2 Petro Diumvuija - MUKANDA WA MYIDI MUKULU（TSH96）
Diumvuija— Mukanda ewu mmutumina bena Kristu bonsu basanga ntete (1.1). Mufundi udi uluisha bantu bavua babuela mu Tshisumbu tshia bena ditaba, balongesha malu adi abengangana ne Lumu lua Disanka. Malongesha abu a dishima adi atangalaja kabidi nsombelu mubi munkatshi mua bena ditaba. Mudi amu njila muimpe umue wa kuluisha bantu ba nanku: ke kuenza muebe muonsu bua umanye Mvidi Mukulu ne Yezu Kristu mu bulelela. Badi mua kutumanyisha Yezu nanku, se amu bantu bavua bamumone ne abu abidi, bumvue kabidi bivuaye ulongesha.Mufundi mumane kuela babadi ba mukanda wende muoyi (1.1-2), udi wanji kubumvuija mudi nsombelu mulenga wa bena Kristu. Udi ubalomba bua bitabe Mvidi Mukulu udi mubabikile, bavuluke bivua bantu bavua bamone Mfumu babajadikile (1.3-21). Pashishe udi ubenga muende muonsu bidi balongeshi ba malu a dishima bamba, kabidi benza (2.1-22). Mu tshit. 3 udi uleja bumue bualu budi bantu aba balongesha: badi baseka bantu badi batekemena dipingana dia Kristu, bamba ne: kakupingana to. Mufundi udi wandamuna, ujadika ne: padi Kristu kayi upingana lukasa, Mvidi Mukulu udi uleja mudiye ulama lutuulu, windila bua bantu bavule bapete mushindu wa kupanda.Mu bikondu bionsu balongeshi ba dishima badi badileja panu. Nanku mukanda muibidi wa Petro udi ubela bantu bonsu, ne kabidi tuetu bena lelu, ne: nuye kumpala mu dimanya dilelela dia Mfumu. Nanku kanuakuitaba malongesha a patupu.
