2 Bakalenga 1 - MUKANDA WA MYIDI MUKULU（TSH96）

Mvidi Mukulu udi ubenga tshidi Akaziya wenza

1Mukalenga Akabe mumane kufua, bena Mowabe kutombokela bena Izrayele.

2Dituku dikuabu, mukalenga Akaziya uvua mu tshibambalu tshia nzubu wende wa bukalenga wa tshilalakulu, uvua mu tshimenga tshia Samariya, kukulukaye pa dididishi, kudishinda, kutapikaye bikole. Bualu bua njiwu ayi, mukalenga Akaziya kutuma bantu mu tshimenga tshia Ekrone, bua kukonkamu mvidie Baale Zebube ne: nengumvue bimpe anyi?

3Kadi, mutumibue wa Maweja-Nangila kuya kuambila muambi Eliya, muena Tishebe, ne:

— Juka uye kusambakena ne bantu badi mukalenga Akaziya wa mu Samariya mutume, ubakonke ne: “Mu ditunga dia bena Izrayele kamuena Mvidi Mukulu anyi? Nudi nuya kukonka anu mvidie Baale Zebube, udi mu Ekrone bua tshinyi?”

4Pashishe ubambile kabidi ne: “Maweja-Nangila udi wambila Akaziya, mukalenga wa bena Izrayele ne: ‘Kuena ujuka kabidi mu bulalu buudi mulale emu to, neufue!’ ”

Muambi Eliya kuenza bionsu bivua Maweja-Nangila mumuambile.

5Diakamue, bantu abu kupingana kudi mukalenga Akaziya. Mukalenga Akaziya kubakonka ne:

— Nudi bapingane bua tshinyi?

6Kuandamunabu ne:

— Tudi basambakene ne muntu mukuabu, mutupingaje bua tuetu kukuambila ne: “Maweja-Nangila udi wamba ne: Mu ditunga dia Izrayele, kamuena Mvidi Mukulu anyi? Udi utuma bantu bua kukonka anu mvidie Baale Zebube udi mu Ekrone bua tshinyi? Bu muudi muenze nanku, kuena ujuka mu bulalu buudi mulale ebu to! Neufue!”

7Mukalenga Akaziya kubakonka ne:

— Muntu unuvua basambakena nende, uvua unuambila bionsu ebi, uvua mushindu kaayi?

8Kuandamunabu ne:

— Uvua muvuale tshilamba tshia miosa ya nyama wa kamelu, musuike mukaba mu tshimonu!

Mukalenga Akaziya kuela diyi ne:

— Muntu awu mmuambi Eliya, muena Tishebe!

Mukalenga Akaziya udi ukeba kukuata muambi Eliya

9Mukalenga Akaziya kutuma mulombodi, ne bena mvita makumi atanu, bua kukuata muambi Eliya. Bena mvita abu, kubanda ku lusongu lua mukuna uvua muambi Eliya musombe. Mulombodi wa bena mvita kuambila Eliya ne:

— Muambi wa Mvidi Mukulu, tuluka! Ke mudi mukalenga Akaziya mutume diyi!

10Eliya kuandamuna ne:

— Bu mundi muambi wa Mvidi Mukulu, ndi ndomba bua kapia kafume mu diulu kanubutule: wewe ne bantu makumi atanu banudi nabu!

Diakamue, kapia kufuma mu diulu, kubutula mulombodi wa bena mvita, ne bantu makumi atanu bavuaye nabu.

11Mukalenga Akaziya kutuma kabidi mulombodi wa bena mvita mukuabu, ne bena mvita makumi atanu, kudi Eliya. Mulombodi wa bena mvita kuambila Eliya ne:

— Muambi wa Mvidi Mukulu, tuluka! Ke mudi mukalenga Akaziya mutume diyi!

12Eliya kuandamuna ne:

— Bu mundi muambi wa Mvidi Mukulu, ndi ndomba bua kapia kafume mu diulu kanubutule: wewe ne bantu makumi atanu banudi nabu!

Diakamue, Mvidi Mukulu kupuekesha kapia. Kubutulaku mulombodi wa bena mvita ne bantu makumi atanu bavuaye nabu.

13Musangu muisatu, mukalenga Akaziya kutuma kabidi mulombodi mukuabu ne bena mvita makumi atanu. Kubandabu pa mukuna. Anu bamone Eliya, mulombodi wa bena mvita kutuaye binu panshi, utendakena Eliya, wamba ne:

— Muambi wa Mvidi Mukulu, kunshipi, kabidi kushipi bantu aba makumi atanu bandi nabu!

14Ndi mumanye ne: kapia kavua kafuma mu diulu ke kavua kabutula balombodi ba bena mvita babidi ba kumpala, ne bantu bavuabu nabu. Nanku, ndi nkusengelela, kunshipi to!

15Mutumibue wa Maweja-Nangila kuambila Eliya ne:

— Tuluka, uye nende, kutshinyi to.

Muambi Eliya kutuluka, kuya ne mulombodi wa bena mvita kudi mukalenga Akaziya.

16Eliya kuambila mukalenga Akaziya ne:

— Maweja-Nangila udi wamba ne: “Bu muudi mutume bantu kudi mvidie Baale Zebube, udi mu tshimenga tshia Ekrone bua kumukonka malu, mmumue ne: ku mesu ebe, mu ditunga dia bena Izrayele kamuena Mvidi Mukulu udibu mua kukonka malu. Nanku, kuena ujuka mu bulalu muudi mulale emu to, neufue!”

17Mukalenga Akaziya kufua, anu muvua Maweja-Nangila muambile muambi Eliya. Mukalenga Akaziya kavua ne muana wa balume to. Nanku, muanabu Yorame kumupingana mu bukalenga, mu tshidimu tshibidi tshivua Yorame, muana wa Yosafate, mu bukalenga bua bena Yuda.

18Malu makuabu a Akaziya mbaafunde mu mukanda udibu babikila ne: Malu adi bakalenga ba bena Izrayele benza.