Sira 10 - MUKANDA WA MYIDI MUKULU（TSH96）

1Muludiki wa tshimenga udi uludika bantu ne meji.

Padiye ne lungenyi bumfumu buende budi bushindama.

2Mudi mulombodi wa ditunga ke mudi kabidi ne balombodi bende ba bukalenga.

Mudi mulombodi wa tshitupa tshia buloba,

ke mudi kabidi ne bantu bende.

3Mukalenga udi kayi mulonge kalasa,

udi ubutula ditunga;

bamfumu ba lungenyi ke badi bashindika tshimenga.

4Bukalenga bua pa buloba budi bufumina kudi Maweja-Nangila.

Yeye ke udi ujula muntu udi mubuakanyine mu tshikondu tshidiye musue.

5Dikasa dimpe dia muntu didi difumina kudi Maweja-Nangila.

Yeye ke udi ufila bumfumu kudi muenji wa mikenji.

Ditambisha ne buenzayi

6Muntu mukuenzele bibi, kuena mua kumulamina lukuna,

kuena mua kubinduluka bikole paudi ne tshiji.

7Ditambisha didi dibipila Maweja-Nangila, dibipila kabidi ne bantu.

Tshinyangu tshidi tshikengesha Maweja-Nangila,

tshikengesha kabidi ne bantu.

8Bukalenga budi buya ku tshisamba ne ku tshikuabu,

amu bua tshinyangu, ditambisha ne buenzayi.

9Muntu udi buloba kabidi butu; mudiye uditambisha mbishi?

Yeye utshidi ne muoyi, munda muende mukadi bintu bibole!

10Disama dikole didi dipangisha munganga tshia kuenzaye.

Muntu udi lelu mukalenga, maloba udi ufua.

11Padi muntu ufua tshidiye ushala natshi,

ke bishi, nyama ne misanda.

12Muntu udi ubanga kuditambisha,

padiye ubenga Maweja-Nangila, utombokela udi mumufuke.

13Muntu udi ubanga kuditemba,

padiye kayi unemeka bumfumu bua Maweja-Nangila.

Muntu udi utungunukilamu udi udikebela malu mabi a bungi.

Ke padi Maweja-Nangila uvudijila bantu bakuabu makenga, ubabutula.

14Maweja-Nangila uvua mumbushe bamfumu mu nkuasa yabu ya bumfumu;

uvua mupingajemu bantu bapuekele.

15Maweja-Nangila kubutula bisamba bia bena ditambisha,

kupingajaye bisamba bia bantu bapuekele.

16Maweja-Nangila kunyanga matunga a bantu,

kuabutulaye onsu butubutuu.

17Kujimijaye bisamba bia bantu ba bungi pa buloba,

kubibutulaye kabatshiyi babivuluka kabidi.

18Maweja-Nangila kena mufuke bantu bua kuditambisha.

Bantu abu kabena babalela bua kufikabu munda.

19Tshisamba kayi tshidibu mua kunemeka?

— Ntshisamba tshia bantu badi batshina Maweja-Nangila.

Tshisamba kayi tshidibu mua kupepeja?

— Ntshisamba tshia bantu tshidi katshiyi tshinemeka mikenji ya Maweja-Nangila.

20Mfumu badi bamunemeka kudi bantu bende.

Kadi bantu badi batshina Maweja-Nangila,

mfumu udi ubangata ne mushinga.

22Kunemeka Maweja-Nangila, ndumu lua bamulamatshi bende bapiabapia,

ndua benyi ne bapele.

23Ki mbimpe kupetula muena meji udi kabidi mupele,

bidi bibi bua kutumbisha muntu udi wenza bibi.

24Bantu badibu batua makumbu,

ke balombodi ne bantu ba mianzu.

Kadi muntu udi utshina Maweja-Nangila udi mubatambe bonsu ku bunene.

25Mupika wa meji neakuate bantu badi badienzela malu ku mudimu,

bantu badimuke kabena mua kunungana.

Mutudi mua kudinemeka

26Kuena mua kudileja bu udi ne meji paudi wenza mudimu.

Kuditambishi paudi mu dikenga.

27Bidi bimpe kuenza mudimu ne kuikala ne bintu bia bungi,

pa mutu pa kuenda uditumbisha kuyi ne tshia kudia.

28Muananyi, paudi udianyisha, udipuekeshe,

uditue makumbu adi makuakanyine.

29Muntu kena mua kuanyisha udi udienzela bibi,

muntu nansha umue kena mua kuitaba muntu udi udipepeja.

30Badi banemeka mupele bua meji adiye nawu,

muena biuma bua biuma bidiye nabi.

31Muntu udibu banemeka padiye mupele,

badi mua kumunemeka mushindu kaayi pikalaye mubanji?

Kadi muntu udibu bapepeja padiye mubanji,

badi mua kumupepeja mushindu kaayi pikalaye mupele?