoshe ne kapia.

26Kabakusangana kabidi muebe

nansha dibue didibu mua kuasa

ku ditumba dia nzubu,

nansha ku bitaku biende.

Maweja-Nangila udi wamba ne:

Neushale kashidi tshipela tshidi tshikuatshisha bantu bowa.

27Nuele diyi bua babange kuluisha Babilone.

Nuele mpungi bua bantu ba bisamba bionsu bumvue.

Nutuadije mvita.

Nubikidishe bantu ba mu bukalenga bua Ararate,

bua Mini ne bua Ashekenaze,

Nusungule bantu badi mua kulombola bena mvita.

Nutume ku mvita nyama ya tubalu

bungi bu mukongolu wa mpasu ya mukumbi.

28Nusangishe bena mvita bonsu,

nangananga bakalenga ne bena Madayi,

ne balombodi ne bamfumu babu,

ne bantu ba matunga onsu adi ku diyi diabu.

29Buloba budi buzakala!

Tshikumina tshidi tshienzeka!

Bualu Maweja-Nangila udi ukumbaja tshivuaye muambe.

Udi unyoka ditunga dia Babilone.

Udi udienza tshipela,

muaba udi bantu kabayi mua kusomba.

30Bilobu bia mvita bia mu Babilone

bikadi bilekela kuluangana mvita.

Bikadi bisokoma mu nzubu yabi.

Kabitshiena ne bukitu,

bikadi bu bakaji.

Baluishi mbamane kuupula biibi bia tshimenga,

mbamane kuela kapia ku nzubu yatshi.

31Badi batuma bantu

bua banyeme lubilu,

bafike kua mukalenga wa Babilone,

bamuambile ne: baluishi mbakuate

tshimenga tshiebe tshijima tshia Babilone.

32Badi balama malobu,

bosha nzubu yetu

ituvua bakolesha ne bimana.

Bena mvita betu badi bazakala bikole.

33Maweja-Nangila wa bukole buonsu Mvidi Mukulu wa Izrayele, udi wamba ne:

Ditunga dia Babilone dikadi

bu buloba bua tshituilu budibu badiata,

bua bamone mua kushipula ntete ya kuenza bukula.

Nenku tshikondu tshia kunowa tshikadi pabuipi.

Maweja-Nangila udi usombuela bantu bende(Yerushalayime)

34“Nebukadnesare,

mukalenga wa Babilone,

mmundie, mmunsunsule,

mmushiye bu dilongu didi munda mutupu.

Mmumine bu mudi nyama wa tshidika wenza.

Udi muwuje difu tente

ne bintu bilenga bionsu bimvua nabi.

Pashishe yeye kungimansha.

35Bantu ba mu Siyone badi bajinga ne:

Bapingajile Babilone

bibi bionsu bivuaye mutuenzele.

Meme Yerushalayime ndi ngamba ne:

Banyoke bena Babilone

bua mashi etu avuabu bapumune!”

36Maweja-Nangila udi wambila bena Yerushalayime ne:

“Tshilumbu tshiebe ndi ntshiangata ne manza abidi.

Ndi nkunsombuela,

ngumishe musulu wa Perate,

nenkamishe mpokolu ya Babilone.

37Nembutule tshimenga tshia Babilone,

netshishale muaba udi nyama ya mibuabua ilala,

tshimenga tshidi bantu kabayi mua kuasa,

tshidi tshikuatshisha bantu bowa,

tshidi bantu batele bazakala.

38Eyowa, bena Babilone batshidi bonsu bu nyama ya ntambue

idi idila pamue,

bu nyama ya lonji idi ikungula, nzala mikole mimane kuyisuma.

39Ndi nyilongoluela didia dinene,

nenyinuishe maluvu ikuatshike.

Neilale bua kashidi,

kayena mua kujuka kabidi to.

Meme Maweja-Nangila ndi ngamba nanku.

40Ndi mfila bena Babilone ku tshishipelu

mudibu bafila mikoku,

bimpanga nansha mbuji ya mpumbu.”

Badi badila Babilone

41Akia! Ebi mbienzeke munyi?

Mudibu bakuata tshimenga tshia Sheshake,

tshivua ne butumbi mu buloba bujima mbishi?

Ebi mbienzeke munyi?

Munkatshi mua bisamba bionsu,

Babilone ukadi tshipela

tshidi tshikuatshisha bantu bowa!

42Mayi manene kufika too ne ku Babilone,

kumubikila ne muenji mukole.

43Bimenga biende mbinyanguke!

Ditunga diende dikadi tshipela,

muaba udi bantu kabayi mua kusomba,

muaba udi bantu kabayi nansha mua kupitshila.

44Maweja-Nangila udi wamba ne:

“Nennyoke Baale, mvidie wa bena Babilone.

Nemmulukishe bintu bionsu bivuaye mumine.

Bisamba bia bantu kabiena bifika kabidi

kudiye bua kumulambula.

Bimana bia tshimenga tshia Babilone

nebiupuke panshi.

45Nuenu bantu banyi,

umukayi mu tshimenga tshia Babilone.

Muntu yonsu anyeme lubilu bua ashale ne muoyi.

Anyeme tshiji tshianyi bualu tshidi tshikole!

46Kanutekeshi mu maboku, kanutshinyi. Lelu badi bamba nenku, maloba bamba munga! Bilondeshile mushindu udi bidimu, badi batela mudi bantu bakengeshangana pa buloba, mudi mukalenga wa tshikisu wipata mukuabu mu nkuasa wa bumfumu.

47Kadi tshikondu tshikuabu

nennyoke mvidie ya Babilone.

Mu ditunga dijima nemuikale amu bowa!

Bitalu bia bantu badibu bashipa mu tshimenga

nebishale panshi kabayi babijika.

48Mu diulu ne pa buloba nebele amu mbila ya disanka,

padi baluishi bafuma ku mutu kua ditunga

bua kuya kubutula Babilone.”

Ke Maweja-Nangila udi wamba awu.

(Muambi)

49Babilone mmushipe bantu

bapite bungi mu buloba bujima.

Kadi bu mudiye mushiye bena Izrayele ba bungi,

nebamubutule ne yeye kabidi.

50Nuenu bavua bapambuke mu mvita,

umukayi nuye, kanushadi apa nansha.

Muaba unuikala awu, nuele meji kudi Maweja-Nangila,

mwuluke Yerushalayime.

(Bantu ba Mvidi Mukulu)

51Tuvua ne bundu bua bungi

patuvua tunwua bipendu!

Tuvua ne bundu patuvua bamone bantu ba bisamba bikuabu,

babuele mu muaba wa tshijila mu nzubu wa Maweja-Nangila.

(Maweja-Nangila)

52Ke padi Maweja-Nangila wamba ne:

Tshikondu tshikuabu nennyoke mvidie ya mu babilone.

Mu ditunga dijima nebumvue

mikemu ya bantu bavuabu batapa mputa.

53Nansha bu Babilone mua kubanda mu diulu,

kuya kusokoma muaba mukole,

nentume baluishi bua bamupete,

bamubutule muaba awu.

Ke mundi meme Maweja-Nangila ngamba.

(Muambi)

54Telejayi:

Bantu badi bumvua mbila,

ifuma mu Babilone.

Mutoyi munene wa muadi udi mu ditunga dijima.

55Bualu Maweja-Nangila udi utuadija kubutula Babilone.

Neapuwishe mutoyi udi mu ditunga.

Baluishi badi bela mbila, babuela mu ditunga,

bungi bu bua mavuala a mayi manene,

ne tshiona tshikole bu tshia mavuala a muenji mukole.

56Badi basemena pabuipi ne Babilone bua kumukuata.

Badi bakuata bilobu, batshibula mata abu.

Bualu Maweja-Nangila udi Mvidi Mukulu

udi mumanye mua kusombola.

Udi upingajila muntu yonsu bivuaye muenze.

57“Nennuishe balombodi ba mu bukalenga buende, bena meji, bilobu, ne bamfumu bende, maluvu. Nebakuatshike. Nebalale bua kashidi, kabayi mua kujuka kabidi nansha.” Ke mudi mukalenga munene muambe! Dina diende mMaweja-Nangila wa bukole buonsu.

58Udi wamba kabidi ne:

“Bimana bialabale bia mu tshimenga

tshia Babilone nebabitonkole panshi.

Biibi biende bile nebabioshe!

Bantu badi bakuata mudimu patupu,

bualu bidi bisamba bienza nebibutuke mu kapia!”

Badi bimansha mukenji wa Maweja-Nangila mu musulu wa Perate

59-60Seraya, muana wa Neriya, ne muikulu wa Masheya, uvua mulombodi wa bena mvita, muambuluishi wa Sedekiya, mukalenga wa bena Yuda. Tshidimu tshinayi tshivua Sedekiya mu bukalenga, Seraya uvua muye pamue ne mukalenga ku Babilone. Yirmeya uvua mufunde mu mukanda, makenga onsu avua ne bua kukuata bena Babilone, ne mikenji yonsu ivua ibatangila, ituvua bafunde kumpala eku. Yirmeya kuambila Seraya ne:

61— Paudi ufika mu Babilone, neubale miaku yonsu eyi ne diyi dikole.

62Pashishe wamba ne: “Maweja-Nangila, wewe ke udi mumanyishe bantu ne: tshimenga etshi netshibutuke. Nansha muntu nansha nyama, kakusombamu kabidi to. Tshimenga etshi netshishale tshipela tshidi tshikuatshisha bantu bowa kashidi.”

63Kadi pawajikija kubala mukanda ewu, uusuike ku dibue, uwimanshe mu musulu wa Perate,

64wamba ne: “Ke mudi Babilone ne bua kudina mu mayi, kayi mua kupanda ku makenga adi Maweja-Nangila umutumina.”

Ke miaku ya ndekelu ya muambi Yirmeya.