Meji 18 - MUKANDA WA MYIDI MUKULU（TSH96）

Dikunji dia kapia

1Kadi mu matuku onsu awu, bukenke buvua butokesha bakulamatshi bebe. Baluishi babu bavua bumvua meyi abu, kadi kabayi babamona. Bavua ne diakalenga bualu kabavua ne dikenga bu diabu.

2Bavua banyisha bantu bebe pa kumona bavuabu bakengesha kabayi basue kudisombuela. Ke muvuabu balomba dilekela bua ngenzelu wabu mubi ewu.

3Nenku, pa mutu pa miidima, wewe kulombola tshisamba tshiebe ne tshimunyi tshia kapia mu njila ivuatshi katshimanyi. Tshivua tshimunyi bu nkenke ya diba, divua kadiyi mua kubenzela bibi mu luendu elu lua lumu.

4Bena lukinu babu kabavua bamona nkenke ya diba, bavua basomba amu mu miidima, bu mu lukanu. Bualu bavua bela bana bebe mu nkanu. Ke padi bantu bonsu ba pa buloba mua kupeta butoke bua kashidi to diyi diudi mubapeshe.

Butuku bua kanyinganyinga butuku bua lupandu

5Baluishi ba bantu bebe kushindika bua kushipa bana batekete ba tshisamba tshidi tshikulamata, muana umue, bamulekela mu tshisaka ku mayi, bamupandisha. Ke wewe kushipa tshisumbu tshia bana ba baluishi bebe. Wewe kuela tshiluilu tshiabu mu dijiba dia mayi.

6Bankambua betu bavua badianjila kumanya bivua ne bua kuenzeka butuku buine abu. Nenku bavua ne musangelu ne bukitu, bualu bavua bamanya muvuabu mua kutekemena biuvua mubalaye.

7Uvua mudianze kumanyisha bankambua betu malu avua mua kuenzeka butuku abu: kupandisha bantu bakane, kunyoka bena lukuna babu.

8Uvua munyoke baluishi betu ne bintu bia momumue biuvua mutupe nabi lumu tuetu bauvua musungule.

9Bantu bakane bavua bapueka mu ditunga dia tshijila, balambula milambu mu musokoku. Bavua balaya bua kulama meyi a Mvidi Mukulu, adi masue ne balamatshi ba Mvidi Mukulu basanke nansha babungame pamue. Bavua bimba misambu yabu ya kale ya kusamuna Mvidi Mukulu.

10Mutoyi wa baluishi uvua ubatatshisha. Miadi ya baluishi babu, bavua badila bana babu balue ivua yumvuika.

11Bamfumu ne bapika, bavua ne dikenga dia mumue. Bakalenga ba matunga ne bena musoku bavua babakengesha mushindu umue.

12Muvua bitalu panshi bipite bungi, bia bantu bonsu abu. Bantu bavua bashale ne muoyi kabavua ne bukole bua kubajika, bualu bana bavuabu bapite kunanga bavua bafue amu mu katupa ka diba.

13Bantu aba kabavua bitaba mubelu nansha umue. Bayua batekemena amu kudi benji ba majimbu abu. Kadi pakafua bamuanabute babu ke bobu kumanya mudi Izrayele muana wa Mvidi Mukulu.

14Butuku kabuabuanji kuila menemene, pavua talalaa, miaba yonsu kamuyi bualu.

15Diakamue, Muaku webe kutuluka kulu ne bukole ku nkuasa webe wa bumfumu. Kuimanakanawu bu tshilobu tshia myita, kubuelawu munkatshi mua ditunga ditshipa edi,

16bua kumanyisha bantu diyi diuvua muambe dia kashidi didi bu muele mutue. Makasa awu mmadiate panshi, mutu mutue mu diulu. Uvua wenda ushipa bantu miaba yonsu.

17Diba adi, bantu bonsu bavua balota mitu mibi, mikuate bowa, kabidi bazakala ne bowa.

18Bavua bafua tshipuka miaba yonsu, balonda tshivua tshibafikisha ku lufu.

19Bilota biabu bikavua bimane kubamanyisha bualu ebu ne kabena mua kufua kabayi bamanye tshidi tshibafuisha.

Arone udi wambuluisha bantu mu tshipela

20Disama dia tshiambu kukuata bantu bakane, mu tshipela. Bantu ba bungi ba kudibu kupeta lufu. Kadi tshiji tshiebe Maweja-Nangila, katshiena tshinenga mutantshi.

21Nanku, muntu muakane kufikaye lukasa bua kubalama, kuangataye biamu bia mudimu wende wa butuangaji: ditendelela ne musenga wa kamonya, bua kulomba dilekela dia mibi yabu, bua kuluisha tshiji tshiebe, kujikija tshipupu. Nenku wakaleja mudiye muena mudimu webe bushuwa.

22Uvua mupete tshipeta tshimpe, pa kujikija tshiji tshiebe, ki mbua bukole nansha bua bia myita biende, kadi amu bua malomba ende avua mua kuimanyika dinyoka, pa kukuvuluija malaya auvua mulaye bankambua betu.

23Kuvua bitalu bipite bungi. Ke kubuelaye mu bualu ebu bua kutuyisha tshiji tshiebe, bua katshifiki ne kudi bantu batshidi ne muoyi.

24Uvua muvuale muntumpu mule, muzole bimfuanyi bivua bileja bintu bionsu bia pa buloba bujima. Mena a lumu a bankambua ba bena Izrayele, avua mateta pa tshiadi milongu inayi ya mabue mafunda mena a bisamba. Ku tshifulu tshiende kuvua tshitata tshileja Bunema buebe bua tshijila.

25Uvuabu batuma bua kubutula bantu, kukuatshika bowa, kupingana tshianyima pa kumona bionsu abi. Bushuwa, uvua musue kuleja bantu bebe kakese tshiji tshiuvua natshi.