Estere ngreke D - MUKANDA WA MYIDI MUKULU（TSH96）
Estere udi uya kudi mukalenga 1 Kupita matuku asatu, Estere kulekela kutendelela. Kuvulaye bilamba bivuaye utendelela nabi Mvidi Mukulu, kuvualaye bilamba bimpe. 2 Yeye mumane kuvuala biende bionsu bia bukalenga, kulombaye tshiakabidi diambuluisha kudi Mvidi Mukulu udi ulama bantu bonsu, ubepula ku njiwu. Estere kuangata bena mudimu bende babidi bakaji. 3 Kueyemenaye umue wa kudibu, 4 kadi munga uvua umulonda, mumulamina tshilamba tshiende tshivua tshienda tshikoka panshi. 5 Uvua ne mpala muimpe wa mimuemue ne dinanga, kadi uvua amu ne bowa munda. 6 Estere kupita biibi bionsu bia nzubu wa bukalenga, kufikaye kudi mukalenga. Kusanganaye mukalenga musombe mu nkuasa wa bukalenga, muvuala bilenga bionsu bia bukalenga, bikala bilamika mpawungi, ne mabue a mushinga mukole. Uvua ukuatshisha bantu buowa. 7 Kubandulukaye ne bumfumu bonsu, kumutangila ne tshiji, utapa disu. Mukalenga mukaji kuteketa mu maboku, kuputuka matama, kutokoloka, kutekaye mutu wende pa dikaya dia muena mudimu mukaji, uvua kumpala kuende. 8 Mvidi Mukulu kukudimuna lungenyi lua mukalenga bua apete lutulu. Mukalenga kupampakana, kujukaye lukasa mu nkuasa wende wa bumfumu, kumukuataye mu maboku too ne mudi Estere udiumvua muvuaye kale. Kumukoleshaye ku muoyi ne miaku mimpe ya ditalala. 9 Kumuebejaye ne:— Estere ntshinyi? Kutshinyi nansha, ndiku bua kukulama. 10 Kuena ufua to, bualu mukenji utudi bakandike bantu bakuabu bua kabafiki muaba undi, udi utangila amu bantu ba tshianana. 11 Semena apa. 12 Kujulaye dikombu diende dia mpawungi, kutekaye pa dikaya dia Estere. Pashishe kumupukilaye wamba ne:— Ngambila tshidi tshikufikisha apa ntshinyi? 13 Ke Estere kuandamuna ne:— Mukalenga pandi nkumona, ndi muitabe ne: ndi mumone mutumibue wa Mvidi Mukulu. Ke muoyi wanyi kunzakala munda bua bowa bua butumbi buebe. 14 Udi wenza malu a dikema, mpala webe udi tente ne dinanga! 15 Kadi mutshikale amu wakula, muoyi kumuteketa tshiakabidi. 16 Ke mukalenga kupampakana. Bena mudimu bende bantu balume kukebabu mua kufululula mukalenga mukaji.
