Yezekiyele Diumvuija - MUKANDA WA MYIDI MUKULU（TSH96）

Diumvuija— Yezekiyele uvua mutuangaji wa mu nzubu wa Mvidi Mukulu wa mu Yerushalayime. Uvua mu tshisumbu tshia bena Izrayele bavuabu baye nabu ku Babilone mu 597 bgbg ne Y.K., tshidimu tshivuabu bakuate Yerushalayime kudi Nebukadnesare musangu wa kumpala. Bidimu binayi bimane kupita, ke Mvidi Mukulu kumubikila bua kuenzaye mudimu wende wa buambi. Pavuaye mu Babilone, Yezekiyele uvua ubela bena Izrayele bonsu, ne bavuaye nabu pamue ku Babilone, ne bavua bashale mu Yerushalayime. Baluishi bamane kukuata Yerushalayime, bosha ne nzubu wa Mvidi Mukulu mu 587 bgbg ne Y.K., Yezekiyele udi usakidila ku malongesha ende miaku ya kusamba nayi bantu, ubakolesha kabidi ne ku muoyi.Mukanda wa Yezekiyele udi ne bitupa binayi:1. Kabayi banji kukuata Yerushalayime musangu muibidi, Yezekiyele udi udiwula, ukanyina bena Izrayele (tshit. 1 too ne ku tshit. 24).2. Yezekiyele udi umanyisha ne: Mvidi Mukulu neanyoke kabidi bisamba bikuabu bivua bidinga bena Izrayele, bibadiata mu makasa (tshit. 25 too ne ku tshit. 32).3. Bamane kukuata Yerushalayime mu 587 bgbg ne Y.K., Yezekiyele udi ukolesha bena Izrayele mu maboku (tshit. 33 too ne ku tshit. 39).4. Mvidi Mukulu udi uleja muambi, mu lungenyi, nzubu wende mupiamupia (tshit. 40 too ne ku tshit. 48). Mvidi Mukulu udi uleja Yezekiyele malu a bungi mu lungenyi. Yezekiyele pende uvua walongesha bantu pa kuenza malu avua abumvuija tshivuaye musue kuamba. Bu mudiye mutuangaji, udi utamba kuangata mushinga ne nzubu wa Mvidi Mukulu. Kadi udi ulongesha ne: katuedi meji ne: tudi tupetangana ne Mvidi Mukulu amu mu muaba wende wa tshijila wa mu Yerushalayime to. Mvidi Mukulu udi kabidi munkatshi mua bantu bende badi mu Babilone (tshilejilu: 11.16). Udi ulongesha kabidi ne: badi mua kunyoka muntu amu bua malu mabi avuaye muenze, ki mbua bivua muntu mukuabu muenze to. Dilongesha edi divua dibengangana ne bivua bena Izrayele ne tshibidilu tshia kulongesha ne: tshilema tshia baledi tshidi mua kukuata bana, tshia bana tshidi mua kukuata baledi (tshit. 18). Ke mudi Yezekiyele ulomba muntu yonsu bua adilengeje, andamune muoyi wende. Kadi udi umanyisha kabidi ne: bantu ba Mvidi Mukulu bamane kufululuka (tshit. 37), nebabapingaje mu ditunga diabu (11.14-20; 36.1-38).