Estere ngreke 7 - MUKANDA WA MYIDI MUKULU（TSH96）

Mukalenga udi ujebula Amane, umufundila tshibawu tshia lufu

1Mukalenga ne Amane kuya kua mukalenga mukaji mu tshibilu

2musangu muibidi. Ku ndekelu kua didia, mukalenga kuebeja Estere ne:

— Mukalenga mukaji Estere, udi musue tshinyi? Tshiudi ujinga kupeta kundi ntshinyi? Ndi mua kukupesha nansha tshia bibidi tshia bukalenga buanyi.

3Estere kuandamuna ne:

— Mukalenga, pandi mukutokela ku muoyi, anyisha bua upandishe bena kuetu, umpandishe ne meme, ke tshindi nkulomba bua ungenzele.

4Tshisamba tshianyi ne meme pamue bavua babipana bua kutubutula pa buloba buonsu buetu, bua kuiba bintu bietu, kutuenza bapika tuetu ne bana. Mvua muanji kupuwa too ne lelu. Kadi bidi bibi bua muntu udi utujana, akuatshile midimu mu lubanza lua bukalenga.

5Mukalenga kuamba ne:

— Uvua ne dikamakama dia kuenza bualu bua nanku nnganyi?

6Estere kuandamuna ne:

— Amu muluishi wetu Amane ewu, ntomboji menemene! Amane kuzakala kumpala kua mukalenga ne kua mukalenga mukaji.

7Mukalenga kumuka mu didia kuya mu lupangu. Amane kutuadija kusengelela mukalenga mukaji, bualu uvua mudimona mu njiwu.

8Uvua mudiele mu nkuasa wa tshisaka uvua mukalenga mukaji musombe. Ke mukalenga kufika, ufumina mu lupangu. Kuelaye diyi ne:

— Udi musue kabidi kubuelela mukajanyi ku bukole amu mu nzubu muanyi anyi?

Amane umvua miaku ayi, kutangijaye mutu ku luseke ne bundu.

9Ke Bugatane, umue wa ku bena mudimu, kuambilaye mukalenga ne:

— Mukalenga, kudi tshiowelu tshivua Amane mulongoluele bua kuowa Mordekayi muntu uvua mukutanduile tshitungu tshivuabu bakuelela. Tshiowelu atshi ntshiasa kumpala kua nzubu wa Amane, tshidi ne bule bua metre makumi abidi ne atanu.

Mukalenga kutuma diyi ne:

— Bamoweleku!

10Ke kuowabu Amane pa tshiowelu tshivua tshilongoluela Mordekayi. Diba adi, mukalenga kutuyisha tshiji tshiende.