Tobite 4 - MUKANDA WA MYIDI MUKULU（TSH96）

Tobite udi ubela muanende Tobiyase

1Dituku adi, Tobite kuvuluka lupetu huvuaye mutekeshe kudi Ngabayele mu tshimenga tshia Raguyese mu ditunga dia Madayi.

2Uvua udinungena wamba ne: “Bu mundi mumane kulomba bua kufua, mbimpe mbikile muananyi Tobiyase, mmumanyisha bua lupetu luanyi elu bangabanga ne meme tshiyi muanji kufua.”

3Kubikilaye Tobiyase. Diakamue yeye mumane kufika, ke Tobite kumuambila ne:

— Pangikala meme mufua, unjike bilenga. Unemeke mamuebe. Kumulenguludi dituku nansha dimue patshidiye ne muoyi. Umuenzele bionsu bidi mua kumusankisha. Kumubungamiji nansha ku kalu kamue to.

4Muananyi, uvuluke njiwu ya lufu yonsu ivuaye mumone bualu buebe diba divuaye kayi muanji kukulela. Padiye ufua, umujike mu lukita lumue nanyi ku luseke luanyi.

5“Matuku ebe onsu a panu, muananyi musuibue, uvuluke Maweja-Nangila. Kuenji malu mabi nansha, kubengi meyi ende. Matuku ebe onsu, wenza bidi biakane. Kulondi buenzayi.

6Bualu muntu udi wenza malu makane, udi ne disanka mu midimu yende.

7Benji ba malu makane, ubambuluishe bonsu ne muoyi wa kalolu. Kunyingaladi to. Kudiombodi mupele. Nenku Mvidi Mukulu kakukudiombola pebe to.

8Udi wambuluisha muntu ne tshiudi mukokeshe, bilondeshile bungi bua bintu biudi nabi, nansha padibi bia bungi, nansha padibi bikese. Kabidi paudi ne bintu bikese kuena mua kuelakana mua kupeshangana bintu bikese ebi to.

9Ke muudi ulama bubanji buebe bua mushinga mukole abu bua matuku a makenga.

10Bualu muntu udi upesha mupele tshintu, udi wepuka ku lufu. Muoyi wende wa kalolu awu, kawena umufikisha mu miidima ya kandondu ka lufu nansha.

11Nenku, bantu bonsu badi bambuluishangana badi balambula Mvidi Mukulu Muena Kulu mulambu muimpe.

12“Muananyi, udilame ku bibakabaka. Udianza kusela mukaji wa kuenu! Kuena mua kusela wa tshisamba tshikuabu to, nansha udi kayi wa ku batatuebe. Bualu tudi bana ba ku ndelanganyi ya bambi. Muananyi, uvuluke bankambua betu ba kale aba: Nowa, Abrahame, Izake ne Yakobe. Bonsu bavua basela bakaji ku meku abu. Mvidi Mukulu uvua mubeele lupemba. Meku abu kusanguka bikole. Uvua mulaye kabidi ndelanganyi yabu bua kupinganayi mu ditunga dia Izrayele.

13Nenku, muananyi, ujinge mua kusomba bimpe ne bana benu bena Izrayele. Kuditambishi kumpala kua balume ne bakaji ba bena Izrayele. Kubengi mua kusela mukaji munkatshi muabu. Bualu ditambisha didi difikisha ku kabutu ne tshimvundu. Kabidi lulengu kaluena lulela wa muoyi, ludi lulela dikenga ne tshiyole.

14“Difutu dia muena mudimu webe kadiladi, kadi umufutedi diakamue. Paudi ukuatshila Mvidi Mukulu mudimu nanku, Yeye neakufute. Udimuke mu malu onsu audi wenza. Muananyi, uleje muudi mumanye mua kusomba ne bakuabu.

15Kuena mua kuenzela muntu tshiudi kuyi musue bua bakuenzele. Kunu maluvu bua kukuatshika, dikuatshika dia maluvu kadiikadi tshibidilu kuudi.

16“Wabanyangana tshiakudia tshiebe ne bantu badi ne nzala, bilamba biebe ne bantu badi basunsuke. Paudi ne bivule, ubipe bapele ne muoyi wa kalolu. Kunyingaladi to.

17Ufike ne biakudia mu madilu a muntu muakane, kadi kuena mua kuenza nanku bua madilu a muntu mubi nansha.

18“Konka mibelu kudi muntu yonsu wa meji. Kubengi mibelu yende.

19Mumaluonsu, wela Maweja-Nangila tuasakidila. Kabidi umulombe bua akulombole mu njila mimpe, kabidi bua ukumbaje malu audi muelele meji ne audi wipatshila. Bualu meji nkabuji ka kapumbu. Kadi amu Maweja-Nangila ke udi wapa. Yeye kabidi udi upuekesha muntu udiye musue, umufikisha too ne mu kandondu ka lufu.

“Nenku, muananyi, lama mibelu eyi, kuyipu muoyi nansha kakese!

20“Kadi mpindiewu ndi musue kukutondela bualu. Mvua mutekeshe musangu mule lupetu luanyi lua biamu bitoke bia mushinga mukole kilo nkama isatu kua Ngabayele, muana wa Ngabri, mu musoku wa Raguwele mu ditunga dia Madayi.

21Bushuwa, muananyi, tudi bapele, kadi kupampakanyi nansha. Udi ne biuma bivule, paudi utumikila Maweja-Nangila, Mvidi Mukulu webe, paudi ubenga malu mabi onsu, wenza bidi bimusankisha.”