1 Tesalonike Diumvuija - MUKANDA WA MYIDI MUKULU（TSH96）
Diumvuija— Tesalonike uvua tshimenga tshikulu tshia mu ditunga dia Masedoniya divua kabidi ku bumfumu bua bena Rome. Ditunga adi divua ku mutu kua ditunga dia bena Ngreke, luseke ludi diba dipatukila. Mu luendu luende luibidi, Polu mumane kumbuka mu Filipe, kufikaye mu Tesalonike. Kuasayemu Tshisumbu tshia bena ditaba. Kadi uvua mushale muaba awu amu matuku makese, bualu bena Yuda bakuabu bavuamu bavua bamuluisha bikole. Kumukolelabu bua umbuke lukasa mu tshimenga atshi. Ke kuyaye ku Bereya (MM 17.1-10). Pashishe pakavua Polu mu Korente, ke Timote kufika, bua kumumanyisha malu a mu Tesalonike. Ke Polu kubatumina mukanda wende wa kumpala. Bumue utshivua mu Korente. Mukanda awu udi mua kuikala mukanda uvuabu bafunde kumpala kua mikanda mikuabu yonsu ya mu Ndondu Mupiamupia. Bumvuiji ba bungi ba mikanda ya tshijila badi bamba ne: mbaufunde bu mu tshidimu tshia 50 kunyima kua Diledibua dia Yezu Kristu.Malu a mu Tesalonike avuabu bamanyishe Polu avua amusankisha. Ke mudiye wela Mvidi Mukulu tuasakidila, bua tshilejilu tshimpe tshivua bena Tesalonike baleja Bisumbu bikuabu bia bena ditaba bia mu ditunga. Pashishe udi uvuluija bena Tesalonike midimu idiye mukuate munkatshi muabu, ubaleja kabidi mudiye ujinga bikole kumonangana nabu (1.1—3.13). Kadi udi ubakolesha ku muoyi bua bananukile, baye kumpala mene mu nsombelu muimpe wa bena Kristu (4.1-12). Pashishe udi wandamuna ku nkonku ivuabu nayi pa dibiika dia bafue, ne pa dipingana dia Kristu (4.13—5.11). Udi uj ikija mukanda wende ne mibelu mikuabu, ubela kabidi mioyi (5.12-28).Mukanda ewu udi utalaja mioyi ya bonsu badi bapampakana bua malu adi ne bua kuenzeka ku ndekelu wa bidimu. Udi uyuluija bena ditaba ne: tshidi ne bualu menemene ke kuleja bantu bonsu patoke ku nsombelu wenu mulenga, munukadi bamane kubuela mu butoke bua Kristu. Bua malu atshidi kumpala, nuleje amu munudi batekemene ne muoyi umue ne: tshikondu netshifike tshitudi mua “kuikala ne Mfumu matuku onsu tshiendelele” (4.17). Tuetu bamane kudilongolola nanku, dituku ne diba bidi Mfumu mua kufika, kabiena ne bualu.
