Sira 26 - MUKANDA WA MYIDI MUKULU（TSH96）

Muntu udi musele mukaji muimpe udi ne disanka(Tun. 13-18: 7.19; 36.26-30; Nsum 18.22; Tshib 2.18)

1Muntu udi musele mukaji muimpe udi ne disanka,

nealale panu matuku mulongulongu.

2Mukaji wa bukitu udi usankisha bayende,

bayende neasombe ne ditalala bidimu biende bionsu bia panu.

3Mukaji muimpe udi dipa dia pa buadi didi Maweja-Nangila

upesha badi bamutshina!

4Nansha muntu awu muikale mubanji, nansha mupela,

udi ne disanka,

uleja mpala wa disanka matuku onsu.

Mukaji mubi

5Kudi malu asatu adi angenza bowa,

kudi kabidi buinayi bundi ntshina:

ke mayuki a dishima,

bisangilu bia mua bantu,

kufundangana ku tubadi kapayi bualu.

Bionsu ebi mbibi bipite lufu.

6Kadi dikenga dibi dipite ke dia mukaji

udi ukuatshila mukenende mukawu,

muikale kabidi ne buakulavi.

7Mukaji mubi udi ne buenzayi

bu ngombe musuika bibi udi ukoka ditempu;

paudi musue kumutekesha

udi bu muntu udi ukuata kaminyiminyi.

8Mukaji udi ukuatshika maluvu udi ufikisha bantu munda,

uleja bubi buende muonsu mudibu.

9Mukaji wa bibidilu bibi badi bamumanyina ku lutangilu luende,

ne ku kutekesha kuende kua mesu

10Pikala muanebe wa bakaji udienzela malu,

umutangile ne disu dikole,

bualu neakunyeme paudi ne ditanaja.

11Umutangile ne disu dikole ku mesu adiye ulengula awu,

padiye ukushima kuena mua kukema to.

12Bu mudi muena luendu udi ne nyota,

unua mayi onsu adiye upeta,

ke mudi mukaji ewu,

udi wenda ne balume bonsu,

udi ufila mubidi wende ku tshiendenda.

Badi batumbisha mukaji muakane(Tun. 1-4: Nsum 31.10-31; 14.1)

13Mukaji mulenga udi usankisha bayende,

nsombelu wende mulenga udi ukolesha bayende mu mikolu.

14Mukaji udi wamba miaku mikese udi dipa dia kudi Maweja-Nangila,

mukaji mukolesha bimpe udi upita bintu bionsu ku mushinga.

15Mukaji udi ne bupuekele kena ne udibu mua kumufuanyikija nende,

kakuena udi mua kumupita ku mushinga.

16Mukaji mulenga tshishiki mu nzubu mulengeja bimpe

udi mufuanangane ne diba didi dibanda mulu menemene.

17Bu mudi muendu ukenkela pa tshitekelu tshiawu tshia tshijila,

ke mudi mpala wa mukaji mufuke bimpe wengelela.

18Mudi makunji a mpawungi mashikame pa tshiamu tshitoke,

ke mudi mikolu mimpe ya mukaji mishindame pa bikankanya biende.

Malu asatu adi atonda

28Kudi malu abidi adi antonda,

kudi kabidi buisatu budi bumpetesha tshiji:

muntu mudianza kupeta disanka udi ubuela mu dikenga,

pashishe bantu ba lungenyi badi babapetula kudi bantu bakuabu,

kadi nangananga muntu udi ubenga njila muakane,

musue kubuela mu njila mubi.

Maweja-Nangila neashipeshe muntu wa nanku!

Mateta a ngenda mushinga

29Muntu udi usumba bintu bia kuenda nabi mushinga,

misangu mivule kena wepuka buenzayi.

Ngenda mushinga misangu mivule badi mua kumupisha.