Balombodi 4 - MUKANDA WA MYIDI MUKULU（TSH96）

Debora ne Barake

1Ekude mumane kufua, bena Izrayele kuenza kabidi malu mabi awa Maweja-Nangila mubenge.

2Maweja-Nangila kubafila mu bianza bia Yabine, mukalenga wa bena Kenaane, uvua musombele mu tshimenga tshia Ashore. Dina dia mfumu wa tshiluilu tshia Yabine divua Sisra, uvua musombele mu Aroshete-Ngoyime.

3Yabine uvua ne matempu a mvita a biamu nkama tshitema. Uvua mukengeshe bena Izrayele bikole bidimu makumi abidi. Nanku bena Izrayele kubikila Maweja-Nangila bua abambuluishe.

4Tshikondu atshi Debora, mukaji wa Lapidote, uvua muambi wa bena Izrayele, ukosa nsambu ya bantu.

5Uvua usomba muinshi mua dibue dia ngaji. Ke muvuabu binyika dibue adi ne: ndibue dia ngaji dia Debora. Divua pankatshi pa tshimenga tshia Rama ne tshia Betele, mu buloba bua mikuna bua Efrayime. Ke muaba uvua bena Izrayele baye kudi Debora, bua abalumbuluishe.

6Dituku dikuabu, Debora kubikidisha Barake, muana wa Abinoyame, uvua usomba mu Kadeshe mu buloba bua Naftali. Debora kuambila Barake ne:

— Teleja tshidi Maweja-Nangila Mvidi Mukulu wa bena Izrayele ukuambila bua kuenza: “Uye kusungula bantu balume binunu dikumi ku tshisamba tshia Naftali, ne tshia Zebulone. Uye nabu pa mukuna wa. Tabore.

7Nensonsole Sisra, mfumu wa tshiluilu tshia Yabine, bua kuyaye ku musulu wa Kishone. Muaba awu neakuluishe ne matempu a mvita, kabidi ne bena mvita bende mene. Kadi nemmufile mu bianza biebe.”

8Barake kuandamuna Debora ne:

— Mbimpe tuye nebe. Wewe mubenge, meme tshiena nya to.

9Debora kuitaba ne:

— Netuye nebe. Kadi kuakuikala ne lumu mu mvita eyi to, bualu Maweja-Nangila neafile Sisra mu bianza bia muntu mukaji.

Debora ne Barake kuya ku Kadeshe.

10Barake kusangisha bena Naftali ne bena Zebulone. Bantu balume binunu dikumi kuitaba bua kulonda Barake. Debora muine kuya nabu.

11Ebere, muena Kayine, uvua usomba pabuipi ne Kadeshe. Uvua muase ntenta wende ku luseke lua mutshi wa lusanga uvua mu Sananime. Uvua mumane kumuka munkatshi mua bena Kayine bakuabu, ndelanganyi ya Obabe, bukonde bua Moshe.

12Sisra kumvua lumu ne: Barake, muana wa Abinoyame, udi ku mukuna wa Tabore.

13Kusangishaye matempu ende a mvita a biamu nkama tshitema, ne bantu bende bonsu ku Aroshete-Ngoyime. Kumukabu muaba awu, bua kuya ku musulu wa Kishone.

14Ke Debora kuambila Barake ne:

— Juka! Lelu Maweja-Nangila neafile Sisra mu bianza biebe. Maweja-Nangila nkayende udi wenda kumpala kuebe!

Barake kutuluka ku mukuna wa Tabore. Bantu bende binunu dikumi kumulonda.

15Barake kutuadija mvita. Maweja-Nangila kunyemesha kumpala kuende Sisra, ne matempu ende a mvita, ne bena mvita bende bonsu. Sisra kushiya ditempu diende dia mvita, kunyema lubilu ku makasa.

16Barake kulondakaja matempu a mvita ne baluishi bende too ne ku Aroshete-Ngoyime. Kushipaye bena mvita ba Sisra bonsu. Kakuvua kushala muntu nansha umue ne muoyi to.

17Sisra kunyema lubilu ku makasa too ne ku ntenta wa Yayele, mukaji wa Ebere, muena Kayine. Bualu bena diku dia Ebere bavua bumvuangana ne mukalenga Yabine wa Ashore.

18Yayele kupatuka bua kuakidila Sisra, umuambila ne:

— Mfumuanyi, buelaku. Buela mu ntenta wanyi. Kutshinyi to! Sisra kubuela mu ntenta wa Yayele. Yayele kumusokoka mu mbulankete.

19Sisra kulomba Yayele ne:

— Bu wewe musue, mpeshaku mayi a kunua, bualu ndi ne nyota.

Yayele kubulula mulondu wa biseba uvua ne mabele, kumupeshaye tshiakunua. Kumubuikilaye mbulankete kabidi.

20Ke Sisra kumuambila ne:

— Wimane mu mushiku wa mbelu wa ntenta. Pikala muntu mufike bua kukukonka ne: “Muntu udi mu ntenta emu anyi,” umuandamune ne: “Muntu kenamu to.”

21Bu muvua Sisra mupungile bikole, kulalaye tulu tukole. Yayele kuambula ngindu ne mulonda wa tshitupa musongoloke uvua ku ntenta. Kusemenaye bitekete pabuipi ne Sisra, kumupopelaye mulonda awu ku mutu. Mulonda kumutubula mutu, kuya too ne mu buloba. Sisra kufua.

22Diba adi Barake, uvua wenda ulondakaja Sisra, kufika. Yayele kupatuka bua kusambakena nende, umuambila ne:

— Vuila apa, nkuleje muntu uudi ukeba.

Barake kubuela mu ntenta, kusangana Sisra mutandabale panshi mufue, mutu mutubula kudi mulonda musongoloke wa ku ntenta.

23Dituku adi Mvidi Mukulu kuanyisha bua bena Izrayele batshimune Yabine, mukalenga wa bena Kenaane.

24Bena Izrayele kuluisha mukalenga Yabine bikole. Ku ndekelu kumushipabu.