1Bantu bakane badi mu tshianza tshia Mvidi Mukulu. Tshinyangu nansha tshimue katshiena tshibakuata.
2Batshimbakane badi batangila lufu lua muntu muakane bu lufu lua menemene, bamba ne: lufu luabu nkabutu.
3Badi bamona bantu bakane bavua batushiya bu badi babutuka kashidi. Bakane pabu badi mu bupole bua Mvidi Mukulu.
4Bantu mbambe ne: mbapete dinyoka, kadi bobu bavua amu batekemena ne katuakufua kashidi to.
5Bakane badi bakenga bua katupa kipi, badi bindila diakalenga dia kashidi didibu mua kupeta. Mvidi Mukulu udi ubateta, mmumanye mudibu mua kusanka pabuipi nende.
6Mvidi Mukulu udi ubumusha mikiya bu mpawungi udibu bela mu kapia bua kumuakaja. Uvua mubanyishe bu mudiye muanyishe milambu idibu bosha pa tshilambuilu.
7Pakumbana tshikondu tshidi Mvidi Mukulu ulumbuluisha bantu, nebakenke diakamue. Nebikale bu tuntolentole tua kapia tudi tutemesha kapia ku bisosa.
8Bakane nebalumbuluishe bukua matunga, badia bumfumu bua bisamba. Kadi Maweja-Nangila neashale mfumuabu kashidi.
9Nenku bonsu badi batekemena kudi Mvidi Mukulu, nebamanye ne Mvidi Mukulu udi muena bulelela; badi bamulamate, nebashale mu dinanga diende. Bualu Maweja-Nangila mmunange badiye musungule, udi ubafuila luse.
Dinyoka dia bantu badi bapepeja Mvidi Mukulu10Kadi bantu babi badi bapepeja Mvidi Mukulu, nebapete dinyoka dibakumbanyine, bualu badi bapepeja bantu bakese, babenga Maweja-Nangila.
11Bantu badi kabayi balonda meji, badi kabayi bitaba meyi ne mikandu, mbena diakabi. Kabena mua kutekemena tshintu nansha tshimue. Bidibu benza kabiena bibapetesha tshintu. Midimu yabu idi amu tshianana.
12Bakaji badibu basela kabena ne lungenyi. Bana badibu balela, mbantu babi. Dikenga nedikuate ndelanganyi yabu.
Diakalenga, ndia badi balamate Mvidi Mukulu, nansha kabayi balela bana13Diakalenga ndia mukaji udi kayi ne muana, kayi muena buenzayi, kayi ne lumu lubi. Dituku dia tshilumbuluilu, Mvidi Mukulu neamufute.
14Diakalenga didi kabidi dia muntu mutungu, udi kayi wenza malu mabi, kayi ufikila Mvidi Mukulu munda. Bu mudiye mulamate Mvidi Mukulu, neapete difutu dia pa buadi, neapete muaba wa disanka mu nzubu wa Maweja-Nangila.
15Udi ukuata mudimu bimpe, neapete difutu dilenga. Udi ulonda mudi meji amba, udi bu mutshi ku muelelu wa mayi, miji yawu kayiyi mua kuuma.
16Bana balele mu buendenda kabakupeta diakalenga to. Badibu balela mu bundumba nebajimine.
17Nansha bobu balala panu bidimu bia bungi, kabakuikala ne lumu to. Nansha bobu bakulakaje, badi babapetula kashidi.
18Bobu bafue batshikale bansonga, mena abu bantu kabena mua kuinyikangana nansha. Dituku dia tshilumbuluilu, kabakubasamba to.
19Bantu badi benza bibi, ndekelu wabu nkabutu!
Who We AreWhat We EelieveWhat We Do
2025 by iamachristian.org,Inc All rights reserved.
