Yoshuwa 16 - MUKANDA WA MYIDI MUKULU（TSH96）

Buloba bua bena Efrayime ne bena Menashe

1Buloba buvuabu batshinka bua kupesha ndelanganyi ya Yozefe, buvua ne mukalu wabu nenku: kuinshi uvua utuadijila ku musulu wa Yardene, pabuipi ne tshimenga tshia Yeriko, luseke ludi diba dipatukila lua mpokolu uvua ufikisha mayi mu tshimenga. Biangatshile mu Yeriko, mukalu awu uvua upitshila mu tshipela, ufika ne ku mikuna ya Betele.

2Muaba awu, mukalu uvua utungunuka too ne ku Luze, upitshila mu Atarote, muaba udi bena Arki.

3Pashishe udi upueka ku bena Yafleti luseke ludi diba dibuelela. Mukalu mumane kupitshila ku Bete-Orone wa kuinshi ne ku Ngezere, udi ushikidila ku Mayi manene a pankatshi pa matunga.

4Nanku ndelanganyi ya Yozefe, mmumue ne: bena tshisamba tshia Menashe, ne tshia Efrayime, bavua babanyangana buloba abu.

5Bena tshisamba tshia Efrayime bavua bapeta buloba bilondeshile meku abu. Mukalu wa buloba abu uvua utuadija ku Atrote-Adare kuinshi mu ditunga luseke ludi diba dipatukila, uya too ne ku Bete-Orone wa ku mutu.

6Biangatshile muaba awu, mukalu uvua ufika too ne ku Mayi manene a pankatshi pa matunga. Ku mutu mu ditunga, mukalu uvua upitshila pabuipi ne Mikmetate. Ku luseke ludi diba dipatukila lua Mikmetate, mukalu awu uvua utungunuka too ne ku Tanate-Silo, ukupitshila, uya ku Yanowa.

7Pashishe uvua upueka ku Atarote ne ku Nara, ufika ku Yeriko, ushikidila ku musulu wa Yardene.

8Ku luseke ludi diba dibuelela lua Mikmetate, mukalu uvua umuka ku Tapuwa, ufika ne ku musulu wa Kana, ufika ku Mayi manene a pankatshi pa matunga. Ke muvua buloba buvuabu babanyina bena Efrayime bilondeshile meku abu.

9Ku buloba bua bena Efrayime abu, bavua basakidilaku kabidi bimenga, ne misoku ivua nabi mutumba, bia mu buloba bua bena Menashe.

10Bena Efrayime kabavua bipata bena Kenaane bavua mu Ngezere to. Bobu aba batshidi basomba too ne lelu munkatshi mua bena Efrayime. Kadi bena Efrayime bavua benzeja bena Kenaane aba midimu mishilangane.