Estere ngreke 4 - MUKANDA WA MYIDI MUKULU（TSH96）

Mordekayi udi ulomba Estere bua abalumbuluile

1Mordekayi umvua nanku, kupandaye bilamba biende, kuvualaye bilamba bia madilu, kudielaye butu mu mutu. Kunyemakanaye mu masangu a mu tshimenga, wela diyi dikole wamba ne:

— Badi basue kubutula bena tshisamba tshidi katshiyi tshienza bualu nansha bumue!

2Pashishe kufikaye ku tshiibi tshia nzubu wa bukalenga, kuimanaku. Bualu kavua ne dianyisha dia kubuela mu lubanza lua mukalenga ne bilamba bia madilu kabidi ne butu mu mutu.

3Mu tshitupa tshionsu tshia buloba tshia bukalenga, tshivuabu bamanyisha bantu bua mukanda awu, bena Yuda bavua badila, badituta pa tshiadi. Bayua bavuala bilamba bia madilu, balala mu butu.

4Bena mudimu bakaji ne bantu batungu ba mukalenga mukaji, kumanyisha mukalenga mukaji bionsu bivua bienzeka. Yeye kupampakana bikole bua bualu abu. Pashishe kutuminaye Mordekayi bilamba bia kuvuala, bua umbushe bilamba bia madilu. Kadi Mordekayi kavua muanyishe nansha.

5Estere kubikila Akratayi, mutungu uvua mu dina diende, kumutuma bua aye kudi Mordekayi, amumvuije mudi bualu menemene.

7Ke Mordekayi kumumanyisha bionsu bivua bienzeka, kabidi ne muvua Amane mulaye mukalenga bua kuelaye nkanu mitoke ya mushinga mukole kilo binunu nkama isatu mu mushete wa mukalenga, bua bamone mua kubutula bena Yuda.

8Kumupaye kabidi mukanda uvua umanyisha bantu bonsu patoke mu tshimenga tshia Suze bua kabutu ka bena Yuda, bua auleje kabidi Estere. Mordekayi kulombaye kabidi Akratayi bua aye kulomba Estere bua aye kusengelela mukalenga bua tshisamba tshiende, bua mukalenga atshifuile luse. “Vuluka tshikondu tshiuvua ukenga, ne mumvua mukudishe ku tshianza tshianyi. Bualu Amane ke tshindonde tshia mukalenga mu bumfumu, nenku udi mua kuikala mutushiminyina malu, musue kutushipesha. Sengelela Maweja-Nangila! Udilumbuluile kudi mukalenga! Utuepule ku kabutu!”

9Akratayi kuvuaye kuambila Estere bionsu abi.

10Estere kuambila Akratayi ne: Uye kuambila Mordekayi ne:

11“Matunga onsu adi mu bukalenga mmamanye bimpe ne: muntu yonsu mulume nansha mukaji udi ubuela mu lubanza munda mua nzubu wa bukalenga kabayi bamubikila kudi mukalenga, udi ne bua kufua bulelela, amu udi mukalenga ufunkuina dikombu diende dia mpawungi udi upanda. Kadi meme, kuapitshi matuku makumi asatu adibu kabayi bambikila bua meme kufika kudi mukalenga.”

12Akratayi kumanyisha kabidi Mordekayi bionsu bivua Estere muandamune.

13Mordekayi kuandamuna Akratayi ne: “Uye kuambila Estere ne: Kedi meji ne: yeye nkayende mu bukalenga ke udi mua kupanda padibu bashipa bena Yuda.

14Nenku padiye ubenga mua kulumbuluila bena Yuda bua malu aa, bena Yuda nebapete diambuluisha ne lupandu muaba mukuabu. Nenku wewe neufue, diku diebe nedibutuke. Kadi tshiudi mua kuikala mushadila mukalenga mukaji ki mbua malu a mushindu ewu anyi?”

15Estere kupingaja muntu uvua muvue ne mukenji awu bua kumanyisha kabidi Mordekayi ne:

16“Uye kusangisha bena Yuda bonsu badi mu tshimenga tshia Suze, bajile biakudia bualu buanyi. Munkatshi mua matuku asatu, munya ne butuku kanuena mua kudia nansha kunua. Meme kabidi ne bakaji bena mudimu banyi netuenze momumue. Pashishe nenye kumonangana ne mukalenga nansha bikale bua kutupa ku diyi, nansha bua kufua.”

17Nenku Mordekayi kuya kuenza muonsu muvua Estere mumuambile.