2 Samuwele Diumvuija - MUKANDA WA MYIDI MUKULU（TSH96）

Diumvuija— Mu ntuadijilu, mukanda ewu ne mukanda wa kumpala wa Samuwele ivua yenza mukanda umue, uvuabu binyika ne: ngwa Samuwele. Bualu ke muntu wa kumpala, udibu batele mu mikanda eyi, muikale ne muanzu munene. Kadi lelu mu mukanda muibidi wa Samuwele ewu, badi batulondela malu a mu bukalenga bua Davide, mukalenga wa kumpala udi ne bumfumu mu ditunga dijima dia bena Izrayele, mukalenga kabidi udi munene mupite bakuabu bonso.Mukanda udi utuadija ne miaku ya madilu, idibu bimba kudi Davide bua lufu lua Shawule ne muanende Yonatane. Pashishe mukanda udi utumanyisha muvua Davide mupete bukalenga bua tshisamba tshia Yuda (tshit. 1 too ne ku tshit. 4). Ishebale muana wa Shawule, kushala mukalenga wa bisamba bia ku mutu kua ditunga anu matuku makese. Yeye mumane kufua, bisamba ebi kudisanga kudi Davide, kumusungula mukalenga wabu. Nanku Davide kushala mukalenga wa bisamba bionso dikumi ne bibidi (tshit. 5 too ne tshit. 20). Mu tshit. 21 too ne ku tshit. 24, badi balonda malu mashilangana avuabu kabayi bafunde mu bitupa bia kumpala bia mukanda.Mukanda muibidi wa Samuwele udi utuleja Davide muende nuwuaye: muntu wa meji ne wa bukole, kadi muena bilema, muenji wa malu mabi kabidi. Mukanda kawena utusokoka makenga mavule avua akuata bena diku dia Davide. Nanku mukanda udi utuleja Davide bu muena bilema bu mudi bantu bonsu. Kadi udi utuleja kabidi muvua Davide ne ditaba dinene, bualu uvua munange mua kutonda bubi buende, munange kabidi mua kulomba luse kudi Mvidi Mukulu.Pashishe, nangananga matuku adibu bakengesha bena Izrayele, Davide neadileje bu mukalenga wa tshitembu, uvua Mvidi Mukulu mulaye bua kutumina bantu bende, bua abasungidile. Bena Izrayele nebavuluke bivua Mvidi Mukulu mulaye Davide mukana mua muambi Natane ne: kashidi ne kashidi, muntu wa ku ndelanganyi yebe neakupingane mu bukalenga (tshit. 7). Ke mutudi mua kumvua tshidibu binyikila Yezu, musungidi udi Mvidi Mukulu, utuma ne: “Muana wa Davide” (tangila Mat. 20.29-34; 21.9).