Sira 44 - MUKANDA WA MYIDI MUKULU（TSH96）

TUTUAYI BANKAMBUA MAKUMBU

1Tutuayi mpindiewu bantu ba lumu makumbu,

bankambua betu ne ndelanganyi yabu.

2Maweja-Nangila uvua mubasankishe bikole,

bobu batshidi ne mushinga biangatshile ku kale.

Bantu ba lumu ba kale

3Kuvua bakalenga, bamfumu mu makalenga abu,

bantu ba lumu bamanyike bua makanda abu,

bafidi ba ngenyi bavua ne lungenyi lutue,

kuvua kabidi ne bambi bavua bamanyisha malu mu dina dia Maweja-Nangila.

4Kuvua balombodi ba bantu bavua babaludika ne meji,

kuvua bana ba bakalenga bavua ne lungenyi lutue,

kuvua bena meji bavua bafunda bivuabu bamba,

kuvua kabidi ne balongeshi bavua ne dimanya dia nsongu.

5Ba bungi kusaka misambu mimpe,

kuenza tusala tuakane,

6kuvua babanji bavua banema amu kunema,

basomba mu nzubu yabu amu talalaa.

7Bantu aba bavua babatumbisha kudi bantu ba mu tshikondu tshiabu,

bavua ne lumu pavuabu benda panu.

8Bamue ba kudibu mbashiye dina diabu,

ditshidi bantu batumbisha.

9Bualu bakuabu kabena bashiya tshivulukilu panu.

Katshia baya, mbajimine bu bavua kabayi panu.

Bobu ne bana babu, bavua bu bantu bavua kabayipu.

Bankambua ba bena Izrayele

10Kadi tumbishayi bantu ba nsongu,

bavua ne nsombelu muimpe udi bantu bavuluka kashidi.

11Biuma bivuabu nabi bidi bifika kudi ndelanganyi yabu,

tunkanunuina tuabu tudi tubipiana.

12Ndelanganyi yabu idi ilama ndondu,

bana babu badi balonda bivua bankambua babu benza.

13Ndelanganyi yabu neyishale kashidi,

dina diabu neditumbe kashidi.

14Bitalu biabu bavua babijika ne disanka,

ne mena abu mbainyike ndelanganyi yabu.

15Bantu ba bungi badi batela meji avua bantu abu nawu,

bantu badi banemeka Maweja-Nangila badi babatumbisha.

Anoke

16Anoke uvua usankisha Maweja-Nangila, ke kumuambulaye mulu.

Kudi ndelanganyi yonsu, yeye ntshilejilu tshimpe,

tshia muntu udi ulamata Mvidi Mukulu.

Nowa

17Mvidi Mukulu kusangana Nowa muakane bushuwa.

Diba divua Mvidi Mukulu mufike munda,

Nowa ke uvua mutuadije tshisamba tshia bantu bapiabapia.

Pavua mvula wa tshipupu muloke,

bantu bavua bashala ne muoyi amu bua Nowa.

18Mvidi Mukulu kutua nende ndondu wa kashidi,

kumulaya ne: tshiena mbutula kabidi bia muoyi

ku mvula wa tshipupu nenku to.

Abrahame

19Abrahame, nkambua munene wa bisamba bivule bia bantu.

Kakuena muntu wa lumu bu luende.

20Kulondaye mikenji ya Muena Kulu,

kutuaye nende ndondu.

Kuenzaye tshimanyinu tshia ndondu ewu pambidi pende.

Nansha diba divua Mvidi Mukulu mumutete, uvua amu mumulamate.

21Ke pavua Mvidi Mukulu muditshipe bualu buende, wamba ne:

ku ndelanganyi yebe, ndi ngela bisamba bia bantu lupemba.

Ndelanganyi yebe neyivulangane bu lusenga lua pa buloba.

Ndelanganyi yebe nebayitumbishe bipite bia mulu.

Neyipete ditunga dialabale,

dituadija ku Mayi manene a luepu,

diya too ne ku Mayi manene a pankatshi,

dituadija ku musulu wa Perate diya too ne ku ndekelu kua buloba.

Izake ne Yakobe

22-23Mvidi Mukulu kushindikaye Izake malaya a momumue ne a tatuende Abrahame.

Kutuaye ndondu tshiakabidi ne Yakobe, wambulula ne:

nengele bisamba bia pa buloba lupemba bua ndelanganyi yebe.

Mvidi Mukulu kumujadikila ne: nenkuele lupemba,

nenkupe ditunga diudi mua kupiana.

Kudikosololaye mu bitupa, kubiabanyina bisamba dikumi ne bibidi.

Moshe(Diel 34.10-12)

23bKu ndelanganyi ya Yakobe,

Mvidi Mukulu kupatulaku muntu muakane,

uvua bantu bonsu banyishe,